Yoosaafixi Yihoowan Ammanettiis

A ASATI oonakkonne eti ay oottiiddi deꞌiyaakko eray? Eti olau biiddi deꞌoosona; sinttaara deꞌiyaageeti qassi mazamuriyaa yexxiiddi deꞌoosona. SHin neeni: ‘Ha yexxiya asati olettanau aybissi tooraanne bisuwaa oyqqibookkonaa?’ yaagada oychchana danddayaasa. Aybissakko ane beꞌoos.

Yoosaafixi Israaꞌeele naaꞌꞌu zaretu kawotettaa kawo. I deꞌidoy huuphessa bagga 10u zaretu kawotettan Kawuwaa Akaabinne Elzzaabeela deꞌido wodiyaana. SHin Yoosaafixi loꞌꞌo kawo; qassi a aawaa Asikka loꞌꞌo kawo. Hegaa gishshau, tohossa bagga naaꞌꞌu zaretu kawtettaa asay daro layttaassi loꞌꞌo deꞌuwaa deꞌiis.

SHin haꞌꞌi asay yayyanaadan oottiyaa issibi merettiis. Kiitaa ehiida asati Yoosaafixassi: ‘Seyra Deriyaappe, Amoonappenne Moꞌaabappe daro olanchchati nena olanau yoosona’ yaagidi yootidosona. Yihoowa maaduwaa koyidi, daro Israaꞌeeleti Yerusalaame shiiqidosona. Eti beeta maqidasiyaa bin, Yoosaafixi: ‘Abeet nu Xoossau Yihoowau, nuuni ay oottanaakko erokko. Ha daro qooday deꞌiyo olanchchatuura olettanau nuussi wolqqi baawa. Nuuni maaduwaa demmanau neekko xeelloos’ yaagidi woossiis.

Yihooway siyidi ba ashkkaratuppe issoy asaayyo: ‘Olay Xoossaabaappe attin, inttebaa gidenna. Intte olettana koshshenna. Yihooway inttena waatidi ashshanaakko coꞌꞌu giidi xeellite’ yaagidi yootanaadan oottiis.

Yaatiyo gishshau, wonttetta gallassi maallado Yosaafixi asaassi: ‘Yihoowan ammanettite!’ yaagiis. Yaatidi, mazamuriyaa yexxiya asata ba wotaaddaratuppe sinttan salppissidi, eti hemettiiddi Yihoowassi saba mazamuriyaa yexxanaadan oottiis. Eti olaa sohuwaa matiyo wode aybi hanidaakko eray? Yihooway eta morkke wotaaddarati issoy issuwaara olettanaadan oottiis. Israaꞌeeleti yaa gakkiyo wode, eta morkke wotaaddarati ubbay hayqqiichchidosona!

Yihoowan ammanettidi, Yoosaafixi eranchcha gidennee? Nuunikka An ammanettikko, eranchcha gidana.