Dabira Zayte Deriyaa Bolli

HAGAN Dabira Zayte Deriyaa bolli deꞌiyaagee Yesuusa. Aara deꞌiya he oyddu asati i kiittidoogeeta. Eti ishantta gidida Inddiraasanne PHeexiroosa, qassi hara naaꞌꞌu ishantta Yaaqoobanne Yohaannisa. Hini haahuwan beettiyaagee Yerusalaamen deꞌiya Xoossaa beeta maqidasiyaa.

Yesuusi hare maraa toggidi Yerusalaame geloosappe naaꞌꞌu gallassa gidiis. He gallassay Masqqayno. He gallassi wonttan Yesuusi beeta maqidasiyan takkiis. Yan qeeseti Yesuusa woranau oyqqana koyidosona. SHin asay Yesuusa dosiyo gishshau, hegaa oottanau yayyidosona.

Yesuusi haymaanootiyaa kaalettiya he asata: ‘Ha shooshshatoo, shooshshaa naatoo’ yaagiis. Hegaappe Yesuusi eti oottido iita ooso ubbaa gishshau, Xoossay eta qaxxayanaagaa yootiis. Hegaappe guyyiyan, Yesuusi Dabira Zayte Deriyaa kiyin, ha oyddu kiitettidaageeti a oychchiyoogaa doommidosona. Eti Yesuusa ay oychchiyaakko eray?

Kiitettidaageeti sinttanaabaa oychchoosona. Eti Yesuusi iitabaa ubbaa saꞌaappe xayssanaagaa eroosona. SHin eti hegee aude hananaakko erana koyidosona. Yesuusi Kawo gididi haaranau simmidi yaanay audee?

Yesuusi simmidi yiyo wode, a kaalliya saꞌan deꞌiyaageeti bana beꞌana danddayennaagaa erees. Hegee i deꞌanay saluwaana gidiyo gishshataassanne eti a beꞌana danddayenna gishshataassa. Yaatiyo gishshau, Yesuusi kiitettidaageetussi i saluwan Kawo gididi haariyo wode, saꞌaa bolli hanettana deꞌiya amaridabata yootiis. Hegeetuppe issoti issoti aybee?

Yesuusi wolqqaama olati denddanaagaa, daro asay hargganaagaanne namisettanaagaa, keehi iita makkalay deꞌanaagaanne wolqqaama biitta qaattay deꞌanaagaa yootiis. Yesuusi Xoossaa kawotettaa mishiraachchoy saꞌan ubba heeran sabbakettanaagaakka yootiis. Nu wodiyan hageeti polettishin beꞌidoo? Ee beꞌida! Yaatiyo gishshau, Yesuusi haꞌꞌi saluwan haariiddi deꞌiyoogaa ammanana danddayoos. Mata wode i saꞌan deꞌiya iitatetta ubbaa xayssana.