Wolqqaama Diꞌuwa—Geeshsha Maxaafay Woygii?

Kumetta saꞌan, wolqqaama diꞌoy daro asaa qohiiddi deꞌees. Ha irpportteta beꞌa:

• “Amarida gallassaappe kase, Chaynaa waanna kataman, 744.8 miili metire gidiya iray Qeeraappe Oruwa gakkanawu bukkiis; 140 layttaa giddon hegaa mala wolqqaama iray bukki erenna.”—AP Oduwa, Naase 2, 2023.

• “Hamuusa gallassay, Kanun giyo wolqqaama gotee tohossa Jaappaanen iray soosidi bukkanaadaaninne yashshiya carkkoy carkkanaadan oottido naaꞌꞌantto gallassa; hegaappe denddidaagan guuxxiis giishin naaꞌꞌu asay hayqqiis. . . . Gotee, deretiya giddo Taywaanen, 0.6 metire gakkanawu wolqqaama iray bukkanaadan oottana danddayees geetettidi qofettees.”—Dochche Velle, Naase 3, 2023.

• “Aadhdhida Qeeraanne Woggaa, [Nova Iskoshiya biittan] diꞌoy diꞌanaadan oottida wolqqaama iray bukkidi, Kanaadan, Atilanttike ano abbaa doonan deꞌiya heerata keehi qohiis; 50 layttaa giddon hegaa mala iray bukki erenna.”—BBC Oduwa, Isiine 24, 2023.

Hegaa mala hanotatubaa Geeshsha Maxaafay woygii?

‘Wurssetta gallassatuyyo’ malaata

Geeshsha Maxaafay nuuni deꞌiyoy ‘wurssetta gallassatuuna’ gidiyogaa qonccissees. (2 Ximootiyoosa 3:1) Nuuni ‘yashshiyabata’ woy shabbirssiyabata beꞌanaagaa Yesuusi kasetidi yootiis. (Luqaasa 21:11) Carkkuwa hanotaa laamee carkkuwa hanotay ubbatoo kaseegaappe yaa iiti iiti baanaadaaninne qoppennan wolqqaama qohoy gakkanaadan oottiiddi deꞌees.

Hidootay deꞌanaadan oottiyabaa

Ha wodiyan saꞌan polettiiddi deꞌiya yashshiya darobay nuussi hidootay deꞌanaadan oottiyaba gidiyogaa Geeshsha Maxaafay yootees. Aybissi? Yesuusi hagaadan giis: “Intte hegee haniyoogaa be7iyo wode, Xoossaa kawotettai gakkana matattidoogaa erana.”—Luqaasa 21:31; Maatiyosa 24:3.

Ha wodiyan haniyabay, Xoossaa Kawotettay haattaara gayttidabaa gujjin, saꞌan deꞌiya mereta ubbaa mata wode giiga oottanaagaa bessees.—Iyyooba 36:27, 28; Mazamure 107:29.

Xoossaa Kawotettay saꞌaa giiga soho oottanay ayba ogiyanakko gujjada eranawu, “Ha Saꞌaa Ashshanay Oonee?” giya huuphe yohuwa nabbaba.