Saꞌan Sarotettay Mule Xayidoy Aybissee?

Geeshsha Maxaafay yootiyoobaa

Asay kumetta saꞌan sarotettaa ehaanawu keehi baaxettikkonne ehaana danddayibeenna, qassi sinttappekka hegaadan oottennaadan diggiya daro gaasoti deꞌoosona:

• “Ba hemetaa suurissanaagee aawu shene [gidenna].” (Ermmaasa 10:23) Bana barkka haaranawu wolqqay woy maatay asawu deꞌenna, hegaa gishshawu asay sarotettaa ehaana danddayenna.

• “Asi ashshanau danddayenna gishshau, asaa halaqatun ammanettoppite. Eta [ayyaanay, NW] kiyiyo wode, eti biittau simmoosona; eta halchchoi ubbai he gallassikka atti aggees.” (Mazamure 146:3, 4) Loytti haarana danddayiya kawotikka, olawu waanna gaaso gididabata muleera xayssana danddayokkona.

• “Wurssetta gallassi waissiya wodee yaanaagaa akeeka. Aissi giikko, asati . . . kehennaageeta, lo77obaa dosennaageeta, kashi erikke giyaageeta, eesotiyaageeta, otoruwan sugettiyaageeta . . . gidana.” (2 Ximootiyoosa 3:1-4) Nuuni deꞌiyoy ha alamee xayanawu matido ‘wurssetta wodiyaana’ gidiyo gishshawu, sarotettay xayanaadan oottiya eeshshati asawu deꞌoosona.

• “Sa7aunne abbau aayye7ana! Aissi giikko, xalahe halaqai baayyo guutta wodee attidoogaa eriyo gishshau, wolqqaama hanqquwaara duge inttekko wodhdhiis.” (Ajjuutaa 12:12) Xoossaa morkkee Dabloosi saꞌan makkalay daranaadan oottiis, qassi aagaadan makkalanchcha gidanaadan asaa denttettees. I ‘ha saꞌaa haariyo’ wode ubban, nuuni mule sarotettan deꞌana danddayokko.—Yohaannisa 12:31.

• “[Xoossaa Kawotettay Xoossaa eqettiya] he kawotettata ubbaa gaaceretti xaissana; shin i merinau eqqidi daana.” (Daaneela 2:44) Xoossaa Kawotettay saꞌan merinawu sarotettay deꞌanaadan oottiyoogan nuuni koyiyoobaa polana; ay asa kawotettikka hegaadan oottana danddayenna.—Mazamure 145:16.