Nuussi Imettida Aawatettata Meezetanaadaaninne Ufayttanaadan Yihoowi Nuna Maaddiis

Matisinne An-Katirina 1979n, Giiliyade Timirtte Keettan tamaaridosona; qassi eti Iranen, Morishesen, Miyanmaren, Tanzaaniyan, Ugandaninne Zayiren maddabettidi daro layttawu haggaazidosona. Giiliyaden eta tamaarissida ishaa Jak Redforddi zorido zoree etawu ooratta aawatettay imettido wode ubban keehi maaddiis. Ane eti giyobaa siyoos.

Matisaa intte tumaa waati siyidaakko hayyanaa nuussi yooterkketii.

Matisa: Naaꞌꞌantto Alamiya Olaa wode ta aaway Poolandden deꞌees; qassi I Kaatolike woosa keettay loꞌꞌo milatiya iita gidiyogaa beꞌiis. Gidikkonne I darotoo hagaadan gees, “Tumu haymaanootee deꞌiyogaa erays!” Guyyeppe, taani I giidobay tuma gidiyogaa akeekaas. He wode taani nabbabanawu galꞌꞌa maxaafata darotoo shammays. Hegeetuppe issoy, Merinaa Deꞌuwawu Kaalettiya Tumaa giyo salo milatiya maxaafaa. He huuphe yohoy tana keehi ufayssido gishshawu, hegaa shammido galla qammi kumettaa nabbabada wurssaas. Taani he maxaafaa nabbaba wurssosaara tumu haymaanootiya demmidoogaa akeekaas!

Taani Hosppune 1972ppe doommada Yihoowa Markkatu xuufeta keehi daruwa nabbabaas, yaatada ta oyshatussi Geeshsha Maxaafaappe zaaruwa demmaas. Yesuusi ba leemisuwan yootido, alꞌꞌo shuchchaa demmidi hegaa shammanawu bawu deꞌiya ubbabaa bayzzida zalꞌꞌanchchaadan tawu siyettiis. Taani demmido alꞌꞌo shuchcha mala gidida tumaa shammanawu, yuniversttiya gelada dottore gidanawu qoppidoogaa aggabayaas. (Mat. 13:45, 46) Tisaase 10, 1972n haattan muukettaas.

Tana yelidaageetinne ta kaalo ishay issi layttaa giddon tumaa siyidi haattan muukettidosona. Isiine 1973n ubba wode aqinye gidaas. Nu galchchan Yihoowa keehi siiqiya An-Katirino giyo keehi loꞌꞌiya ubba wode aqinyiya deꞌawusu. Nuuni siiqettidi 1975n aqo oyqqida, yaatidi Siwidinen daro asay Geeshsha Maxaafaa tamaaranawu koyiyo loꞌꞌiya sohuwan oyddu layttawu deꞌida.

An-Katirino: Ta aaway Isttokholme kataman yuniversttiyan tamaariiddi tumaa siyiis. He wode taani yelettoosappe heezzu agina xalaala gidikkonne, I tana shiiqotanne haggaazuwa ekkidi bees. Ta aayyiya hegaa dosenna gishshawu, Yihoowa Markkati balidosona gaada ammanttanawu malawusu. Shin A hegaadan oottana danddayabeenna gishshawu, guyyeppe akka haattan muukettaasu. Taayyo layttay 13 gidido wode haattan muukettaas, qassi 16 gidido wode ubba wode aqinye gidaas. Aassiyageeti keehi koshshiyo Umaaꞌon haggaaza simmada dumma aqinye gidaas.

Matisinne taani aqo oyqqi simmidi, daro asay tumaa eranaadan maaddiyogan ufayttida. Hegeetuppe issinniya Yihoowawu loytta haggaazanawu ispporttiya kaassaa aggida Mivooro giyo yelagiyo. Qassi A ta kaalo michcheera aqinye gidada haggaazaasu. Eti 1984n Giiliyaden tamaaridi Ekuwadoren misoone gididi haggaazoosona.

Intteyyo imettiya aawatettaa meezetanaadaaninne ubbatoo ufayttanaadan inttena aybi maaddidee?

