Naatettan Deꞌiya Yesuusi Beeta Maqidasiyan

HA CIMA asatuura haasayiya naꞌaa beꞌa. Eti Yerusalaamen deꞌiya Xoossaa beeta maqidasiyan tamaarissiyaageeta. Naꞌay qassi Yesuusa. I diccidi, haꞌꞌi 12u laytta naꞌa gidiis.

Yesuusi Xoossaabaanne Geeshsha Maxaafan xaafettidabaa darobaa eriyo gishshau, tamaarissiyaageeti keehippe garamettidosona. SHin Yooseefinne Mayraama aara hagan baynnay aybissee? Eti awan deꞌiyoonaa? Ane beꞌoos.

Yooseefi layttan layttan Paasika baalaa geetettiya dumma baalaa bonchchanau ba soo asaa ekkidi Yerusalaame bees. Naazireeteppe Yerusalaame baanaagee adussa oge. Oossinne gidin qeeri kaamee baawa; qassi otobiseekka baawa. He wode etayyo hegaa malabati baawa. Asaappe daroy tohuwan hemmettees; hegaadan Yerusalaame gakkanau heezzu gallassa keenaa ekkees.

Haꞌꞌi Yooseefa soo asay corattiis. Yaatiyo gishshau, Yesuusappe kaalotiya, naagoy koshshiyo a ishanttinne michchontti amaridaageeti deꞌoosona. He laytti Yooseefinne Mayraama bantta naatuura he adussa ogiyaa Naazireete simmi biiddi deꞌoosona. Eti Yesuusi simmiiddi deꞌiya hara asaara deꞌees yaagidi qoppidosona. SHin eti saꞌay omariyo wode shemppiyoosaa gakkidi, Yesuusa demmana danddayibookkona. Eti bantta dabbotunne laggetu giddon a koyidosona, shin etaarakka deꞌenna! Hegaa gishshau, eti a koyanau Yerusalaame simmidosona.

Wurssettan eti Yesuusa hagan tamaarissiyaageetuura deꞌiyaagaa demmidosona. I eti giyobaa siyiiddinne eta oychchiiddi deꞌees. Yesuusi daro eranchcha gidiyoogaa beꞌidi asay ubbay garamettiis. SHin Mayraama: ‘Ta naꞌau, nuna ayssi hagaadan oottadii? Ne aawaynne taani nena koyiiddi daro tuggatida’ yaagaasu.

Yesuusi: ‘Tana ayssi koyidetii? Taani ta aawaa keettan deꞌana bessiyoogaa ereketii?’ yaagidi zaariis.

Ee, Yesuusi Xoossaabaa tamaaranau danddayiyoosan deꞌiyoogaa dosees. Nuunikka hegaadan dosanau bessennee? Ba yiidosan Naazireeten deꞌiiddi, Yesuusi saaminttan saaminttan goynuwau shiiqiyoosaa bees. I ubbatoo loytti eziggiyo gishshau, Geeshsha Maxaafaappe darobaa tamaariis. Ane nuunikka Yesuusa milatoosinne a leemisuwaa kaalloos.