Yohaannisi Yesuusa Xammaqiis

BITANIYAA huuphiyan uttanau yiya haraphphiyo beꞌa. He bitanee Yesuusa. Ayyo haꞌꞌi layttay 30 heera. Aara deꞌiya bitanee qassi Yohaannisa. Nuuni kase abaa guuttabaa erida. Mayraama ba dabbiyo Elssaabeexo oychchana biido wode, Elssaabeexi uluwan deꞌiya naꞌay ufayssan qaaxxidoogaa hassayay? He wode uluwan deꞌiya naꞌay Yohaannisa. SHin haꞌꞌi Yohaannisinne Yesuusi ay oottiiddi deꞌiyoonaa?

Yohaannisi Yorddaanoosa SHaafan Yesuusa muukkidi kessi simmees. Issi asi xammaqettiyoy hegaadaana. Koyro, muukettees; hegaappe pude kiyees. Yohaannisi asaa hegaattuwaa oottiyo gishshau, Xammaqiya Yohaannisa geetetti xeegettees. SHin Yohaannisi Yesuusa ayssi xammaqidee?

Yohaannisi hegaadan oottidoy, Yesuusi akko yiidi bana xammaqanaadan oychchido gishshataassa. Yohaannisi xammaqiyo asati kase oottido bantta iita oosotun azzaniyoogaa bessana koyiyaageeta. SHin Yesuusi bana azzanttida iita ooso ootti eriiyye? CHii, Yesuusi Xoossaa Naꞌaa, saluwaappe yiidaagaa gidiyo gishshau, mulekka hegaa malabaa oottibeenna. Yaatiyo gishshau, Yohaannisi bana xammaqanaadan i oychchidoy hara gaasuwaana. He gaasoy aybakko ane beꞌoos.

Yesuusi ha sohuwaa Yohaannisakko yaanaappe kase anaaxetettaa oottees. Anaaxee mittaappe xaraphpheezzaa, wonbbaraa, hara oydetanne hegaa malabata oottiya asa. Mayraami azinay Yooseefi anaaxe gidiyo gishshau, Yesuusikka anaaxe gidanaadan i tamaarissiis. SHin Yihooway ba Naꞌaa saꞌaa kiittidoy anaaxe gidanaadaana gidenna. I a ootissana dumma oosoy deꞌees; Yesuusi he oosuwaa doommiyo wodeekka gakkiis. Yaatiyo gishshau, Yesuusi haꞌꞌi ba aawaa sheniyaa polanau yiidoogaa bessanau, bana xammaqanaadan Yohaannisa oychchiis. Xoossay hegan ufayttidee?

Ee, ufayttiis; aybissi giikko, Yesuusi haattaappe kiyido wode, saluwaappe: ‘Hagee ta Naꞌaa; tana ufayssiyaagaa’ yaagiya qaalay siyettiis. Saloy dooyettin, ha haraphpheekka yaappee Yesuusa bolli wodhdhanau yiyaabaa milatees. SHin hegee tumu haraphphe gidenna. Haraphphe milatees shin, i tumuppe Xoossaa geeshsha ayyaanaa.

Haꞌꞌi Yesuusi daro qoppiyoobay deꞌiyo gishshau, 40u gallassaa takkanau asi baynnasaa haakkidi biis. Yan Seexaanay akko yiis. Seexaanay Xoossaa higgiyaara moggenna oosota oottanaadan Yesuusa heezzutoo paacciis. SHin Yesuusi hegaa oottibeenna.

Hegaappe guyyiyan Yesuusi biidosaappe simmidi, ba koyro erissiyo ashkkarata, woykko bana kaalliyaageeta gidida attuma asatuura gayttiis. Etappe amaridaageetu sunttay Inddiraasa, PHeexiroosa (Simoonakka geetettees), Piliphphoosanne Naatinaaꞌeela (Barttalamoosakka geetettees). Yesuusinne ha ooratta erissiyo ashkkarati Galiila auraajjaa biidosona. Galiilan Naatinaaꞌeeli yelettido katamaa Qaanan shemppidosona. Yan Yesuusi issi wolqqaama bullachchaa biis; biidi ba koyro maalaalissiya oosuwaa oottiis. I oottidoy aybakko eray? I haattaa woyne eessau laammiis.