XANNAꞌIYO HUUPHE YOHUWA 42
MAZAMURE 103 Henttanchata—Imota Gidida Asata
“Imota” Gidida Attumaageeta Nashshiyogaa Bessa
‘I pude xoqqasaa kiyido wode attumaageeta imota ootti immiis.’ —EFI. 4:8.
TAMAARANABAA
Galchchawu oottiyageeti, cimatinne woradaa xomoosiyageeti nuna waati maaddiyakko, qassi ha ammanettida attumaasati oottiyobaa nuuni nashshiyogaa waati bessana danddayiyakko tamaarana.
1. Yesuusi nuuyyo immido amaridabati awugeetee?
HARATA maaddiyogan Yesuusaara likketiya asi baawa. I saꞌan deꞌiyo wode maalaalissiyabata oottiyogan harata maaddiis. (Luq. 9:12-17) I ba shemppuwa nu gishshawu aatti immiyogan ubbaappe aadhdhiya imotaa immiis. (Yoh. 15:13) Yesuusi hayquwappe denddi simmidikka nuna maaddiyogaa aggibeenna. I qaalaa gelidoogaadan, nuna tamaarissiyanne minttettiya geeshsha ayyaanaa immanaadan Yihoowa woossiis. (Yoh. 14:16, 17; 16:13) Yesuusi kumetta saꞌan deꞌiya asati A kaalliyageeta gidanaadan nuuni oottana mala galchchaa shiiqotu baggaara ubbatoo nuna maaddees.—Mat. 28:18-20.
2. Efisoona 4:7, 8, 11n “imota” geetettida asati oonee?
2 Yesuusi immido hara imotaa ane beꞌoos. Yesuusi saluwa bi simmidi ‘attuma asata imota ootti immidoogaa’ Phawuloosi yootiis. (Efisoona 4:7, 8, 11 nabbaba.) Galchchaa dumma dumma ogetun maaddanaadan Yesuusi he asata immidoogaa Phawuloosi qonccissiis. (Efi. 1:22, 23; 4:11-13) Ha wodiyan galchchawu oottiyageeti, galchchaa cimatinne woradaa xomoosiyageeti ‘imota gidida asata.’a He asati nagaranchcha gidiyo gishshawu baliyogee qoncce. (Yaaq. 3:2) Shin nu Goday Yesuus Kiristtoosi nuna maaddanawu eta imotadan immiis.
3. “Imota” gidida attumaageeti oottiyobaa nuuni ubbay maaddana danddayiyo ogeta qonccissa.
3 Yesuusi galchchaa minttiyo gita oosuwa ‘imota gidida asatuyyo’ immiis. (Efi. 4:12) Shin nuuni ubbaykka he oosuwan etaara hashetana danddayoos. Nuuni hegaa Shiiquwa Addaraashaa keexxiyo oosuwara geeddarssana danddayoos. Amaridaageeti keexxiyo oosuwa oottoosona. Harati qassi qumaa woy koshshiyabata efiyogan woy hara ogetun he oosuwa maaddoosona. Hegaadankka galchchawu oottiyageeti, galchchaa cimatinne woradaa xomoosiyageeti galchchaa minttanaadan nuuni ubbay haasayiyobaaninne oottiyoban maaddana danddayoos. Eti minnidi oottiyoban nuuni waani goꞌettiyakko, qassi etakka, eta imotadan immida Yesuusakka nashshiyogaa waati bessana danddayiyakko ane beꞌoos.
GALCHCHAWU OOTTIYAGEETI ‘MAADDIYABAA’ OOTTOOSONA
4. Koyro xeetu layttan deꞌida galchchawu oottiyageeti harata ayba ogetun maaddidonaa?
4 Koyro xeetu layttan amarida ishantti galchchawu oottiyageeta gididi sunttettidosona. (1 Xim. 3:8) Phawuloosi “maaddiyaageeta” giidoogeeti eta gidennan aggokkona. (1 Qor. 12:28) Cimati tamaarissiyogaaninne heemmiyogan xeelaa wottana mala galchchawu oottiyageeti keehi koshshiya darobaa oottennan aggokkona. Leemisuwawu, galchchawu oottiyageeti Geeshsha Maxaafaa haraban zaari zaari xaafiyogan woy hegawu koshshiya miishshata shammiyogan maaddennan waayi aggana.
