Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati neeni loꞌꞌo ogiyan Geeshsha Maxaafay tamaarissiyoobaa eranaadan shoobboosona. Nuuni Geeshsha Maxaafaa xannaꞌissiyo prograamee kaallidi deꞌiya ogetun nena maaddana danddayees:
Ufayssiya deꞌuwaa deꞌanaadan
Xoossaa dabbo gidanaadan
Geeshsha Maxaafay sinttanaabaa yootiyoobaa eranaadan
Ha sinttan
Waati xannaꞌiyaakko koyrottada issitoo malana danddayiyaanaa?
Ta xannaꞌiyo wode issippe xannaꞌanaadan harata shoobbana danddayiyaanaa?
Geeshsha Maxaafaa issi uraara xannaꞌiyoogaappe hara xannaꞌissiyo ogee deꞌii?
Geeshsha Maxaafaa Waati Xannaꞌiyoo?
Geeshsha Maxaafaappe issi issi huuphe yohuwaa eranaadan issi uri nena maaddana. Issippe tobbiyoogan Geeshsha Maxaafaa xannaꞌanawu maaddiya Merinawu Ufayttada Deꞌa! giyo xuufiyaa goꞌettiyoogan, Geeshsha Maxaafay yootiyoobaanne hegee nena waati maaddana danddayiyaakko wodiyaappe wodiyan neeni tamaarana. Gujjada eranawu, ha biiduwaa beꞌa.
Taani xannaꞌanawu miishshaa qanxxana koshshii?
CHii. Yesuusi ba erissiyo ashkkaratussi, “Intte coo ekkideta; coo immite” giido kaaletuwaa Yihoowa Markkati kaalloosona. (Maatiyoosa 10:8) Hegaa bollikka, Geeshsha Maxaafaanne Merinawu Ufayttada Deꞌa! giyo xuufiyaa gujjin, xannaꞌanawu goꞌettiyoobatussi miishsha qanxxakka.
Xinaatee ay keena wodiyan wurii?
Kumetta xinaatiyan 60 timirtteti deꞌoosona. He timirtteta ay keena wodiyan wurssanaakko kuuyiyay nena, shin daroti saaminttan issi timirttiyaa woy hegaappe daruwaa xannaꞌoosona.
Taani waata doommanee?
1. Intternneetiyan qitsiyaa kuntta. Neeni nebaa kunttidobaa, Yihoowa Markkatuppe issoy yiidi nena oychchanaadan hanotaa giigissana xallawu goꞌettoos.
2. Xannaꞌissiya uri nenaara gayttana. Nena xannaꞌissiyaagee neeni Geeshsha Maxaafaappe ay tamaaranaakko qonccissana, qassi ne oychchiyo oysha ubbaa zaarana.
3. Neeninne nena xannaꞌissiyaagee awude, qassi waati xannaꞌanaakko hanotaa giigisseeta. Intte issisan gayttidi woy silkkiyan, biiduwan, dabddaabbiyan woy iimeeliyan xannaꞌana danddayeeta. Xinaatee darotoo issi saate ekkees, shin ne hanotaadan hegaappe guuxxana woy darana danddayees.
Waati xannaꞌiyaakko koyrottada issitoo malana danddayiyaanaa?
Ee. Yaatanawu, intternneetiyan qitsiyaa kuntta. Xannaꞌissiya uri nenaara gayttiyo wode, neeni hegaa dosanaakkonne mala beꞌanawu koyiyoogaa he urawu yoota. Neeni he xinaatiyaa dosanaakkonne mala beꞌanaadan maaddanawu, he uri heezzu timirttee deꞌiyo Merinawu Ufayttada Deꞌa! giyo brooshuriyaa goꞌettana.
Taani Geeshsha Maxaafaa xannaꞌanawu maayettikko, tana xannaꞌissiyaagee taani Yihoowa Markka gidanaadan wolqqanttanee?
CHii. Nuuni Yihoowa Markkati asaa Geeshsha Maxaafaa tamaarissiyoogaa dosoos, shin nu haymaanootiyaa kaallanaadan oonanne wolqqanttokko. Ubba asawu ba ammaniyoobaa dooriyo maatay deꞌiyoogaa akeekidi, Geeshsha Maxaafay yootiyoobaa bonchchuwan tamaarissoos.—1 PHeexiroosa 3:15.
Ta Geeshsha Maxaafaa goꞌettana danddayiyaanaa?
Ee, ne koyiyo Geeshsha Maxaafaa birshshettaa awugaakka goꞌettana danddayaasa. Nuuni akeekanawu metennanne likke gidida Ooratta Alamiyaa Birshshettaa goꞌettikkokka, daroti bantta meezetido Geeshsha Maxaafaa birshshettaa goꞌettanawu dosiyoogaa akeekoos.
Ta xannaꞌiyo wode issippe xannaꞌanaadan harata shoobbana danddayiyaanaa?
Ee. Ne so asa ubbaa woy ne laggetuppe oonanne shoobbana danddayaasa.
Taani kase Yihoowa Markkatuura Geeshsha Maxaafaa xannaꞌidaba gidikko shin? Zaarettada xannaꞌana koshshii?
Ee. Nuuni xannaꞌissiyo ogee ha wodiyan deꞌiya asaa maaddiya hanotan giigido gishshawu, haꞌꞌi nuuni xannaꞌissiyo ogiyaa kaseegaappe aaruwan dosana danddayaasa. Haꞌꞌi Geeshsha Maxaafaa xinaatiyan kaseegaappe aaruwan beꞌiyoobatinne issippe tobbiyoobati deꞌoosona.
Geeshsha Maxaafaa issi uraara xannaꞌiyoogaappe hara xannaꞌissiyo ogee deꞌii?
Ee. Daroti issi uraara xannaꞌiyoogan loytti akeekiyaaba gidikkokka, issoti issoti koyro banttarkka xannaꞌanawu koyoosona. Geeshsha Maxaafaa Xannaꞌanawu Maaddiya Miishshati deꞌiyo sinttan, neeni xannaꞌanawu maaddana danddayiyaabata miishsha qanxxennan demmana danddayaasa. Kaallidi deꞌiyaabati nena maaddana danddayoosona:
Biidota. Ha qantta biidoti Geeshsha Maxaafaa timirtteta qonccissoosona.
Geeshsha Maxaafaabaa Oychchiyoobatu Zaaruwaa. Ha huuphe yohoti Geeshsha Maxaafaappe oychchiyo daro oyshata zaaroosona.
Geeshsha Maxaafaa Xiqisetu Qonccissuwaa. Daro asay eriyo Geeshsha Maxaafaa xiqisetunne qofatu birshshettaa akeeka.