Xoossay Siiqiyoogeeta Siiqa

1-3. (a) Geeshsha Maxaafay qonccissiyo kashi gaana danddayenna tumay awugee? (b) Loꞌꞌobau minttettiya laggeta nuuni waati doorana danddayiyoo?

PUUTTUWAAGAADAN asaykka darotoo ba heeran deꞌiyaabaa aybanne oyqqees. Nuuyyo mata lagge gididaageetu xeelaa, eti kaalliyo maaraanne eta eeshshaa koyennankka gidin kaalliyoogee metennaba.

² Geeshsha Maxaafay: “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya [“zuppetiya,” NW] asi metuwan gelees” yaagidi kashi gaana danddayenna tumaa qonccissees. (Leemiso 13:20) Ha leemisoy yootiyoy halchennan gayttiyo gaytotettaappe aadhiyaaba. Issi uraara ‘hemettiyoogaa’ yaagiya qaalay he uraara ubbatoo laggetiyoogaa malaatees.a Geeshsha Maxaafan gujo qofaa immiya issi xuufee ha xiqisiyaabaa yootiiddi: “Issi uraara hemettiyoogee siiquwaanne duuxxenna dabbotaa malaatees” yaagees. Nuuni darotoo nu siiqiyoogeetu hanotaa kaalliyoogaa maayikkii? Tumakka, nuuni siiqiyoogeetuura qofan issi mala gidiyo hanotaa medhiyo gishshau, eti nuna iitabau woy loꞌꞌobau molana danddayoosona.

³ Xoossaa siiquwan deꞌanau loꞌꞌobau nuna denttettiya laggeta koyiyoogee keehippe koshshiyaaba. Hegaa waati oottana danddayiyoo? Qanttan, Xoossaay siiqiyoogeeta siiqiyoogan, a dabbota nu lagge oottiyoogan hegaa oottana danddayoos. Ane kaallidi deꞌiyaagaa qoppa. Yihooway ba dabbotuppe koyiyo eeshshay deꞌiyoogeetuppe kehiya ayba lagge doorana danddayiyoo? Yaatiyo gishshau, Xoossay siiqiyoy ay mala asakko ane pilggoos. Yihoowa xeelay nu qofan qoncce gidiyo wode, loꞌꞌobaa oottanaadan nuna minttettiya laggeta dooranau giigidaageeta gidoos.

XOOSSAY SIIQIYOOGEETA

4. A dabbo gidanau giday deꞌiyoogeeta qoridi dooranau Yihoowayyo maatay deꞌiyoy aybissee? Yihooway Abrahaama “ta dabbuwaa” giidoy aybissee?

⁴ Yihooway ba dabbo gidiyaageeta keehi qoridi doorees. I hegaa oottanau ayyo maatay baawee? I Ubbaappe Bollaara Haariya Godaa gidiyo gishshau, ayyo maatay deꞌiyoogee qoncce; qassi aara dabbotaa medhiyoogee aybippenne aadhiya maata. Yaatin i ba dabbo gidanaadan dooriyoogeeti oonee? Yihooway banan zemppiyaageetanne wozanappe ammanettiyaageeta ba mata dabbo oottees. Leemisuwau, ba gita ammanuwan erettida, Israaꞌeelatu aawaa Abrahaama qoppa. Issi aawassi ba naꞌaa yarshsho oottidi immanaadan oychiyoogaappe aadhidi ammanuwaa paacciyaabi qoppanukka metiyaaba.b Gidikkokka Abrahaamee, “Xoossai Yisaaqa harai atto, haiquwaappekka pattanau danddayiyoogaa” wozanappe ammanidi “a yarishshiis.” (Ibraawe 11:17-19) Abrahaamee hegaa mala ogiyan ammanuwaanne azazettiyoogaa bessido gishshau, Yihooway siiquwan a “ta dabbuwaa” yaagiis.—Isiyaasa 41:8; Yaaqooba 2:21-23.