5. Galchchawu oottiyageeti ha wodiyan harata maaddanawu oottiyo issi issibati awugeetee?
5 Galchchawu oottiyageeti intte galchchaa maaddiyo issi issi ogeta ane qoppa. (1 PHe. 4:10) Eti galchchaa miishshaa oyqqanaadan, woy haggaazo moottaa darajjayanaadan, galchchawu xuufiya azazanaadan, cenggurssaanne biiduwa miishshatuura gayttidabaa oottanaadan, shiiqotun mokkiyageeta gidanaadan, woy Shiiquwa Addaraashan issi issibaa giigissanaadan aawatettay etawu imettana danddayees. He ooso ubbay galchchan maaray mankkay deꞌanaadan koshshiyaba. (1 Qor. 14:40) Hegaa bollikka, galchchawu oottiya amaridaageeti Kiristtaanetu Deꞌuwanne Haggaazuwa Shiiquwan kifileta shiishshoosonanne dere haasayaa haasayosona. Galchchawu oottiya issi uri haggaazo citaa kaalettiyagaa maaddanaadankka sunttettana danddayees. Issi issitoo, cimati ishanttanne michchontta minttettanawu biyo wode galchchawu oottiyageeta ekkidi boosona.
6. Galchchawu oottiyageeta gididi minni baaxetiyageeta nuuni nashshiyoy aybissee?
6 Galchchawu oottiyageeti galchchaa maaddiyogaa xeelliyagan amaridaageeti woygidonaa? Boliviyan deꞌiya Beberlib giyo michchiya hagaadan gaasu: “Galchchawu oottiyageeti maaddiyo gishshawu taani shiiqota loytta kaallays. Eti oottiyobaappe denddidaagan taani mazamureta yexxays, ta qofaa yootays, haasayata siyays, qassi biidotuppenne misiletuppe tamaarays. Shiiquwa shiiqida asay qohettennaadaaninne shiiquwa yaana danddayibeennaageeti son uttidi kaallanaadan maaddoosona. Shiiquwappe simmin eti geeshshiyogan maaddoosona, miishshaara gayttidabaa oottoosona; qassi koshshiya xuufeta nuussi gattoosona. Hegawu taani eta wozanappe galatays!” I azinay galchchaa cima gidido Kolombbiyan deꞌiya Lesla hagaadan gaasu: “Ta azinay dumma dumma aawatettaa polanaadan galchchan oottiyageetu maadoy koshshees. Eti maaddennaakko awu oosoy dariyo gishshawu, eti maaddanawu bantta dosan minni oottiyobawu taani eta galatays.” Neenikka hegaadan qoppiyogee qoncce.—1 Xim. 3:13.
7. Galchchawu oottiyageeta nashshiyogaa nuuni waati bessana danddayiyoo? (Misiliyakka xeella.)
7 Galchchawu oottiyageeta nuuni nu wozanan galatiyaba gidikkokka, nuuni galatiyogaa etawu yootanaadankka Geeshsha Maxaafay minttettees. (1 Tas. 5:18) Finlandden deꞌiya Kishishtofa giyo cimay galatiyogaa hagaadan qonccissiis: “Taani karddiya woy kiitaa kiittays; hegan issi xiqisiya xaafays, qassi galchchawu oottiyagee haasayido woy oottido tana minttettiyabaa woy qassi I oottidobaa taani nashshiyo gaasuwa qonccissays.” Niwu Kalidooniyan deꞌiya Paskalinne Zheyla galchchawu oottiyageetussi darotoo woossoosona. Paskali hagaadan giis: “Mata wodeppe haa simmin nuuni galchchawu oottiyageetussi darotoo woossoos, eta nuussi immido gishshawu Yihoowa galatoos; qassi I etaara gidanaadaaninne eta maaddanaadan oychchoos.” Yihooway hegaa mala woosaa siyiyo gishshawu galchchan deꞌiya ubbay goꞌettees.—2 Qor. 1:11.