Matisa: Nuussi ooratta aawatettay darotoo harasan imettiis. Shin, he laamiya meezetanaadan aybippenne aaruwan nuna maaddida issibay nuna ziqqi oottiyogan Yesuusa leemisuwa kaallanawu nuussi danddayettida ubbabaa muletoo oottiyogaa. (Qol. 2:6, 7) Leemisuwawu, heeran deꞌiya ishanttinne michchontti nubaa meezetanaadan naagiyogappe eti issibaa oottiyo gaasuwa eranawu baaxetoos. Issibaa xeelliyagan eti qoppiyo ogiyanne eta wogaa eranawu koyida. Nuuni Yesuusa leemisuwa kaalliyo wode, nuussi imettida aawatettaa meezetanawunne ufayttanawu metootokko.—Maz. 1:2, 3.

An-Katirino: Nuussi ooratta aawatettay imettiyo wode nuuni diccanawu awaa pooꞌoy koshshiya mati tokettida puutiya mala. Yihoowi keehi siiqiya daro ishanttanne michchontta ubbatoo nuussi immiis. Yaatiyogan nuna anjjiis. Leemisuwawu, Irane waanna katamaa Tehranen deꞌiya nu galchchaa ishantti Geeshsha Maxaafan etabay odettidogeetuugaadan nuna imatuwa mokkidosona. Nuuni Iranen takkanawu koyikkonne, Isiine 1980n he biittan Yihoowa Markkatu oosoy muleera teqettido gishshawu, 48 saate giddon nuuni yaappe kiyanaadan nuussi odettiis. Yaatin nuuni Afirkkan Zayiren (haꞌꞌi Konggo geetettees) maddabettida.

Nuuni Afirkkan maddabettidoogaa koyro erido wode yeekkaas. Afirkkan shooshatinne dumma dumma harggeti deꞌiyogaa siyidoogee tana keehi yashshiis. Shin Afirkkan daro layttaa haggaazida naaꞌꞌu nu mata laggeti hagaadan giidosona: “Yayyoppite! Intte Afirkkaa bi erennaba gidikkonne, he biittaa keehi dosanaagaa nuuni eroos.” Eti giidobay likke! Yan deꞌiya ishanttinne michchontti keehi siiqiyageeta. Nuuni Zayiren usuppun layttaa haggaazi simmin yan nu oosoy muleera teqettido gishshawu, nu yaappe kiyana koshshido wode ta qofay muleera laamettin taani Yihoowa, “Hayyanaa Afirkkan takkanaadan nuna maadda” gaada woossidoogan noocu gaas.

Yihoowawu haggaaziyogan intte demmido anjjoti aybee?

Matisa: Nuuni dumma dumma biittaappe yiidanne dumma dumma wogan diccida hara miisonetuura loytti laggetida. Qassi nu madabettido issi issi heeratun, nuuni issoy issoy 20 gidiya xinaateta xannaꞌissidoogan keehi ufayttida! Taani Afirkkan deꞌiya nu ishanttunne michchonttu siiquwanne kehatettaa mule dogikke. Tanzaniyan deꞌiya galchchata xomoosiyo wode kaame giddon aqoos; qassi ishanttinne michchontti keehi hiyyeesa gidikkonne nuussi koshshiyabaa giigissoosona. (2 Qor. 8:3) Hanidabaa nuuni issoy issuwara haasayiyo wodiya keehi dosoos. An-Katirinanne taani ubbatoo omarssi omarssi uttidi gallassi hanidabaa haasayoos; yaatidi Yihoowi nunaara deꞌiyo gishshawu A galatoos.

An-Katirino: Kumetta saꞌaappe yiida ishanttuuranne michchonttuura erettiyogee tana keehi ufayssees. Nuuni Farsettuwa, Paransaayettuwa, Lugandattuwanne Siwahilettuwa gujjin ooratta doonata tamaarida; qassi ufayssiya daro wogata meezetida. Nuuni ooratta ishanttanne michchontta loohissida, etaara laggetida, qassi issippe Yihoowawu haggaaziyogan ufayttida.—Sof. 3:9.

Yihoowi medhdhido keehi loꞌꞌiyanne malaalissiya dumma dumma meretatakka beꞌida. Nuuni ooratta aawatettaa ekkido wode ubban, Yihoowi nuna ubbatoo kaalettidabadan nuuyyo siyettees. Nuuni nurkka mule tamaarana danddayennabaa I nuna tamaarissiis.

