Yesuusi Deriyaa Bollan Tamaarissiis

YESUUSI hagan uttidaagaa beꞌa. I ha ubba asaa Galiilan deꞌiya issi deriyaa bollan tamaarissiiddi deꞌees. Akko matattidi uttidaageeti a erissiyo ashkkarata. I eta giddoppe 12ta kiitettidaageeta gidanaadan dooriis. Kiitettidaageeti Yesuusi erissiyo dumma ashkkarata. Ne eta sunttaa eray?

Etappe Simoon PHeexiroosinne a ishaa Inddiraasi deꞌoosona. Qassi hara ishantti, Yaaqoobinne Yohaannisikka deꞌoosona. Yaaqooba geetettiya hara kiitettidaageenne Simoona geetettiya haraykka deꞌees. Kiitettidaageetuppe naaꞌꞌaa sunttay Yihudaa. Issoy Asqqorootu Yihudaa gidishin hara Yihuday qassi Taaddiyoosakka geetettees. Hegeetuppe harati qassi Piliphphoosanne Naatinaaꞌeela (Barttalamoosakka geetettees), Maatiyoosanne Toomaasa.

Samaariyaappe simmoogaappe guyyiyan, Yesuusi: ‘Saluwaa kawotettay matattiis’ yaagidi he wode koyro sabbakiyoogaa doommiis. He kawotettay aybakko eray? Hegee Xoossay ayssiyo tumu aysuwaa. He kawotettaa kawoy Yesuusa. I saluwan uttidi haarana; qassi saꞌau sarotettaa ehaana. Xoossaa kawotettan kumetta saꞌay loꞌꞌiya gannate gidana.

Yesuusi hagan asaa he kawotettaabaa tamaarissiiddi deꞌees. I qonccissiiddi: ‘Intte hagaadan giidi woossana bessees. Saluwan deꞌiya nu aawau, ne sunttay bonchchetto. Ne kawotettay yo. Ne shenee saluwan hanidoogaadan, saꞌankka hano’ yaagiis. Daro asay hegaa ‘Godaa Woosaa’ yaagidi xeegees. Harati ‘Nu Aawau’ giyo woosaa yaagoosona. Ha woosaa wurssada gaanau danddayay?

Yesuusi asay issoy issuwaara siga deꞌiyo ogiyaakka tamaarissiis. I: ‘Harati inttessi oottanaadan koyiyoobaa inttekka etassi oottite’ yaagiis. Hara asi neessi kehatettaa bessiyo wode dosikkii? Hegaa gishshau, Yesuusi, nuunikka hara asaassi kehatettaa bessana koshshiyoogaa yootiis. Gannate biittan ubba asay hegaadan oottiyo wode deꞌanaagee keehi ufayssennee?