5. Ammanettidi baayyo azazettiyaageeta Yihooway waatidi xeellii?

⁵ Ammanettidi azazettiyoogaa Yihooway keehi xoqqu ootti xeellees. Ayyo ammanettiyoogaa yeemottidi hara aybippenne aattidi xeelliyaageeta i siiqees. (2 Sameela 22:26) Ha maxaafan SHemppuwaa 1n nuuni beꞌidoogaadan, siiqoy denttettin ayyo azazettanau dooriyaageetun Yihooway keehippe ufayttees. Leemiso 3:32y, “suuretuyyo i ulottees” yaagees. Xoossay banttappe koyiyoobaa ammanettidi poliyaageeta, Yihooway baayyo goynnanaadaaninne ay wodiyaaninne woosan baakko shiiqanaadan kehatettan shoobbees; i eta mokki ekkin, a ‘dunkkaaniyan’ imatta gidana danddayoosona.—Mazamure 15:1-5.

6. Nuuni Yesuusa siiqiyoogaa waatidi bessana danddayiyoo? A Naꞌaa siiqiyaageeta xeelliyaagan Yihoowayyo aybi siyettii?

⁶ Yihooway ba mexi issi Naꞌaa, Yesuusa siiqiyaageeta siiqees. Yesuusi: “Tana siiqiya ooninne ta qaalaa naagana; ta Aawai a siiqana; qassi ta Aawainne taaninne akko yiidi, aara de7ana” yaagiis. (Yohaannisa 14:23) Nuuni Yesuusa siiqiyoogaa waatidi bessana danddayiyoo? Mishiraachuwaa sabbakiyoogaanne erissiyo ashkkara oottiyoogaa gujjin, a azazota naagiyoogaana gidiyoogee tuma. (Maatiyoosa 28:19, 20; Yohaannisa 14:15, 21) Nuuni polotettay paccido asa gidiyoogaadan nuuyyo danddayettidaba ubban, haasayaaninne oosuwan Yesuusa malatiyoogan ‘a kaalliyo’ wodekka a siiqiyoogaa bessoos. (1 PHeexiroosa 2:21) A Naꞌaa siiqiyoogee denttettin, Kiristtoosa deꞌuwaa ogiyaa kaallanau baaxetiyaageetun Yihoowa wozanay keehippe ufayttees.

7. Yihoowa dabbo gididaageeta lagge oottiyoogee eratetta gididoy aybissee?

⁷ Yihooway Ba dabbotuppe koyiyo eeshshati, ammanuwaa, ammanettidi deꞌiyoogaa, azazettiyoogaanne Yesuusanne a siraatata siiqiyoogaa gujjoosona. Nuuni ubbay huuphiyan huuphiyan nuna hagaadan oychana bessees: ‘Taayyo mata lagge gididaageeti hegaa mala eeshshata bessiyoonaa, qassi hegaa mala siraatata naagiyoonaa? Taani Yihoowa dabbota taayyo lagge oottidanaa? Hegaadan oottiyoogee eratetta. Xoossay koyiyo eeshshata dichiyaanne Kawotettaa mishiraachuuwaa mishettidi sabbakiya asati, nuuni Xoossaa ufayssanau murttidoogaadan deꞌana mala denttettiyoogan nuna loꞌꞌobau kaalettana danddayoosona.— “Loꞌꞌo Lagge Giyoogee Woygiyoogee?” yaagiya, sinttaa 29n deꞌiya saaxiniyaa xeella.

GEESHSHA MAXAAFAN DEꞌIYA LEEMISUWAAPPE TAMAARIYOOGAA

8. (a) Naꞌoominne Uruti giddon (b) Heezzu yelaga Ibraawetu giddon (c) PHauloosanne Ximootiyoosa giddon deꞌiya laggetettaa xeelliyaagan nena maalaaliyaabay aybee?

