Kumetta Saꞌan Carkkoy Wolqqaama Hanotan Suullidoogee Oduwan Odettiis—Geeshsha Maxaafay Woygii?

Kumetta saꞌan carkkoy keehi suullidoogee Isiine 2022n oduwan kiyiis:

• “CHayna biittan deꞌiya 70 katamatun carkkoy wolqqaama hanotan suullanaagee odettiis. Qassi asay naagettana mala kawotettaa sunttati ha aginan naaꞌꞌanttuwaa hegaa yootidosona.”—Isiine 25, 2022, CNN Wayer Servis.

• “Kumetta Awurooppan kaseegaappe dumma hanotan carkkoy keehi suullido gishshawu daro biittan woraa tamay dariis.”—Isiine 17, 2022, Ze Gardiyan.

• “Woggaa gallassi Amarkkan daro katamatun carkkoy dumma hanotan keehi suulliis. Qassi suuloy Arshsho abbaa doonaa heerata gujjin Tohossaaninne giddo Arggo baggan keehi daridoogee odettiis.”—Isiine 24, 2022, Ze Niwu York Taymis.

Ha ubbabay ay bessii? Amarida wodeppe simmin saꞌan deꞌanawu danddayettenna giyoogee? Geeshsha Maxaafay woygii?

Carkkoy suullanaagee Geeshsha Maxaafan odettidee?

Ee. Kumetta saꞌan carkkoy suulliyoogee nu wodiyaa xeelliyaagan Geeshsha Maxaafay yootiyoobaara maayettees. Leemisuwawu, “yashissiyaabainne gita malaatai” hananaagaa Yesuusi hiraagiis. (Luqaasa 21:11) Kumetta saꞌan carkkoy keehi suulliyoogee asay oottiyoobaa gaasuwan sinttappe saꞌay deꞌanawu danddayenna soho gidana giidi daro asay hirgganaadan oottiis.

Saꞌay asay deꞌenna soho gidanee?

Akkay. Xoossay saꞌaa medhdhidoy merinawu asay deꞌiyo soho gidanaadaana. (Mazamure 115:16; Eranchchaa 1:4) I saꞌaa asay xayssanaadan paqqadenna. Yaatiyoogaappe ‘sa7aa xaissiyaageeta’ xayssanawu qaalaa geliis.—Ajjuutaa 11:18.

Xoossay qaalaa gelido naaꞌꞌu hiraagata ane beꞌa:

• “Bazzoinne mela biittai ufaittana; bazzoi ufaissaa poocu giiddi, ciishshaa ciyyana.” (Isiyaasa 35:1) Xoossay saꞌay aybinne baynna bazzo gidanaadan paqqadenna. Qassi I saꞌan moorettida baggaa giigissana.

• “Neeni biittaa naagada haattaa ushshaasa; yaatada daro dureyaasa. Asaayyo kattai mokkana mala, Xoossaa shaafai haattai kumidoogaa; hegaadan oottada neeni giigissadasa.” (Mazamure 65:9) Xoossay saꞌay gannate gidanaadan oottana.

Carkkoy laamettiyo hanotaa xeelliyaagan Geeshsha Maxaafaa hiraagaabaa gujjada eranawu, “Carkkuwaa Hanotay Laamettiyoogee Nuna Xayssanee?—Geeshsha Maxaafay Woygii?” giya huuphe yohuwaa nabbaba.

Saꞌay ooraxxanaagaa xeelliyaagan odettida hiraagaabaa gujjada eranawu, “Saꞌaa Ashshanay Oonee?” giya huuphe yohuwaa nabbaba.