Cincca Gabaaꞌoonata

KANAANEN deꞌiya katamatuppe daroti Israaꞌeeletuura olettanau giigettiiddi deꞌoosona. Eti Israaꞌeeleta xoonana danddayiyaabadan qoppidosona. SHin he heera katamaa Gabaaꞌoonan deꞌiya asatussi hegaadan milatibeenna. Israaꞌeeleta Xoossay maaddiiddi deꞌiyoogaa eti ammanidi, Xoossaara olettanau koyibookkona. Yaanin Gabaaꞌoonati ay oottidaakko ne eray?

Eti keehi haahosan deꞌiya asa milatanau qofaa qachchidosona. Hegaa gishshau, he asatuppe issoti issoti wurida ceega maayuwaa maayidosonanne ceega caammaa wottidosona. Eti bantta haretun melida oyttaa ceega joynetun caanidi, shinqqiyaassi oyqqidosona. Hegaappe Yaasukko biidi yaagidosona: ‘Nuuni intte wolqqaama Xoossaa Yihoowabaa siyidi keehi haaho biittappe yiida. Inttessi i Gibxxen oottidobaa ubbaa siyida. Yaatiyo gishshau, nu halaqati nuuni shinqqiyaa giigissanaadaaninne inttekko yiidi: “Nuuni intte ashkkarata. Intte nunaara olettennaagaadan nuussi qaalaa gelite” gaanaadan yootidosona. Adussa ogiyaa hemettidoogaappe denddidaagan, nu maayoy wuridoogaanne nu shinqqeekka puulummidi melidoogaa beꞌana danddayeeta’ yaagidosona.

Yaasunne asaa kaalettiyaa haraati, Gabaaꞌoonati giidobaa ammanidosona. Hegaa gishshau, etaara olettennaagau etassi qaalaa gelidosona. SHin heezzu gallassappe guyyiyan, Gabaaꞌoonati bantta shooron deꞌiyaageeta gidiyoogaa eti eridosona.

Yaasu eta: ‘Nuuni daro haaho biittaappe yiida’ giidi, aybissi nuna cimmidetii?’ yaagidi oychchiis.

Gabaaꞌoonati zaariiddi: ‘Nu hegaa oottidoy, intte Xoossaa Yihooway ha Kanaane biittaa ubbaa inttessi immanaagau qaalaa gelidoogaa siyido gishshataassa. Hegaa gishshau, intte nuna woreeta giidi yayyida’ yaagidosona. SHin Israaꞌeeleti bantta qaalaa naagidi, Gabaaꞌoonata woribookkona. Hegaappe eta banttassi ashkkara oottidosona.

Gabaaꞌoona asati Israaꞌeeletuura saruwan deꞌanau maacettido gishshau, Yerusalaame kawoy yiillotiis. Yaatiyo gishshau, i hara oyddu kawota: ‘Gabaaꞌoonata olanaadan yiidi tana maaddite’ yaagiis. He ichchashu kawoti oottidobaykka hegaa. Israaꞌeeletuura saruwan deꞌanau maacettido gaasuwan, ha kawoti eta olanau denddikko, Gabaaꞌoonati oottobay cinccatettee? Ane beꞌana.