Geeshsha Maxaafay Zaarettidi Yelettiyoogaabaa Tamaarissii?
Geeshsha Maxaafay yootiyoobaa
Akkay, tamaarissenna. Geeshsha Maxaafan “zaaretti yelettiyoogaa” giya qaali woy hegaa mala qofay baawa. Ha ammanuwawu baasoy shemppoy hayqqenna giyo timirtte.a SHin Geeshsha Maxaafay issi asi muleera shemppo gidiyoogaanne I hayqqiyoogaa tamaarissees. (Doomettaabaa 2:7; Hizqqeela 18:4) Issi uri hayqqiyo wode deꞌuwan deꞌenna.—Doomettaabaa 3:19; Eranchchaa 9:5, 6.
Zaaretti yelettiyoogaanne dendduwaa giddon deꞌiya dummatettay aybee?
Geeshsha Maxaafay tamaarissiyo dendduwawu baasoy shemppoy hayqqenna giyo qofa gidenna. Dendduwan, hayqqida asay Xoossaa wolqqan zaarettidi paxa gidana. (Maatiyoosa 22:23, 29; Oosuwaa 24:15) Denddoy zaarettidi mule hayqqennaagaa qoppiiddi, ooratta alamiyan deꞌanawu hidootanaadan oottees.—2 PHeexiroosa 3:13; Ajjuutaa 21:3, 4.
Zaaretti yelettiyoogaanne Geeshsha Maxaafay yootiyoobaa xeelliyaagan asay qoppiyo balabaa
Bala qofaa: Geeshsha Maxaafay Eelaasi Xammaqiya Yohaannisa gididi zaaretti yelettidoogaa yootees.
Tumaa: Xoossay, “Taani inttessi hananabaa yootiya Eelaasa kiittana” yaagidi kaseti yootiis; qassi Yesuusi he hiraagay Xammaqiya Yohaannisan polettidoogaa yootiis. (Milkkiyaasa 4:5, 6; Maatiyoosa 11:13, 14) SHin hegee Eelaasi Xammaqiya Yohaannisa gididi zaaretti yelettiis giyoogaa gidenna. Yohaannisi ba huuphe I Eelaasa gidennaagaa yootiis. (Yohaannisa 1:21) SHin Yohaannisi asay ba nagaraappe simmanaadan yootiyoogan, Eelaasaagaa mala oosuwaa oottiis. (1 Kawotu 18:36, 37; Maatiyoosa 3:1) Yohaannisi hananabaa yootiya “Eelaasa ayyaanaaninne wolqqan” oottidoogaakka bessiis.—Luqaasa 1:13-17.
Bala qofaa: Geeshsha Maxaafay zaarettidi yelettiyoogaa “naaꞌꞌantto yelettiyoogaa” gees.
Tumaa: Geeshsha Maxaafay naaꞌꞌantto yelettiyoogee issi asi paxa deꞌiiddi ayyaanaaban zaaretti yelettiyo hanota gidiyoogaa yootees. (Yohaannisa 1:12, 13) Ha naaꞌꞌantto yeletay issi asi kase oottido iitabaa woy loꞌꞌobaa gaasuwan demmiyo attenna deꞌo gidennan, Xoossaa anjjuwan amarida asay sinttappe demmiyo dumma deꞌo.—Yohaannisa 3:3; 1 PHeexiroosa 1:3, 4.
a SHemppoy hayqqennabadan, qassi zaaretti yelettiyaabadan ammaniyoogee beni Baabilooneppe yiidaba gidana danddayees. Guyyeppe Hindde eranchchati Karma giyo timirttiyaa kessin issi ammanoy doomettiis. Britanika Insaykilopidiya of World Rilijins giyo maxaafay Karmi “gaasuwaanne ayfiyaa higge; issi uri haꞌꞌi deꞌuwan oottiyoobay kaalliya deꞌuwan I ay mala gidanaakko bessees.”—Sinttaa 913.