⁸ Geeshsha Maxaafay loꞌꞌo laggeta dooriyoogan goꞌettida darotu leemisuwaa oyqqiis. Neeni Naꞌoominne i naꞌaa machee Uruti giddon, Baabiloonen deꞌiiddi duuxxenna laggetettaa medhida heezzu yelaga Ibraawetu giddooninne PHauloosanne Ximootiyoosa giddon deꞌiya gaytotettaabaa nabbabana danddayaasa. (Uruto 1:16; Daaneela 3:17, 18; 1 Qoronttoosa 4:17; Piliphphisiyuusa 2:20-22) Gidikkonne, hara keehi loꞌꞌo leemiso gidiya, Daawitanne Yonaataana giddon deꞌiya laggetettaa ane akeekan beꞌoos.

9, 10. Yonaataananne Daawita giddon deꞌiya laggetettau baaso gididabay aybee?

⁹ Daawiti Gooliyaada wori simmin, “Yonaataani Daawitaara daro mata dabbotettaa medhdhiis; Yonaataani Daawita ba huuphedan siiqiis” yaagidi Geeshsha Maxaafay yootees. (1 Sameela 18:1) Yonaataani Daawitappe daro layttan bayratiyaaba gidikkonne, Yonaataani olaa dembban hayqqana gakkanaashin duuxxibeenna laggetettay hegaadan doommiis.c (2 Sameela 1:26) Eta naaꞌꞌaa giddon merettida mino laggetettau baaso gididabay aybee?

¹⁰ Yonaataaninne Daawiti mata laggetettan deꞌidoy, eti Xoossaa siiqiyo gishshataassanne ayyo ammanettidi deꞌanau wozanappe koyiyo gishshataassa. Ha naaꞌꞌu asati issippetettaa medhidoy Xoossaa ufayssanau koyiyoogaana. Eti duuxxenna laggetettaa medhanaadan oottiya eeshshaa issoy issuwau bessidosona. Yelaga naꞌay Daawiti xalatettaaninne mishuwan, yayyennan Yihoowa sunttau eqqidoogee, Yonaataanaa denttettoogau siree baawa. Yihoowa giigissota ammanettidi kaafidanne yaaretennan ba goꞌꞌaappe Daawita goꞌꞌaa kaseyida gastta bitaniyaa Daawiti bonchoogau siree baawa. Leemisuwau, Yonaataana aawaa, iita Kawuwaa Saaꞌoolaa hanqquwaappe Daawiti baqatidi, hidootaa qanxxidi betedan bazzuwan deꞌido wode aybi hanidaakko qoppa. Yonaataani, “Daawitakko . . . biidi Daawita GODAN wolqqaa demmanaadan minttettiiddi,” ammanettiyoogaa maalaalissiya ogiyan kasetidi bessiis. (1 Sameela 23:16) A alꞌꞌo laggee yiidi a kaafidoogaunne minttettidoogau Daawitassi aybi siyettidaakko ane qoppa!d

11. Laggetettaabaa xeelliyaagan Yonaataananne Daawita leemisuwaappe ay tamaaray?

¹¹ Yonaataananne Daawita leemisuwaappe ay tamaariyoo? Demmiyo ubbaappe aadhiya timirttee, laggetuyyo keehippe koshshiya issi mala gididabay, ayyaanaabaa xoqqu oottidi xeelliyoogaa gidiyoogaa akeekoos. Nuuni nuugaa mala kanddoy, ammanoynne Xoossaayyo ammanettidi deꞌanau koshshay deꞌiyoogeeta mata lagge oottiyo wode, nuussi siyettiyaabaa, temokiruwaanne kaafiya qofaa yootiyoogan issoy issuwaa minttettana danddayoos. (Roome 1:11, 12) Ayyaanaabaa qoppiya hegaa mala laggeta nunaara issippe goynniyaageetu giddon demmoos. Gidikkonne, hegaa giyoogee Kawotettaa Addaraashaa shiiquwau yiya ubbay loꞌꞌo lagge yaagiyoogee? CHii, ubbatoo hegaadan gidenna.

