Xoossaa Kawotettay Ne Wozanan Deꞌiyaabee?
Geeshsha Maxaafay yootiyoobaa
Akkay, Xoossaa Kawotettay Kiristtaanetu wozanan deꞌiyaaba gidenna.a Geeshsha Maxaafay ‘saluwaa kawotettaa’ giidi yootiyoogan, he kawotettay deꞌiyo sohuwaa qonccissees. (Maatiyoosa 4:17) He Kawotettay saluwan haariya tumuppe deꞌiya ayso gidiyoogaa Geeshsha Maxaafay waati qonccissiyaakko akeeka.
Xoossaa Kawotettan haariyaageeti, haarettiyaageetinne higgeti deꞌoosona, qassi Xoossaa shenee saluwaaninne saꞌan hananaadan oottiyo maataykka deꞌees.—Maatiyoosa 6:10; Ajjuutaa 5:10.
Xoossaa Kawottettay saꞌan deꞌiya ‘asa ubbaa, kawotettata ubbaanne dumma dumma qaalan haasayiya zareta ubbaa’ haarana. (Daaneela 7:13, 14) He Kawotettan haariyaageetuyyo maataa immidaagee Xoossaa.—Mazamure 2:4-6; Isiyaasa 9:7.
Yesuusi, bana kaalliya ammanettidaageeti banaara issippe ‘araatatun uttanaagaa’ yootiis.—Luqaasa 22:28, 30.
Xoossaa Kawotettawu morkketi deꞌoosona; he Kawotettay eta ubbaa xayssana.—Mazamure 2:1, 2, 8, 9; 110:1, 2; 1 Qoronttoosa 15:25, 26.
Xoossaa Kawotettay, asay Xoossawu azazettiyo wode eta wozanan deꞌiyaaba giidi issooti issooti qoppikkonne, Geeshsha Maxaafay hegaadan tamaarissenna. SHin, Geeshsha Maxaafay ‘Kawotettaa qaalay’ woy ‘kawotettaa wonggeliyaa mishiraachchoy’ nu wozanaa denttettana danddayiyoogaanne yaatana koshshiyoogaa yootees.—Maatiyoosa 13:19; 24:14.
“Xoossaa kawotettai intte giddon de7ees” giyoogee woygiyoogee?
Amarida asay Luqaasa 17:21n Kawotettaabaa issi issi Geeshsha Maxaafaa birshshettati yootiyoogaa nabbabiyo wode akeekanawu metootoosona. Leemisuwawu, King Jemis Verzhin “Xoossaa kawotettay intte giddon deꞌees” yaagees. Nuuni ha xiqisiyaa suure akeekanawu yuushuwan deꞌiya qofaa eranawu bessees.
Xoossaa Kawotettay Yesuusa ixxiyaanne woranawu koyiya asatu wozanan deꞌenna
Yesuusi bana ixxiyaanne guyyeppe A worida haymaanootiyaa kaalettiya Parisaawetuyyo hegaa yootiis. (Maatiyoosa 12:14; Luqaasa 17:20) Kawotettay muumida eta wozanan deꞌees giidi qoppiyoogee maaree? Yesuusi eta, “Intteyyo garssa baggaara lo77o milatiya iitatettainne makkalai kumi utiiis” yaagiis.—Maatiyoosa 23:27, 28.
Yesuusi yootido Luqaasa 17:21n deꞌiya qofaa hara birshshettati suure qonccissoosona: “Xoossaa Kawotettay hagan inttenaara deꞌees.” (Geddi oottidi xaafiday nuna; Kontemperari Inglish Verzhin) “Xoossaa Kawotettay inttenaara issippe deꞌees.” (Ooratta Alamiyaa Birshshettaa, tohossa qofaa) Xoossay sunttido Kawoy Yesuusi eta sinttan eqqido gishshawu, saluwaa Kawotettay ‘Parisaawetuura’ woy ‘etaara issippe’ deꞌees.—Luqaasa 1:32, 33.
a Daro woosa keettati Xoossaa Kawotettay issi ura giddon woy A wozanan deꞌiyaaba giidi tamaarissoosona. Leemisuwawu, Zi Kaatolik Insaykiloppiidee, Xoossaa Kawotettay “issi ura wozanaaninne A deꞌuwan Xoossay haariyoogaa” bessiyaaba gidiyoogaa yootees. Hegaadankka, PHaaphaasiyaa Benedikt 16ttay, Jises of Naziret giyo ba maxaafan, “nuuni nu wozanan Xoossay yootiyoobaa siyiyo wode Xoossaa Kawotettay” yiyoogaa yootiis.