Yesuusa Yeletaappe Biidi A Hayquwaa Gakkanaashin

Kiitanchchaa Gabreeli Mayraamo geetettiya issi loꞌꞌo yelaga maccaaseekko kiitettiis. Merinau kawo gididi haarana naꞌaa a yelanaagaa i iyyo yootiis. He naꞌay Yesuusi, mehee aqiyoosan yelettiis; henttanchchati yiidi a beꞌidosan. Guyyeppe, issi xoolinttee Arshsho baggappe yiida asata kaalettidi he naꞌaakko ehiis. Eti he xoollinttiyaa beꞌanaadan oottiday oonakkonne qassi a woranau oosettida maqquwaappe Yesuusi waani attidaakko tamaarana.

Kaallidi, Yesuusassi layttay 12 gidiyo wode, beeta maqidasiyan i asttamaaretuura haasayishin beꞌana. Hegaappe 18n layttaa takkidi Yesuusi xammaqettiis; yaatidi Xoossay i saꞌan oottanaadan kiittido, Kawotettaa mishiraachchuwaa sabbakiyoogaanne tamaarissiyoogaa doommiis. He oosuwan bana maaddana mala Yesuusi 12u attuma asata dooridi, eta ba kiittidoogeeta oottidi sunttiis.

Yesuusi maalaalissiya darobatakka oottiis. I shaꞌan qoodettiya asaa guutta molenne guutta oytta xallan kalissi miziis. I harggidaageeta pattiis; ubba hayqqidaageetakka denttiis. Wurssettan, Yesuusi hayqqido gallassi a bolli gakkida darobatanne qassi a asay waatidi woridaakkonne tamaarana. Yesuusi heezzu layttanne bagga gidiya wodiyau sabbakiis; yaatiyo gishshau, SHAAHUWAA 6y 34⁠ppe guuttaa dariya laytta taarikiyaa oyqqiis.