NU MATA LAGGETA DOORIYO OGIYAA

12, 13. (a) Nuugaa mala ammanoy deꞌiyoogeetuppekka laggeta shaakkidi doorana bessiyoy aybissee? (b) Koyro xeetu layttan deꞌida gubaaꞌetun merettida metoy aybee? Hegaappe denddidaagan PHauloosi ayba wolqqaama seeraa yootidee?

¹² Gubaaꞌe giddon gidikkokka, nu laggeti ayyaanaaban minttettiyaageeta gidanaadan koyikko, dooriyaageeta gidana bessees. Hegee nuna maalaalissana bessii? Tumuppe bessenna. Issi issi mittaa ayfee teeranau daro wodiyaa gamꞌꞌiyoogaadan, gubaaꞌiyaa giddon deꞌiya issi issi Kiristtaaneti ayyaanaaban wozannaamanau daro wodiyaa gamꞌꞌana danddayoosona. Yaatiyo gishshau, ubba gubaaꞌiyaa giddon ayyaanaaban dumma dumma xekkan dichaa bessida Kiristtaaneti deꞌoosona. (Ibraawe 5:12–6:3) Oorattati woykko daafuraanchati ayyaanaaban diccanaadan maaddanau koyiyo gishshau, nuuni eta danddayiyoogeenne siiqiyoogee tuma.—Roome 14:1; 15:1.

¹³ Issi issitoo nuuni laggetettaa xeelliyaagan naageettanaadan koshshiya hanotay gubaaꞌiyan merettana danddayees. Issotu issotu eeshshay sirissiyaagaa gidana danddayees. Issoti issoti aqi peꞌiiddi lancciyaageeta woykko walassiyaageeta gidana danddayoosona. Koyro xeetu layttan K.Y.S. deꞌida gubaaꞌeta hegaa mala metiya hanotay gakkiis. Gubaaꞌiyan deꞌiya daroti ammanettidaageeta gidikkonne, amaridaageeti suure ogiyan simerettokkona. Qoronttoosa gubaaꞌiyan deꞌiya issi issi asati Kiristtaane timirttetuppe amaridaageeta naagibeenna gishshau, kiitettida PHauloosi gubaaꞌiyaa: “Cimettoppite; iita laggetettai lo77o hanotettaa moorees” yaagidi seeriis. (1 Qoronttoosa 15:12, 33) Aagaa mala ammanoy deꞌiyoogeetuppekka suure ogiyan simirettenna issoti issoti deꞌana danddayiyoogaa PHauloosi Ximootiyoosa akeekissiis. Hegaa mala asata Ximootiyoosi ba mata lagge oottiyoogaappe haakkanaadan yootiis.—2 Ximootiyoosa 2:20-22.

14. Laggetettaa xeelliyaagan PHauloosa seeray oyqqido baaso siraataa waatidi oosuwan peeshshana danddayiyoo?

¹⁴ PHauloosa seeray oyqqido baaso siraataa waatidi oosuwan peeshshana danddayiyoo? Gubaaꞌiyan deꞌiyaageeta gidin woy harata gidin, iitabau nuna denttettana danddayiyaageetuura mata laggetettaa medhiyoogaappe haakkiyoogaana. (2 Tasalonqqe 3:6, 7, 14) Yihoowaara deꞌiya nu dabbotaa naagana bessees. Nu mata laggetu xeelaanne eti kaalliyo siraatata nuuni puuttuwaagaadan oyqqiyoogaa hassaya. Puuttuwaa haattan yeggin woyne eessaa suuphees giidi naagennaagaadan, iitabaa oottanaadan denttettiyaageetuura laggetettaa medhidi, maaddiyaaba demmana giidi naagana danddayokko.—1 Qoronttoosa 5:6.

