Xiskkida Naꞌaa

POORA mati! La aybi kiyidee? Ha saꞌan zinꞌꞌida naꞌay keehippe qohettideeshsha? Beꞌa! sooppe kiyiiddi deꞌiya asatuppe issoy PHauloosa! Ximootiyoosakka hegan beꞌay? Naꞌay maskkootiyaappe kunddideeyye?

Ee, hanidabay hegaa. PHauloosi hagan Xiroꞌaadan deꞌiya erissiyo ashkkatussi qaalaa yootiiddi deꞌees. I wonttetta gallassi markkabiyan baana koshshiyo gishshau, adussa wodiyaassi eta beꞌennaagaa eriis. Yaatiyo gishshau, i qaalaa yootiiddi qammaappe usuppun saate gakkanaashin takkiis.

Euxikoosa geetettiya ha naꞌay maskkootiyaa bolli uttosan xiskkiis. I heezzantta pooqiyaappe duge saꞌan maskkootiyaara kare kunddiis! Yaatiyo gishshau, asay hegaa keenaa ayssi dagammidaakko haꞌꞌi erana danddayaasa. Asay naꞌaa denttiyo wode, eti hirggidoogaadan haniis. Naꞌay hayqqiis!

PHauloosi naꞌay hayqqidoogaa eridi a bolli zinꞌꞌidi, a qoommiis. Hegaappe i: ‘Hirggoppite; aykko baawa; i saro!’ yaagiis. Ee, naꞌay saro! Hegee maalaalissiyaaba! PHauloosi a hayquwaappe denttiis! Asay ubbay ufayssan poocu giis.

Eti ubbay simmidi pooqiyaa pude kiyidi qumaa miidosona. PHauloosi wonttana gakkanaashin qaalaa yootiiddi takkiis. SHin Euxikoosi simmidi xiskkibeennaagaa siree baynnan erana danddayaasa! Hegaappe PHauloosi, Ximootiyoosinne etaara biyaageeti markkabiyan gelidosona. Eti au biiddi deꞌiyaakko eray?

PHauloosi ba heezzantto sabbakuwaa hemetaa biron wurssidi soo simmiiddi deꞌees. Ha hemetan PHauloosi Efisoona katamaa xallan heezzu laytti uttiis. Yaatiyo gishshau, ha hemetay a naaꞌꞌantto hemetaappekka aduqqees.

Markkabee Xiroꞌaadappe denddi biidi, Miliixen guutta wodiyaassi shemppiis. He sohuwaappe Efisooni guutta kilo meetiriyaa haakkiyo gishshau, PHauloosi gubaaꞌiya cimati wurssetta wodiyau banaara gayttidi haasayanaadan, Miliixe yana mala etau kiitaa yeddiis. Hegaappe guyyiyan, markkabee biyo saate gakkin, PHauloosi biyoogaa beꞌidi, eti ay keena azzanidonaashsha!

Markkabee wurssettan Qiisaariyaa simmiis. PHauloosi yan Piliphphoosa giyo erissiyo ashkkaraa son shemppidaashin, Agaaboosa giyo hananabaa yootiya bitanee, PHauloosa naagettanaadan zoriis. I, PHauloosi Yerusalaame biyo wode qashettanaagaa yootiis. Hanidabaykka tumuppe hegaa. Hegaappe, PHauloosi naaꞌꞌu layttaa Qiisaariyan qashettoogaappe guyyiyan, Roome haariya Qeesaara sinttan shilootan eqqanau Roome kiitettiis. I Roome biishin, aybi hanidaakko ane beꞌoos.