Asay Sarotettaa Ehaana Danddayibeennay Aybissee?—Geeshsha Maxaafay Woygii?

Alamiyan haariyageetinne kumetta saꞌan deꞌiya dirijjiteti sarotettaa ehaana danddayibookkona. Ha wodiyan olay awudeegaappenne aaruwan keehi dariis; Naaꞌꞌantto Alamiya Olaappe simmin hagaa keena dari erenna. Alamiya asaa qoodaappe oyddantto kushee, hegeekka naaꞌꞌu biiloone gidiya asay olan qohettida heeran deꞌees.

Asay sarotettay deꞌanaadan oottana danddayibeennay aybissee? Geeshsha Maxaafay woygii?

Asay sarotettaa ehaana danddayennay aybissakko bessiya heezzu gaasota

1. 1. Asawu deꞌiya eeshshati eti sarotettaa medhdhanawu baaxetennaadan oottoosona. Geeshsha Maxaafay ha wodiyan deꞌiya “asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, . . . geeshshatetti bainnaageeta, . . . sigettennaageeta, . . . banttana naagennaageeta, kehennaageeta, . . . eesotiyaageeta, [qassi] otoruwan sugettiyaageeta” gidanaagaa yootees.—2 Ximootiyoosa 3:2-4.

2. 2. Asay barkka gidin woy haratuura issippe gidin, eta Medhdhida Xoossaa Yihoowaya maaddennan bantta metuwa qaarana danddayokkona. Geeshsha Maxaafay asi “ba hemetaa suurissanaagee aawu shene gidennaagaa” yootees.—Ermmaasa 10:23.

3. 3. Wolqqaamanne iita gidida, ‘saꞌa ubbaa balettiya’ Seexaanaa Dabloosi ha alamiya haarees. (Ajjuutaa 12:9) “Ha mule sa7aikka xalahe halaqan [haarettido]” keenan olaynne makkalay deꞌana.—1 Yohaannisa 5:19.

Sarotettaa ehaana danddayiyay oonee?

Sarotettay deꞌanay asay baaxetiyogaana gidennan, Xoossay sarotettaa ehiyogaana gidiyogaa Geeshsha Maxaafay yootees.

• “Taani intteyyo halchchiyo halchchuwaa taani GODAI erais; hegeenne, intteyyo sintta wodiyaanne ufaissaa immana mala, saro halchchoppe attin, iita halchcho gidenna.”—Ermmaasa 29:11.

Xoossay he gelido qaalaa waati polanee? “Sarotettaa Xoossai Seexaanaa . . . gaacci qolana.” (Roome 16:20) Geeshsha Maxaafay “Xoossaa Kawotettaa” giyo saluwa kawotettaa baggaara Xoossay kumetta saꞌan sarotettay deꞌanaadan oottana. (Luqaasa 4:43) He Kawotettaa Kawuwa Yesuus Kiristtoosa haaruwan, asay sarotettan waani deꞌanaakko tamaarana.—Isiyaasa 9:6, 7.

• Gujjada eranawu, “Xoossaa Kawotettay Sinttappe Ay Oottanee?” giya huuphe yohuwa nabbaba.