GALCHCHAA CIMATI ‘INTTE GIDDON MINNI OOTTOOSONA’
8. Phawuloosi ba mala cimata ‘minni oottiyageeta’ giidoy aybissee? (1 Tasalonqqe 5:12, 13)
8 Koyro xeetu layttan deꞌida cimati galchchawu minni oottidosona. (1 Tasalonqqe 5:12, 13 nabbaba; 1 Xim. 5:17) Eti shiiqota kaalettiyogaaninne galchchawu issi issibaa kuuyiyogan minni oottidosona. Qassi eti ishanttinne michchontti ammanuwan minnidi deꞌanaadan siiquwan zoridosona. (1 Tas. 2:11, 12; 2 Xim. 4:2) Eti bantta so asawu koshshiyabaa kunttanawunne ayyaanaaban mino gididi deꞌanawukka loytti baaxetidosona.—1 Xim. 3:2, 4; Tii. 1:6-9.
9. Ha wodiyan cimatuyyo deꞌiya aawatettatuppe amaridaageeti awugeetee?
9 Ha wodiyan cimati darobaa oottoosona. Eti mishiraachchuwa yootoosona. (2 Xim. 4:5) Minnidi sabbakiyogan nuuyyo leemiso gidoosona, bantta heeran sabbakuwa oosuwa darajjayoosona, qassi sabbakiyogaaninne tamaarissiyogan qara gidanaadan nuna loohissoosona. Eti asa asappe shaakkennan maariya daanna gididikka oottoosona. Issi Kiristtaanee gita nagaraa oottikko, cimati he uri Yihoowara zaaretti dabbotanaadan loytti maaddoosona. Qassi galchchaa geeshshatettaa naaganawukka baaxetoosona. (1 Qor. 5:12, 13; Gal. 6:1) Ubbaappe aaruwan, cimati henttanchcha gidiyogan erettoosona. (1 PHe. 5:1-3) Eti loytti giigettidi Geeshsha Maxaafaappe haasayata haasayoosona, qassi galchchan deꞌiyageeta ubbaa loytti eranawunne biidi eta minttettanawu baaxetoosona. Hegaa bollikka, amarida cimati hara aawatettata poliiddi Shiiquwa Addaraashaa keexxiyogaaninne bottokoniyogan, gita shiiqota darajjayiyogan maaddoosona; qassi Hosppitaaletuura Gattiya Konttetuuninne Sahettidaageeta Oychchiya Citatun oottoosona. Cimati nuna maaddanawu minni oottoosona!
10. Minnidi oottiya cimata nuuni nashshiyoy aybissee?
10 Henttanchchati nuna loytti maaddiyo gishshawu, nuuni ‘naaꞌꞌantto yayyennaagaanne dagammennaagaa’ Yihooway kasetidi yootiis. (Erm. 23:4) Finlandden deꞌiya Johaano giyo michchiya I aayyiya keehi sahettido wode he xiqisee yootiyobay tuma gidiyogaa beꞌaasu. A hagaadan gaasu: “Tana unꞌꞌissidabaa haratuyyo yootanawu taani metootikkokka, taani loytta erenna issi cimay ta yootiyobaa danddayan ezggiis, tanaara woossiisinne Yihooway tana siiqiyogaa taani ammanettanaadan maaddiis. I giidobaa taani hassayana xayikkokka, taani unꞌꞌettiyogaa aggidoogaa hassayays. Koshshiya wodiyan tana maaddanawu Yihooway A kiittidoogaa ammanaas.” Ne galchchan deꞌiya cimati nena waati maaddidonaa?
11. Cimata nashshiyogaa waati bessana danddayiyoo? (Misiliyakka xeella.)
11 Cimati “oottiyo oosuwaa gishshau” nuuni eta wozanappe nashshanaadan Yihooway koyees. (1 Tas. 5:12, 13) Finlandden deꞌiya Henerita hagaadan gaasu: “Cimati harata bantta dosan maaddiyoy etayyo daro wodeenne wolqqay deꞌiyo gishshawu woy eta deꞌuwan eta gakkiya metoy baynna gishshawu gidenna. Taani issi issitoo etawu hagaadan gays: ‘Neeni gooba cima. Ne hegaa eranaadan koyays.’” Turkkiyenc deꞌiya Seero giyo michchiya hagaadan gaasu: “Cimati bantta oosuwa aggennan oottana mala etayyo minttettoy koshshees. Yaaniyo gishshawu nuuni karddiya xaafidi etawu kiittana, qumaa eta shoobbana, woy etaara haggaazana danddayoos.” Minni oottiyo gishshawu neeni nashshiyo cimay deꞌii? I oottiyobaa neeni nashshiyogaa yoota.—1 Qor. 16:18.
