Yesuusi Xoossaa Naꞌaa Geetettiyoy Aybissee?

Geeshsha Maxaafay yootiyoobaa

Geeshsha Maxaafay Yesuusa darotoo “Xoossaa Na7aa” yaagees. (Yohaannisa 1:49) “Xoossaa Na7aa” giya qofay, Xoossay Yesuusa deꞌuwaa gujjin, deꞌo ubbaa Pultto gidiyoogaa bessiyaaba. (Mazamure 36:9; Ajjuutaa 4:11) Geeshsha Maxaafay Xoossay aawa gididoy issi asi naata yeliyoogaa mala geenna.

Geeshsha Maxaafay kiitanchchatakka “Xoossaa naata” yaagees. (Iyyooba 1:6, NW) Geeshsha Maxaafay koyro bitaniyaa, Addaamakka hegaadan “Xoossaa na7aa” yaagees. (Luqaasa 3:38) SHin Yesuusi Xoossay koyro medhdhidoogaa, qassi Xoossay barkka medhdhidoy A xalaalaa gidiyo gishshawu, Geeshsha Maxaafay Yesuusa Xoossawu bayra Naꞌa yaagees.

• Yesuusi saꞌan yelettanaappe kase saluwan deꞌidee?

• Yesuusi saꞌaa yaanaappe kase ay oottidee?

Yesuusi saꞌan yelettanaappe kase saluwan deꞌidee?

Ee. Yesuusi asa gididi saꞌan yelettanaappe kase saluwan ayyaana mereta gididi deꞌiis. Yesuusi, ‘Taani saluwaappe yaas’ yaagiis.—Yohaannisa 6:38; 8:23.

Xoossay hara ubbabaa medhdhanaappe kase Yesuusa medhdhiis. Yesuusa xeelliyaagan Geeshsha Maxaafay hagaadan gees:

• “I merettidabaa ubbaappe . . . baira na7aa.”—Qolasiyaasa 1:15.

• I “Xoossai medhdhidobau [koiro].”—Ajjuutaa 3:14.

“Au denddoi beniisappe doommidi, merinaappe” gidido uraabaa yootiya hiraagay Yesuusan polettiis.—Mikiyaasa 5:2; Maatiyoosa 2:4-6.

Yesuusi saꞌaa yaanaappe kase ay oottidee?

Yesuusi saluwan gita bonchchuwan deꞌiis. Yesuusi, “Aawau, . . . kase ne matan taayyo de7iya bonchchuwan ne sinttan tana bonchcha” yaagidi woossido wode, kase bawu deꞌiya he maataabaa yootiis.—Yohaannisa 17:5.

I ba Aaway ubbabaa medhdhiyo wode maaddiis. Yesuusi “waanna oosanchcha” gididi Xoossaara issippe oottiis. (Leemiso 8:30) Yesuusa xeelliyaagan Geeshsha Maxaafay, “Saluwaaninne sa7an de7iya ubbabaikka aaninne ayyo merettiis” yaagees.—Qolasiyaasa 1:16.

Xoossay hara ubbabaa Yesuusa baggaara medhdhiis. He merettidabati ayyaana meretata ubbaa, qassi saluwaanne saꞌaa. (Ajjuutaa 5:11) Xoossaynne Yesuusi issippe oottiyo hanotay, manddisee gimbbiya uraara issippe oottiyoogaara amaridaban issi mala. Manddisee pilaaniyaa kessin, gimbbiya uray he pilaaniyaa kaallidi keexxees.

I Qaalaa gididi oottiis. Geeshsha Maxaafay Yesuusi asa gidanaappe kase deꞌido deꞌuwaabaa yootiiddi, I ‘Qaalaa’ yaagees. (Yohaannisa 1:1) Hegee Xoossay hara ayyaana meretatussi ba qofaanne kaaletuwaa ba Naꞌaa baggaara gattiyoogaa bessiyaaba gidiyoogee qoncce.

Yesuusi saꞌan deꞌiya asawukka Xoossaa Doona gididi oottennan aggenna. Xoossay Yesuusi ayyo Qaala gidin, Edene gannatiyan Addaamessinne Hewaanissi kaaletuwaa yootennan waayi aggana. (Doomettaabaa 2:16, 17) Beni Israaꞌeelati I yootiyoobaa wozanappe azazettanaadan odettida, bazzuwan eta kaalettida kiitanchchay Yesuusa gidennan aggenna.—Kessaabaa 23:20-23.a