Yesuusi Beeta Maqidasiyaa Geeshshiis

YESUUSI hagan keehippe hanqqettidabaa milatees; milatennee? I hegaadan keehippe hanqqettidoy aybissakko eray? Yerusalaamen Xoossaa beeta maqidasiyan deꞌiya ha asati keehippe yiiqetiyaageeta gidiyo gishshataassa. Eti Xoossaayyo goynnanau yiida asaappe daro miishsha demmanau koyidosona.

He ubba mirggota, dorssatanne haraphpheta beꞌay? Asati he meheta hagan beeta maqidasiyan bayzziiddi deꞌoosona. Aybissakko eray? Israa⁠ꞌeeleti Xoossaassi yarshshanau mehetanne kafota koyiyo gishshataassa.

Xoossaa higgee issi Israaꞌeele asi nagara oottiyaabaa gidikko, Xoossaassi yarshshana bessiyoogaa yootees. Israaꞌeeleti yarshshiyo hara wodetikka deꞌoosona. SHin issi Israaꞌeele asi Xoossaassi yarshshiyo kafotanne meheta awappe demmana danddayii?

Issi issi Israaꞌeeleti kafotanne meheta haaridosona. Yaatiyo gishshau, eti hegeeta yarshshanau danddayoosona. SHin daro Israaꞌeeletuyyo meheti woykko kafoti deꞌokkona. Harati qassi Yerusalaameppe keehi haakkidi deꞌiyo gishshau, bantta mehetuppe issuwaa beeta maqidasiyaa ehaana danddayokkona. Yaatiyo gishshau, asay ha sohuwaa yiidi, bana koshshiya mehetanne kafota shammees. SHin ha asati asaa keehi daro miishshaa qanxxisoosona. Eti asaa cimmoosona. Hegaa bollan qassi, eti ha sohuwan, Xoossaa beeta maqidase giddon bayzzana bessenna.

Yesuusi hanqqettidoy hegaassa. Yaatiyo gishshau, i asatu miishshaara deꞌiya xaraphpheezaa aatti yeggidi, eta santtimiyaa laali aggiis. Qassi xurqqayyiyaa dooqqidi, mehiyaa ubbaa beeta maqidasiyaappe kare yedettiis. I haraphpheta bayzziiddi deꞌiya asata: ‘Haraphpheta hagaappe kessite! Ta aawaa keettaa zalꞌꞌidi duretiyoosa oottopite’ yaagidi azaziis.

Yesuusa kaalliyaageetuppe amaridaageeti aara hagan Yerusalaame beeta maqidasiyan deꞌoosona. Eti Yesuusi oottiiddi deꞌiyoobaa beꞌidi garamettidosona. Hegaappe eti Geeshsha Maxaafan Xoossaa Naꞌaabaa: ‘Xoossaa keettaa mishoy a tamadan xuuggana’ yaagiya sohuwaa hassayidosona.

Yesuusi Paasikaa bonchchanau hagau Yerusalaame yiido wode, daro maalaalissiyaabata oottiis. Hegaappe guyyiyan, Yesuusi Yihudaappe kiyidi simmidi Galiila biyoogaa doommiis. SHin biiddi, Samaariyaa auraajjaara kaanttidi biis. Yan aybi hanidaakko ane beꞌoos.