Aawatettay deꞌiyo ishantti minni oottiyogaa aggennaadan minttettana danddayaasa (Mentto 7, 11, 15 xeella)
WORADAA XOMOOSIYAGEETI NUNA MINTTETTOOSONA
12. Galchchaa minttanaadan Yesuusi sunttido harati oonee? (1 Tasalonqqe 2:7, 8)
12 Galchchaa hara ogiyan maaddanaadan Kiristtoos Yesuusi amarida attumaageetakka sunttiis. Yesuusi kaalettin Yerusalaamen deꞌiya cimati, yuuyidi xomoosanaadan Phawuloosa, Barnnaabaasanne harata kiittidosona. (Oos. 11:22) Aybissi? Galchchawu oottiyageetugaadaaninne cimatuugaadan etikka galchchaa minttanawu sunttettidosona. (Oos. 15:40, 41) Eti harata tamaarissanawunne minttettanawu bantta goꞌꞌaa aggi bayidosonanne haray atto bantta deꞌuwakka daafan yeggidosona.—1 Tasalonqqe 2:7, 8 nabbaba.
13. Woradaa xomoosiyageeti oottiyo issi issibati awugeetee?
13 Woradaa xomoosiyageeti darotoo issisaappe harasaa boosona. Amaridaageeti issi galchchaappe hara galchchaa gakkanawu daro xeetu kilo meetiriya manddaroosona. Saaminttan saaminttan, woradaa xomoosiya ishay unddenna haasayata haasayees; ishanttanne michchontta biidi minttettees; aqinyetu shiiquwanne cimatu shiiquwa, qassi haggaazo shiiqota kaalettees. I haasayata giigettees; qassi woradaanne gita shiiqota darajjayees. I aqinyetu timirtte keettan tamaarissees; woradan deꞌiya aqinyetuura shiiqanawu dumma shiiquwa darajjayees. Hegaa bollikka, macara biiroy awu immido keehi koshshiya oosota, ubba qassi issi issitoo eesoyiyabata oottana koshshees.
14. Minnidi oottiya woradaa xomoosiyageeta nuuni nashshiyoy aybissee?
14 Woradaa xomoosiyageeti oottiyoban galchchati waani goꞌettiyonaa? Yuuyidi xomoosiyageeti oottiyobaa xeelliyagan Turkkiyen deꞌiya issi ishay hagaadan giis: “Xomoosiyageeti oottiyo ubbabay taani ta ishanttanne michchontta maaddanawu etaara daro wodiya aattanaadan tana minttettiis. Woradaa xomoosiya darotuura taani gayttaas, shin eti tana haasayissanawu koyennabadan woy banttawu oosoy keehi dariyabadan tawu siyettanaadan mule ootti erokkona.” Qommoora ibay odettido Johaana woradaa xomoosiyagaara haggaazuwa kiyikkokka, eti son asa demmibookkona. A hagaadan gaasu: “Taani he gallassaa awudenne dogikke. Ta naaꞌꞌu michchontti hara heeri biido gishshawu taani eta keehi laamotaas. Woradaa xomoosiyagee tana loytti minttettiis; qassi nuuni haꞌꞌi nu soo asaaranne nu laggetuura issippe deꞌana xayikkokka, ooratta alamiyan etaara merinawu ufayssiya wodiya aattana danddayiyogaa taani akeekanaadan maaddiis.” Nuuppe daroti woradaa xomoosiyageetuura aattido ufayssiya wodeta hassayoos.—Oos. 20:37–21:1.
