Asay Issi Gita Pooqiyaa Keexxiis

DARO wodee aadhdhiis. Nohe naati daro naata yelidosona. Eta naatikka dicci gakkidi daro naata yelidosona. Gamꞌꞌennan saꞌan daro asay deꞌiyoogaa doommiis.

Hegeetuppe issoy, Nohe naꞌaayyo naꞌaa naꞌa gidida Naamiruuda. I doꞌaa shankkatiyanne asa woriya iita asa. Naamiruudi hegaa bollanakka asaa haaranau bana barkka kawoyiis. Xoossay Naamiruuda dosibeenna.

He wode asa ubbay issi doonaa woykko issi qaalaa haasayees. Naamiruudi eta haaranau eta issi heeran shiishshidi wottanau koyiis. Hegaa gishshau, i ay oottidaakko eray? Katamaanne a giddon issi gita pooqiyaa keexxanaadan asaayyo yootiis. Eti xuubiyaa medhdhiyaageeta ha misiliyan beꞌa.

Xoossaa Yihooway he keexettiyaaban ufayttibeenna. Xoossay koyidoy asay hegaappe kiyidi saꞌa ubban laalettidi deꞌanaadaana. SHin asay: ‘Haayiite; nu sunttaa xeesissanau issi gita katamaanne xeeray saluwaa gakkiyo issi gita pooqiyaa nuuyyo keexxoos’ yaagidosona. Asay Xoossaa bonchchuwaappe ba bonchchuwaa koyiis.

Yaatiyo gishshau, Xoossay eti pooqiyaa keexxiyoogaa agganaadan oottiis. I hegaa waati oottidaakko eray? Asay haasayiyo issi qaalay qoppennan dumma dumma gidanaadan oottiyoogaana. Keexxiya asay kaseegaadan issoy haasayiyoogaa haray erana danddayibeenna. Eta katamay Baabeela woykko Baabiloona geetettoy hegaassa; a birshshettay “Akeekanau waayissiyaaba” yaagiyoogaa.

Hegaappe simmin, asay Baabeelappe kiyidi biyoogaa doommiis. Issi mala qaalaa haasayiya asay citan citan harasan issippe deꞌanau biis.