Xoolinttee Kaalettin Yiida Asata

HA ASATUPPE issoy malaatiiddi deꞌiyo he keehi pooꞌiya xoolinttiyaa beꞌay? He xoolinttee, eti Yerusalaameppe kiyi simmin beettiis. Ha asati Arshsho baggappe yiida, xoolinttiyaa qoodiyaageeta. Eti ha ooratta xolinttee banttana issi erettida asakko kaalettiiddi deꞌiyoobadan ammanoosona.

He asati Yerusalaame gakkido wode: ‘Ayhuda kawo gidanau yelettida naꞌay awan deꞌii?’ yaagidi oychchidosona. “Ayhuda” giyoogee Israaꞌeeletussi hara suntta. Asati: ‘Nuuni koyro Arshsho bagga biittan deꞌiiddi naꞌaa xoolinttiyaa beꞌidi, assi goynnanau yiida’ yaagidosona.

Yerusalaamen deꞌiya kawoy Heeroodisi, hegaa siyidi dagammiis. Hara asi kawotettaa baappe ekkana mala koyibeenna. Hegaa gishshau, Heeroodisi qeese halaqata xeesidi: ‘Asay naagiyo kawoy awan yelettaneeshsha?’ yaagidi oychchiis.

Eti: ‘Geeshsha Maxaafay Beetaliheemeena yaagees’ yaagidi zaaridosona. Yaagin Heeroodisi away mokkiyo baggappe yiida asata xeesidi: ‘Biidi naꞌaa mintti koyite. A demmidi tanakka erissite. Taanikka baada ayyo goynnana koyayiis’ yaagiis. SHin, tumuppe Heeroodisi naꞌaa koydoy demmidi a woranaasa!

Hegaappe, he xoolinttee asata kaalettidi Beetaliheemen naꞌay deꞌiyosaa gakkinne, eqqi aggiis. Asati soo gelidi, Mayraamonne guutta naꞌaa Yesuusa demmidosona. Eti imotaa kessidi Yesuusassi immidosona. SHin guyyeppe Yihooway he asati simmidi Heeroodisakko beenna mala aymuwan seeriis. Hegaa gishshau, eti hara ogiyaara bantta biitti simmidosona.

Heeroodisi Arshsho baggappe yiida asati bantta biitti biichchidoogaa siyidi, keehippe yiillotiis. Yaatiyo gishshau, Beetaliheemen deꞌiya layttay naaꞌꞌa kumidonne hegaappe guuxxiya attuma naata ubbaa wotaaddarati woranaadan azaziis. SHin Yihooway kasetidi Yooseefassi aymuwan hegaa erissin, Yooseefi ba soo asaara Gibxxe biis. Guyyeppe, Heeroodisi hayqqidoogaa Yooseefi siyidi, Mayraamonne Yesuusa ekkidi, simmidi ba dere Naazireete yiis. Yesuusi diccidoy yaana.

He ooratta xoolinttiyaa pooꞌoy beettanaadan oottiday oona gaada qoppay? Asati xoolinttiyaa beꞌi simmidi, koyro Yerusalaame biidoogaa hassaya. Seexaanaa Dablloosi Xoossaa Naꞌaa worana koyiis; i Yerusalaame Kawoy Heeroodisikka Yesuusa woranau koyanaagaa eriis. Hegaa gishshau, he xoolinttiyaa pooꞌoy beettanaadan oottidaagee Seexaanaa gidana bessees.