15. (a) Heezzantto Yohaannisa 5-8n odettidaagaadan, woradaa xomoosiyageeta nashshiyogaa waati bessana danddayiyoo? (Misiliyakka xeella.) (b) Aawatettay deꞌiyo ishanttu machchota nashshana koshshiyoy aybissee, qassi hegaa waati bessana danddayiyoo? (“Eta Machchota Hassaya” giya saaxiniya xeella.)
15 Gaayosi xomoosanawu yiida ishantta mokkanaadaaninne ‘Xoossay dosiyogaadan eta moyssanaadan’ kiitettida Yohaannisi minttettiis. (3 Yohaannisa 5-8 nabbaba.) Woradaa xomoosiyagaa qumaa shoobbiyogee nuuni yaatana danddayiyo issi oge. Hara ogee qassi I kaalettiyo haggaazo shiiqota shiiqiyogaa. Qommoora ibay odettido Lesla galatiyogaa hara ogetunkka bessaasu. A hagaadan gaasu: “Etayyo koshshiyabaa Yihooway immanaadan woossays. Qassi ta azinaynne taani eta xomoosoy nuna keehi maaddidoogaa yootiya dabddaabbiya etawu kiittida.” Woradaa xomoosiyageeti nuugaadan metootananne daafurana danddayiyogaa hassaya. Issi issitoo eti sahettoosona, hirggoosona, ubba unꞌꞌettoosona. Geella neeni kehatettan haasayiyobay woy ne immiyo guuttabay ne woradaa xomoosiyagee maaduwa demmanawu woossido woosawu zaaro gidana danddayees!—Lee. 12:25.
‘IMOTA GIDIDA ASATI’ NUUSSI KOSHSHOOSONA
16. Leemiso 3:27 maaran, ishantti banttana woygi oychchana danddayiyonaa?
16 Kumetta saꞌan, “imota” gididi oottiya daro ishantti nuussi koshshoosona. Neeni haattan muukettida isha gidikko, aawatettaa ekkada maaddana danddayay? (Leemiso 3:27 nabbaba.) Neeni galchchawu oottiyagaa gidanawu baaxetaydda deꞌay? Neeni galchchawu oottiyagaa gidikko, cima gidada ne ishantta maaddanawu baaxetay?d Kawotettaa Mishiraachchuwa Yootiyageetu Timirtte Keettan tamaaranawu ne hanotaa giigissana danddayay? Ha timirtte keettay nena darobaa loohissana; qassi Yesuusi nena loytti goꞌettanaadan maaddana. Neeni hegaadan oottana danddayennabadan neeyyo siyettikko Yihoowa woossa. Neessi imettiya aawatettaa neeni loytta polanaadan I ba geeshsha ayyaanaa baggaara nena maaddana mala woossa.—Luq. 11:13; Oos. 20:28.
17. “Imota” gidida attumaageeti nu Kawuwa, Kiristtoos Yesuusabaa ay qonccissiyonaa?
17 Yesuusi ‘imota ootti’ sunttido ishantti oottiyobay ha wurssetta gallassatun I nuna kaalettiyogaa bessees. (Mat. 28:20) Siiqiyanne keha Kawoy nuussi deꞌiyo gishshawu A keehi galatoos; I nuussi koshshiyabaa ereesinne ishanttu baggaara nuna maaddees. Yaakko minnidi oottiya ha ishantta demmido injje ubban nashsha. Qassi Yihoowa galatiyogaakka dogoppa; ayssi giikko, “lo77o imo ubbainne kumetta woito ubbai” appe yees.—Yaaq. 1:17.
MAZAMURE 99 Daro SHaꞌu Ishantta
a Oosuwa Kaalettiya Citaa yara, Oosuwa Kaalettiya Citaa maaddiyageeta, Macara Biiruwa Konttiya yara gidida cimatinne hara aawatettatun oottiyageetikka ‘imota gidida asata.’
b Issi issi asatu sunttay laamettiis.
c Kase Turkke geetettees.
d Galchchawu oottiyagaa woy cima gidanawu waatana danddayiyakko eranaayyo, “Ishanttoo—Galchchawu Oottiyageeta Gidanawu Baaxeteetii?” qassi “Ishanttoo—Cima Gidanawu Baaxeteetii?” giya huuphe yohota Hidaare 2024 Wochchiyo Keelan xeella.