Saꞌa Ubban Metiiddi Deꞌiya Guuggiyaa Sahuwaa
“Taani darotoo guuttaa unꞌꞌettays; ubba issi kifiliyan tarkka uttadakka unꞌꞌettays.”
“Taani keehi pashkki giyo wode azzanays; gaasoykka taani keehi ufayttiyo wode sohuwaara azzaniyoogaa tana gakkidabaappe eriyo gishshaassa.”
“Taani galla galla haniyaaba xallaa qoppanawu malays; shin issi issitoo qoppennan daroban unꞌꞌettays.”
Ha qofay guuggiyaa sahuwan waayettiyaageeti yootidoba. Nena woy neeni siiqiyo ura hegaa malabay gakki erii?
Hegee gakkiyoy ne xalaala gidennaagaa ammanetta. Ha wodiyan daroti guuggiyaa harggiyan banttawu sahettidi woy eti siiqiyoogeeti sahettin waayettoosona.
Nuuni deꞌiyoy ‘wayssiya wodiyaana’ gidiyo gishshawu hegee asay unꞌꞌissiya daroban unꞌꞌettanaadan oottidoogee qoncce. (2 Ximootiyoosa 3:1) Saꞌa ubban hosppun asaappe issoy guuggiyaa harggiyan waayettiyoogaa issi xinaatee yootiis. Ubbasaa gakkiya Koronaa harggiyaa gaasuwan 2020n unꞌꞌettiya asaa qooday 2019gaappe 26 kushe gujjiis; qassi guuggiyaa sahuwaa sahettiyaageetu qooday 28 kushe gujjiis.
Ha wodiyan ay keena daro asay unꞌꞌettiyaakkonne guuggiyaa harggiyan sahettiyaakko eriyoogee koshshiyaaba. SHin neeyyoonne neeni siiqiyoogeetuyyo siyettiyaabaa eriyoogee hegaappekka aaruwan koshshiyaaba.
Guuggiyaa payyatettay aybee?
Ne guuggee payya gidikko neessi darotoo loꞌꞌobay siyettees; qassi loytta qoppana danddayaasa. Neeni unꞌꞌissiyaabaa genccana danddayaasa, ne oosuwaa loytta oottaasa, qassi ne deꞌuwan ufayttaasa.
Guuggiyaa harggee . . .
Issi uri mooridobaa gaasuwan OYQQIYAABA GIDENNA.
Issi uri qofan unꞌꞌettanaadaaninne A eeshshay laamettanaadan oottiya HARGGE.
Darotoo issi uri haratuura laggetanawunne deꞌuwan galla galla koshshiyaabata polanawu metootanaadan oottana danddayees.
Layttay, wogay, zaree, yaray, haymaanootee, timirtte xekkay, woy deꞌiya aqoy aybanne gido oonanne qohana danddayees.
Guuggiyaa harggiyawu maaduwaa demmiyoogaa
Issi issitoo issi uri meezetibeennabaa oottiyoogaa, kaseegaappe darissidi woy guuttaa xiskkiyoogaa, kaseegaappe daruwaa woy guuttaa miyoogaa, keehi unꞌꞌettiyoogaa woy azzaniyoogaa doommana danddayees; issi uri hegaadan hanikko hegawu gaasoy aybakko akeekanawunne he metuwaa giigissanawu aakimiyaa maadoy koshshana danddayees. SHin maaduwaa awuppe demmana danddayay?
Saꞌan deꞌida ooppenne aaruwan aadhdhida eranchchay, Yesuusi Kiristtoosi hagaadan giis: “Hargganchchatussippe attin, payyatuyyo aakime koshshenna.” (Maatiyoosa 9:12) Sahettiyaageeti koshshiya akkamuwaanne xaliyaa demmikko, harggee etawu kaseegaappe kehananne bantta deꞌuwan ufayttana danddayoosona. Harggee wolqqaama woy adussa wodiyawu takkidaba gidikko, hegaa mala asati sohuwaara akkamettiyoogee eratetta.a
Geeshsha Maxaafay akkamuwaabaa yootiya maxaafaa gidana xayikkonne, A giddon deꞌiya qofay nu guuggiyaa payyatettawu maaddana danddayees. Guuggiyaa sahuwaara gayttidaagan Geeshsha Maxaafay nuna waati maaddana danddayiyaakko qonccissiya kaalliya huuphe yohota loytta akeekanaadan nena minttidi shoobboos.
a Wochchiyo Keelaa maxeetee akkamettiyo loꞌꞌo ogee hagaa giidi yootenna. Ubba asay kuuyanaappe kase ba dooriyoobaa loytti yiggi xeellana koshshees.