Kumetta Saꞌan Aappun Yihoowa Markkati Deꞌiyonaa?

Yihoowa Markkatu qooday aappunakko waati ereetii?

Aginan aginan Kawotettaa Mishiraachchuwa minnidi yootiyageetu xallaa Yihoowa Markkatudan qoodoos. (Maatiyosa 24:14) Hegeetu giddon, haattan muukettidi Yihoowa Markka gididaageetinne haattan muukettibeennaba gidikkonne mishiraachchuwa yootanawu banttappe koyettiyabaa kunttidaageeti deꞌoosona.

Issi uri Yihoowa Markka gidanawu miishshaa immana koshshii?

Chii. Issi uri Yihoowa Markkatuppe issuwa gidanawu, woy nu dirijjitiyan aawatettaa woykko maataa demmanawu miishshaa immana koshshenna. (Oosuwaa 8:18-20) Ubba asay ba dosan miishshaa immees. Yihoowa Markkati ubbaykka bantta dosan kumetta saꞌan oosettiya oosuwawu bantta wodiya, wolqqaanne aquwa immoosona.—2 Qoronttoosa 9:7

Mishiraachchuwa minnidi yootiyageeti aappunakko waati ereetii?

Aginan aginan, Yihoowa Markkati mishiraachchuwa yootido irpporttiya bantta galchchawu immoosona. He irpporttiya eti bantta dosan immoosona.

Galchchan deꞌiyageetu irpporttee shiiqidi, kumetta qooday macara biiruwawu kiitettees. He macara biiroy qassi he biittan woy moottan deꞌiyageeti kiittido kumetta irpporttiya nu waanna biiruwawu kiittees.

Haggaazo layttaa wurssettan,a he layttan issi biittan deꞌiya Yihoowa Markkatu xoqqa qooday erettees. Ubba biittatu xoqqa qoodaa issippe shiishshin kumetta saꞌan deꞌiya Yihoowa Markkatu qooday erettees. Ubba biittatu gujo irpporttee nu websaytiyan, “Kumetta Saꞌan” giyagaa giddon kiyees. Hegaa mala irpportteti beni Kiristtaaneta minttettidoogaadan, nunakka minttettoosona.—Oosuwaa 2:41; 4:4; 15:3.

Inttenaara issippe shiiqiyaba gidikkonne, mishiraachchuwa yootennaageeta Yihoowa Markkatudan qoodeetii?

Nuuni hegaa mala asata Yihoowa Markkatudan qoodennaba gidikkonne, eti nu shiiqota yiyo wode eta mokki ekkoos. Etappe daroti layttan layttan bonchchiyo Kiristtoosa Hayquwa Hassayiyo Baalan shiiqiyo gishshawu, he shiiquwan beettidaageetu qoodaanne Yihoowa Markkatu qoodaa geeddarssidi he asatu qoodaa erana danddayettees. He baalaa 2023n bonchchanawu 20,461,767 asay shiiqiis.

Nu shiiquwa shiiqenna daroti, miishsha qanxxennan Geeshsha Maxaafaa xannaꞌiyo prograamiyappe goꞌettoosona. Nuuni 2023n, aginan aginan amaakkaayiyan 7,281,212 asaa Geeshsha Maxaafaa xannaꞌissida; issi issitoo darota issippe xannaꞌissoos.

Kawotettati yootiyo Yihoowa Markkatu qooday intte yootiyo qoodaappe dariyoy aybissee?

Darotoo kawotettati asay kaalliyo haymaanootee awugaakko oychchiyogan eta qooday hagaa keena giidi kuuyoosona. Leemisuwawu, Amarkkan Asaa Qoodiya Biiroy, “eti oychchidoogeeti issi haymaanootiya kaalliyabadan yootiyogaa siyiyogan eta qooday aappunakko kuuyiyogaa” yootiis; ubba, he qooday “issi uri qoppiyogaanappe attin tumu kaalliyogaana gidennaagaa” yootiis. Hegaappe dumma ogiyan, nuuni Yihoowa Markka giidi qoodiyogeeti haratussi mishiraachchuwa yootiyageetanne hegaabaa irpportte oottiyageetu xallappe attin, banttana Yihoowa Markka giyageeta gidenna.