Iitatetta Ubbay Xayiyo Wodiyaa

HAGAN ay beꞌay? Ee, bootta parata toggida olanchchata. SHin eti auppe yiiddi deꞌiyaakko akeeka. Parati shaaraa giddoora saluwaappe duge priixiiddi deꞌoosona! Saluwan tumuppe parati deꞌiyoonaa?

CHii, ha parati tumu para gidokkona. Hegaa nuuni eriyoy, pari shaara giddon priixana danddayenna gishshataassa; danddayiiyye? SHin Geeshsha Maxaafay saluwan deꞌiya paratubaa yootees. Geeshsha Maxaafay hegaadan ayssi giyakko eray?

Geeshsha Maxaafay hegaadan giyoy, beni olaa olettiyo wode, parati daro maaddiyo gishshataassa. Yaatiyo gishshau, Xoossay asaara saꞌan olettana oli deꞌiyoogaa bessanau, Geeshsha Maxaafay saluwaappe duge priixiya paratubaa yootees. He olaa sohoy ayba geetettiyaakko eray? Armmageedoona geetettees. He olay saꞌaappe iitatetta ubbaa xayssana.

Ha Armmageedoona olaa Kaalettanaagee Yesuusa. Yihooway Ba kawotettaassi kawo gidanaadan dooridoy Yesuusa gidiyoogaa hassaya. Yesuusi kawo kallachchaa huuphiyan wottidoy hegaassa. Bisoy qassi i Xoossaa morkketa ubbaa woranaagaa bessees. Xoossay iita asaa ubbaa xayssanaagee nuna garamana bessii?

Simmada ane 10tta Taarikiyaa xeella. Yan ay beꞌay? Ee, iita asata xayssida wolqqaama Bashsha Haattaa beꞌaasa. He Bashsha Haattaa ehiiday oonee? Xoossaa Yihoowa. Haꞌꞌi 15tta Taarikiyaa xeella. Hegan aybi haniiddi deꞌii? Sadoomanne Gamoora katamati Yihooway yeddido taman xayiiddi deꞌoosona.

Ane 33tta Taarikiyaa kessa. Gibxxetu paratinne para gaareti waaniiddi deꞌiyaakko beꞌa. Haattay eta bolli goggi agganaadan oottidaagee oonee? Yihoowa. I hegaa oottidoy ba asaa ashshanaassa. Qassi 76tta Taarikiyaa xeella. Hegan Yihooway eta iitatettaa gishshau, ba asaa Israaꞌeelatakka xayanaadan oottidoogaa beꞌaasa.

Hegaa gishshau, Yihooway saluwaa olanchchata kiittidi, saꞌan deꞌiya iitatetta ubbaa xayssanaagan, nuuni garamettana bessenna. SHin hegee ayba giyoogaakko ane qoppa! Kaalliya sinttaa neeni kessin ane beꞌoos.