15. Yihoowaara deꞌiya bantta dabbotaa minttidi deꞌanau baaxetiya laggeta gubaaꞌiyan demmanau ay oottana danddayay?

¹⁵ Issippe goynniyaageetu giddoppe loꞌꞌo laggeta demmana danddayiyoogee galatana bessiya gitaba. (Mazamure 133:1) Yihoowaara deꞌiya bantta dabbotaa minttidi deꞌanau baaxetiya laggeta gubaaꞌiyan waatada demmana danddayay? Neeni Xoossay koyiyo eeshshaanne kandduwaa dichiyo wode, a ufayssanau neegaa mala baaxiyaa oottiyaageeti neenaara laggetanau koyanaagee erettidaba. Hegaadankka, ooratta laggetettaa medhanau kasetada oosuwan peꞌiya tangguwaa neeni ekkiyoogee koshshana danddayees. (Sintta 30n deꞌiya, “Nuuni Loꞌꞌo Laggetettaa Medhido Ogiyaa” giya saaxiniyaa xeella) Neeni kaallanau koyiyo eeshshati deꞌiyoogeeta koya. Wogaa, zariyaa woy yeleta biittaa dummatettaa xeellennan issi mala ammanoy deꞌiyoogeetuura dabbotaa medhanau koyiyoogan, ‘uluwaa aassi dooyanaadan’ Geeshsha Maxaafay yootiyo zoriyaa siya. (2 Qoronttoosa 6:13; 1 PHeexiroosa 2:17) Layttan neenaara laggetiyaageetu xalaalaara laggetoppa. Yonaataani Daawitappe keehi bayratiyoogaa hassaya. Daro Gasttati bantta aadhida eratettaaninne deꞌo layttan beꞌidoban laggetettaa keehippe minttiyaaba oottana danddayoosona.

METOY MERETTIYO WODE

16, 17. Nunaara issippe goynniya issi uri issiban nuna qohikko, gubaaꞌiyaappe haakkana bessennay aybissee?

¹⁶ Gubaaꞌiyaa giddon deꞌiyaageeti eeshshaaninne diccido hanotan daro dummattiyo gishshau, wodiyaappe wodiyan metoy merettana danddayees. Nuugaa mala ammanoy deꞌiyo uri nuna qohiyaabaa haasayanau woy oottanau danddayees. (Leemiso 12:18) Issi issitoo metoy merettiyoy eeshshaa woy qofaa dummatettaana woykko haraa qofaa bala ogiyan xeelliyoogaana. Hegaa mala metotun xubettidi gubaaꞌiyaappe haakkiyoo? Nuuni Yihoowanne i siiqiyoogeeta wozanappe siiqikko hegaadan oottokko.

¹⁷ Yihooway nuna Medhidaagaanne deꞌuwau koshshiyaabaa kunttiyaagaa gidiyo gishshau, nuuni a siiqanau besseesinne wozanappe ayyo aqanau bessees. (Ajjuutaa 4:11) Hegaa bollakka, i ufayttidi goꞌettiyo gubaaꞌiyaa nuuni ammanettidi kaafiyoogee bessiyaaba. (Ibraawe 13:17) Yaatiyo gishshau, nunaara issippe goynniya issi uri nuna qohikko woy azzanttikko, nuuni keehippe qohettidoogaa bessanau gubaaꞌiyaappe haakkokko. Woni ayssi haakkiyoo? Nuna yiilloyiday Yihoowa gidenna. Nuuni Yihoowa siiqiyo gishshau, anne a asaa mule ixxokko!—Mazamure 119:165.

18. (a) Gubaaꞌe giddon sarotettay aakkanaadan nuuni ay oottana danddayiyoo? (b) Tumu gaasoy deꞌiyo wode atto giyoogee ayba anjjo demissii?