Inttena gakkida amarida metoti aybee, qassi intte genccanaadan aybi maaddidee?

Matisa: Shekkeeriya gujjin, hara harggeti issi issitoo nuna sakkidosona. Qassi An-Katirina eesuwan shukettana koshshido wodeti deꞌoosona. Cimida nuna yelidaageetubaykka nuna qofissiis. Nuuni nu aawatettan haggaazishin koshshiyabaa etassi kunttida nu soo asaa yarata keehi galatoos. Eti nuna yelidaageeta danddayan, ufayssaaninne siiquwan maaddidosona. (1 Xim. 5:4) Nuuni haahuwan deꞌiiddi koshshiyaban eta maaddanawu nuussi danddayettida ubbabaa oottikkonne, hegaappe aaruwan maaddanawu koyiyo gishshawu issi issitoo azzanoos.

An-Katirino: Nuuni 1983n Zayiren haggaaziyo wode kolleeray tana keehi sakkiis. Dottoree Matisawu, “O ekkada hachchi ha biittaappe kiya!” yaagiis. Yaatin wonttetta gallassi iqaa caaniya horoophphiliyan Siwidine biida.

Matisa: Nuuni hegaappe simmin misoone gididi haggaazana danddayokko giidi qoppido gishshawu yeekkida. Shin dottoree An-Katirina paxukku gi qoppikkonne A paxaasu. Nuuni daro takkennan, Zayire simmida; yaatidi Lubumbashi giyo Siwahiletto doonaa goꞌettiya guutta galchchan haggaazida.

An-Katirino: Nuuni Lubumbashen deꞌiyo wode taani boshettaas. Nuuni naꞌa yelanawu qoppibeennabaa gidikkonne, taani boshettidoogan keehi kayyottaas. Shin nuuni kayyottido he wodiyan Yihoowi nu qoppibeenna imotaa nuussi immiis. Awudeegaappekka aaruwan daro xinaateta xannaꞌissiyogaa doommida. Issi laytta gidenna wodiyan galchchan aassiyageetu qooday 35ppe 70 dicciis; qassi shiiqota shiiqiya asaa qooday 40ppe 220 gidiis. Nuuni minnidi haggaazido gishshawu Yihoowi nu baaxiya anjjiis; qassi hegee taani minettanaadan maaddiis. Nu naꞌaabaa nuuni ubbatoo qoppoosinne haasayoos. Qassi Yihoowi gannatiyan nu azzanuwa muleera xayssana wodiya yeemuwan naagoos.

Matisa: Issi wode, An-Katirina keehi daafuraasunne wolqqa xayaasu. He wode tanakka maracciya kansseree sakkiyogaa eraas; yaatin shuhettana koshshiis. Shin haꞌꞌi taani paxaas; qassi An-Katirina Yihoowawu haggaazanawu baassi danddayettida ubbabaa oottaydda deꞌawusu.

Dumma dumma metuwa gencciyay nu xalaala gidennaagaa akeekida. Ruwanddan 1994n issi zaree hara zariya butti simmin, betetu kambbiyan deꞌiya daro ishanttanne michchontta xomoosida. Eta ammanuwa, eta genccaanne eti imattaa mokkiyageeta gidiyogaa nuuni beꞌido wode, Yihoowi ba asaa gakkiya ay metuwanne genccanawu wolqqaa immiyogaa akeekida.—Maz. 55:22.

An-Katirino: Uganddan 2007n macara biiroy anjjettiyo shiiquwa shiiqanawu biido wode nuna hara metoy gakkiis. He prograamiyappe simmin 25 gidiya misoonetinne Beeteele keettaa asay Keeniya waanna katama Nayroobe biiddi deꞌoos. Nuuni Keeniya zawa gakkana hanishin sinttaara yiya issi gita kaamee qoppennan nu kaamiya doommꞌiis. Kaamiya laggiyageenne ichchashu nu ishanttinne michchontti sohuwara hayqqidosona; qassi issi michchiya hosppitaaliya gelada guyyeppe hayqqaasu. Nuuni he ishanttanne michchontta zaarettidi beꞌanawu yeemuwan naagoos!—Iyy. 14:13-15.

