Yihoowa Markkati Bantta Biittaa Siiqiyoogaa Bessiya Dumma Dummabata Oottennay Aybissee?

Yihoowa Markkati kawotettaanne issi biittaa malaataa bonchchoosona. Hara asay ba biittawu ammanettanawu caaqqana, banddiraa siraataa bonchchana woy banddiraa mazamuriyaa yexxanawu doorana danddayiyoogaa nuuni eroos.

Gidikkokka, nuuni Yihoowa Markkati hegeeti Geeshsha Maxaafay yootiyoobaara maayettennaagaa eriyo gishshawu, hegaa malabata oottokko. Nuuni haratuugaa bonchchiyoogaadan, haratikka nu ammaniyoobaa bonchchiyo wode ufayttoos.

Ha huuphe yohuwan

• Hegaara gayttidaagan Geeshsha Maxaafay yootiyo maarati awugeetee?

• Nuuni nu biittaa siiqiyoogaa bessiyaabata oottanaadan wolqqanttiya higgee kiyikko shin?

• Yihoowa Markkati deretettan woy polotikan laamiyaa ehaanawu baaxetiyoonaa?

Hegaara gayttidaagan Geeshsha Maxaafay yootiyo maarati awugeetee?

Nuuni hegaadan kuuyanaadan maaddida, Geeshsha Maxaafay yootiyo naaꞌꞌu waannabati kaallidi deꞌoosona:

• Nuuni goynnana bessiyoy Xoossaa xallaassa. Geeshsha Maxaafay hagaadan gees: “Godau, ne Xoossau goinna; a xalaalau ootta.” (Luqaasa 4:8) Issi uri ba biittawu ammanettanawu caaqqiyoobatun, woy banddiraa mazamuretun darotoo hara aybippenne aattidi bantta biittaa siiqanawu qaalaa geliyoobati deꞌoosona. Yaatiyo gishshawu, Yihoowa Markkati hegaa malabata oottiyoogaa likke gidennabadan qoppoosona.

  Hegaadankka, banddiraa mazamuriyaa yexxiyoogaa Yihoowa Markkati goynodan, woy eeqa goynodan xeelloosona. Eeqawu goynniyoogaa Geeshsha Maxaafay diggees. (1 Qoronttoosa 10:14) Issi issi taarikiya eranchchati, issi biittaa banddiray haymaanootiyaa malaata gidana danddayiyoogaa yootidosona. Taarikiya xaafiya Karliten Hayzi, “Issi biittaa siiqiyoogee ammano mala; he ammanuwawu malaataynne ammaniyoobay banddiraa” giidi xaafiis.a Beni Kiristtaaneta xeelliyaagan, xaafee Daniꞌel P. Manniksi hagaadan giis: “Kiristtaaneti . . . [Rooma] kawota naagiya ayyaanawu yarshshanawu koyibookkona. Hegee ha wodiyan banddiraa siraataa bonchchennan ixxiyoogaa mala.”b

  Nuuni Yihoowa Markkati banddiraa siraataa bonchchennaba gidikkonne, banddiraa moorokko, xuuggokko, qassi banddiraa woy issi biittaa malaata gidida hara aybanne bonchchennaagaa bessiyaabaa oottokko.

• Asay ubbay Xoossaa sinttan issi lagge. (Oosuwaa 10:34, 35) “Xoossai asa zare ubbaa issi uraappe” medhdhidoogaa Geeshsha Maxaafay yootees. (Oosuwaa 17:26) Hegaa gishshawu, issi zariyaa woy issi biittaa asaa haraappe xoqqu ootti xeelliyoogee bala gidiyoogaa Yihoowa Markkati ammanoosona. Awa biittaappe yiidaageeta, woy awan deꞌiyaageeta gidikkonne nuuni asa ubbaa bonchchoos.—1 PHeexiroosa 2:17.

Nuuni nu biittaa siiqiyoogaa bessiyaabata oottanaadan wolqqanttiya higgee kiyikko shin?

Yihoowa Markkati kawotettaa eqettokkona. Kawotettati deꞌanaadan Xoossay paqqadidoogaa ammanoos. (Roome 13:1-7) Kiristtaaneti aawatettay deꞌiyoogeetussi azazettana bessiyoogaakka ammanoos.—Luqaasa 20:25.

Kawoy kessido higgee Xoossaa higgiyaara maayettennaba gidikko shin? Issi issi hanotatun, kawotettati kessido higgetun amaridabata giigissanaadan oychchana danddayoos.c SHin, higgiyaara gayttidaagan aybinne laamettana xayikko, Yihoowa Markkati “asau azazettanaappe Xoossau azazettanau” koyoosona.—Oosuwaa 5:29.

Yihoowa Markkati deretettan woy polotikan laamiyaa ehaanawu baaxetiyoonaa?

CHii. Yihoowa Markkati deretettan woy polotikaaban ooyyoonne exatokkona. Nuuni issi biittawu ammanettanawu caaqqana, banddiraa siraataa bonchchana woy banddiraa mazamuriyaa yexxana koyennay, polotikaaban laamiyaa ehaanawu baaxetiya citan nuuni deꞌiyo gishshataassa gidenna. SHin, hegeeta xeelliyaagan Geeshsha Maxaafay yootiyoobawu azazettanawu koyiyo gishshawu hegaa malabata oottokko.