¹⁸ Nunaara issippe goynniyaageeta siiqiyoogee nuuni gubaaꞌiyan sarotettaa aassanaadan oottees. Yihooway ba siiqiyoogeetuppe polotettaa naagenna; nuunikka naagana koshshenna. Siiqoy nuuni ubbay polo gidennaagaanne balaa oottiyoogaa akeekidi, guutta moorota aggi aadhanaadan oottees. (Leemiso 17:9; 1 PHeexiroosa 4:8) Siiqoy nuuni ‘issoi issuwau atto yaagiyoogan’ sinttau suganaadan maaddees. (Qolasiyaasa 3:13) Ha zoriyaa oosuwan peeshshiyoogee ubbatoo metennaba gidenna. Yiilluwaa nuuni xooni kiyana xayikko, geella nuuni yiillotiyoogee nuna qohida ura qaxxiyoobadan siyettin, lancciyaa uluwan oyqqanau koyana danddayoos. Gidikkonne, lancciyaa uluwan oyqqiyoogee tumuppe nuna qohees. Tumu gaasoy deꞌiyo wode atto giyoogee daro anjjuwaa demissees. (Luqaasaa 17:3, 4) Hegee nuussi qofaanne wozanaa sarotettaa ehees, gubaaꞌe giddon sarotettay deꞌanaadan ootteesinne ubbaappe aadhidi Yihoowaara deꞌiya nu dabbotaa naagees.—Maatiyoosa 6:14, 15; Roome 14:19.

LAGGETETTAA AGGANA BESSIYO WODIYAA

19. Issi uraara deꞌiya laggetettaa aggana bessiya ayba hanotati merettana danddayiyoonaa?

¹⁹ Issitoo issitoo gubaaꞌiyaa yame gidida issi uraara deꞌiya laggetettaa agganaadan nuuyyo odettees. Xoossaa higgiyaa kanttida issi uri nagaraappe simmennan ixxidi gubaaꞌiyaappe bohettiyo wode woykko issi uri worddo timirttiyaa tamaarissiyoogan woy gubaaꞌiyaappe bana shaakkiyoogan ammanuwaa aggiyo wode hegee odettees. Xoossaa Qaalay hegaa mala uraara “issippe gaittenna mala” qoncciyan yootees.e (1 Qoronttoosa 5:11-13; 2 Yohaannisa 9-11) Geella nuuyyo lagge gidida uraara woykko nu dabboora gayttanau ixxiyoogee tumuppe deexxiyaaba gidana danddayees. Ubbaappe aaruwan Yihoowayyonne a geeshsha higgetuyyo ammanettidi minni eqqidoogaa hegaadan oottiyoogan bessiyoo? Yihooway, ammanetiyoogaanne azazettiyoogaa xoqqu ootti xeelliyoogaa hassaya.

20, 21. (a) Bohiyoogee siiqo giigisso gididoy aybissee? (b) Nu laggeta eratettan dooriyoogee keehippe koshshiyaaba gididoy aybissee?

²⁰ Bohiyoogee tumuppe Yihooway siiquwan giigissidoba. Hegaadan gididoy aybissee? Nagaraappe simmenna uraa gubaaꞌiyaappe kessiyoogee, Yihoowa geeshsha sunttaanne a siraatata siiqiyoogaa bessees. (1 PHeexiroosa 1:15, 16) Bohiyoogee gubaaꞌiyaa qohuwaappe naagees. Gubaaꞌiyan deꞌiya ammanettidaageeti, eriiddi nagaraa oottiyaageeti gattiyo qohuwaappe naagettoosona; qassi gubaaꞌee ha iita alamiyaappe baqati attiyo soho gidiyoogaa eridi, bantta goynuwaa polana danddayoosona. (1 Qoronttoosa 5:7; Ibraawe 12:15, 16) Mino seeray iitabaa oottidaagau siiquwaa bessiyooba. He seeray, i ba xeelaa laammana bessiyoogaa akeekanaadan oottidi, Yihoowakko simmanau bessiya tanggota ekkanaadan oottiya ayyo koshshiya azzano gidana danddayees.—Ibraawe 12:11.

²¹ Nu mata laggeti nuna molanau gita wolqqay deꞌiyoogee tuma. Hegaa gishshau, nu laggeta eratettan dooriyoogee keehippe koshshiyaaba. Yihoowa dabbota nu lagge oottiyoogaaninne Xoossay siiqiyoogeeta siiqiyoogan, lagge geetettiya ubbaappe aadhiya, daro laggeti nu yuushuwan ubbatoo deꞌanaadan oottana danddayoos. Etappe demmiyoobay nuuni Yihoowa ufayssanau murttido murttiyaa polanaadan maaddees.