Kumetta Saꞌan 2023 Hombbiya Aginatun Hoꞌoy Keehi Gujjiis—Geeshsha Maxaafay Woygii?

Kumetta saꞌan deꞌiya asay awudeegaappenne aadhdhiya wolqqaama hombbiyanne hegaa mala iita carkkuwa hanotaa gencciiddi deꞌees. Kaallidi deꞌiya irpportteta akeeka:

• “Kumetta saꞌaa hombbiya yesuwa xaafi oyqqiyogee doomettoosappe 174 layttaappe simmin, ha Tammiya aginay awudeegaappenne aadhdhidi hombbiyagaa gidiis.”—Nashinal Oshenik end Atmosperik Administreshin, U.S. Dipartment of Komers, Isiine 13, 2023.

• “Sisilenne Sardiniya haruurotun hoꞌuwa yesoy gujjidi 48°C [118°F] gakkana danddayiyogee Xaaliyan, Isppeenen, Paranssaayeeninne Poolandden hombbee keehi gujjanaadan oottana danddayees – geella hegee Awurooppan awudeegaappenne aadhdhiya hombbe gidana.”—Iirooppiyan Ispes Ejensiy, Isiine 13, 2023.

• “Ha saꞌay keehi hombbiyo wode wolqqaama iray darotoo bukkees, hegee qassi wolqqaama diꞌuwa kaalettees.”—Istefan Ulanbruka, Alamiya Carkkuwabaa Xannaꞌiya Dirijjitiyan haydrolojiyara, haattaaranne shachchaara gayttidabaa dayrekteriya, Isiine 17, 2023.

Hombbee hegaadan gujjiyogaa siyiyogee nena qofissii? Ha keehi koshshiyabaa xeelliyagan Geeshsha Maxaafay woygiyakko beꞌa.

Hombbee keehi gujjiyogee Geeshsha Maxaafaa hiraagay polettanaadan oottii?

Ee. Kumetta saꞌan hombbee wolqqaamiyogeenne hegaa mala iita carkkuwa hanotay deꞌiyogee Geeshsha Maxaafay nu wodiyabaa kasetidi yootidobaara maayettees. Leemisuwawu, nuuni “yashshiyabata,” woy “daganttiyabatanne shabbirssiyabata” beꞌanaagaa Yesuusi kasetidi yootiis. (Luqaasa 21:11; Gud Niwus Transleshin) Kumetta saꞌan hombbee gujjiyogee, daroti asay ha saꞌaa xayssana giidi yayyanaadan oottiis.

Ha saꞌay xayanee?

Chii. Nuuni merinawu deꞌiyo soho gidanaadan Xoossay ha saꞌaa medhdhiis; I asay saꞌaa xayssanaadan eeno geenna. (Mazamure 115:16; Eranchchaa 1:4) Ubba, I ‘saꞌaa xayssiyageeta xayssanawu’ qaalaa geliis.—Ajjuutaa 11:18.

Geeshsha Maxaafay Xoossay ha saꞌaa qohuwappe naagana danddayiyogaanne naaganaagaa qonccissees.

• “[Xoossay] gotiyaa co77u oottiis; abbaa dambbalaakka sirphphi oottiis.” (Mazamure 107:29) Merettidabata haariyo wolqqay Xoossawu deꞌees. Ha wodiyan asay wolqqaama hombbiyan waayettanaadan oottiya iita carkkuwa hanotaa gaasuwan gakkiya metuwa I xayssana.

• “Neeni biittaa naagada haattaa ushshaasa; yaatada daro dureyaasa.” (Mazamure 65:9) Xoossay anjjin, ha saꞌay gannate gidana.

Saꞌay zaarettidi giiga soho gidanaagaa xeelliyagan Geeshsha Maxaafan deꞌiya hidootaabaa gujjada eranawu, “Ha Saꞌaa Ashshanay Oonee?” giya huuphe yohuwa xeella.