Ta bollay qohettidaagee guyyeppe paxiis. Shin Matisinne taani qassi amarida harati he kaamiya daafaappe denddidaagan ubbatoo unꞌꞌettoos. Taani unꞌꞌettiyogee wozanaa sahuwadan tana qammi xiskkuwappe denttees. Hegee yashshiyabaa. Shin nuuni ubbatoo minttidi woossiyogee, nuuni dosiyo xiqisetuppe amaridaageeta nabbabiyogeenne hegeeta wotti dentti qoppiyogee woppu gaanaadan maaddiis. Unꞌꞌettiyageeta akkamiya gooba dottoretukko biidoogeekka nuna keehi maaddiis. Haꞌꞌi unꞌꞌettiyogaa aggida; qassi keehi unꞌꞌettiya harata minttettanawu Yihoowi nuna maaddanaadan woossoos.

Inttena gakkida metota intte waati genccidaakko odido wode, Yihoowi inttena “phuuphulledan” oyqqidoogaa yootideta. Hegee woygiyogee?

Matisa: “Nuna phuuphulledan oyqqiis” giyogee Siwahilettuwappe yiis. Issi uri phuuphullee meqqennaadan naagettidi oyqqiyogaadan, nuuyyo imettida ubba aawatettaa poliyo wode Yihoowi nuna siiquwan maaddiis. Nuuni nuuyyo koshshiyabaa ubbatoo demmoos, ubba koshshiyabaappe aarobaa demmoos. Yihoowi nuna siiqiyogaanne nuna maaddiyogaa bessido issi ogee Oosuwa Kaalettiya Citaa baggaara nuuyyo qarettiyogaana.

An-Katirino: Yihoowi siiquwan nuna maaddido issi hanotaa yootanawu koyays. Issi galla Siwidinen deꞌiya ta aaway keehi harggidi hosppitaaliya gelidoogaa silkkiya dawalidi tawu yootidosona. Matisi shekkeeriya harggiyappe loytti paaxiichchibeenna. Soo baanawu horophiliya tikeetiya shammiyo miishshay nuussi baawa. Yaaniyo gishshawu, nu kaamiya bayzzanawu kuuyida. Shin hegaappe simmin nuuyyo naaꞌꞌu silkkee dawalettiis; issuwa dawaliday nu hanotaa siyida issi azinaanne machchiyo; eti yaa biyo tiikeetiya nuussi shammanawu qoppidoogaa yootidosona. Silkkiya dawalida haranniya amarida miishshaa saaxiniyan dagayida cima michchiyo; A he saaxiniya bolli “Maadoy koshshiyo urawu” gaada xaafa wottaasu. Amarida daqiiqa giddon nuussi koshshida tiikeetiya shammanaadan Yihoowi nuna maaddiis!—Ibr. 13:6.

Intte 50 layttawu ubba wode haggaazuwa haggaazidoogaa loytti qoppiyo wode, ay tamaaridetii?

An-Katirino: ‘Woppu giyogeenne ammanettiyogee’ nuussi wolqqa gidiyogaa taani tamaaraas. Nuuni Yihoowan ammanettiyo wode I nu gishshawu olettees. (Isi. 30:15; 2 Odi. 20:15, 17) Nuussi imettida aawatettan Yihoowawu haggaazanawu nuussi danddayettida ubbabaa oottiyogan hara ay ogiyankka demmana danddayenna daro anjjota demmida.

Matisa: Taani tamaarido waannabay ayba hanotatunkka Yihoowan ammanettiyogaanne I ta gishshawu issibaa waati oottiyakko beꞌiyogaa. (Maz. 37:5) I qaalaa gelidoogaadan ubbatoo tana maaddiis. Qassi haꞌꞌi Miyanmare Beeteelen nuussi imettida oosuwa oottiyo wodekka Yihoowi nuna maaddiyogaa beꞌiiddi deꞌoos.

Bantta haggaazuwa aassanawu koyiya daro yelagatuyyo Yihoowi nuussi bessido aggenna siiquwa etawukka bessanaagaa ammanettoos. Qassi eti eeno giikko, laamiya meezetanaadaaninne maddabettido awaaninne ufayttanaadan Yihoowi eta maaddanaagaa ammanettoos.