SHAAHO 8

Worddo Haymaanootiyaappe Haakka; Tumu Haymaanootiyaa Kaalla

1. Goynuwaa xeelliyaagan, ha wodiyan asau ayba dooroy shiiqii?

YESUUSI: “Ta bagga gidenna urai tabaa ixxees” yaagiis. (Maatiyoosa 12:30) Nuuni Yihoowa bagga; hegaadan gidana xayikko Seexaanaa bagga. Daro asay Xoossay ufayttiyo ogiyan au oottiyaabadan qoppees; shin Seexaanay ‘saꞌa ubbaa balettiyoogaa’ Geeshsha Maxaafay yootees. (Ajjuutaa 12:9) Miilooniyan qoodettiya asay Xoossau goynniyoogaadan ammanees; shin eti tumuppe Seexaanaa Dabloosassi oottiiddi deꞌoosona! Ha wodiyan asau naaꞌꞌaappe issuwaa dooriyo dooroy shiiqees: Eti “tumaa Xoossau” Yihoowau oottana bessees; woykko ‘wordduwaa aawau’ Seexaanau oottana bessees.—Mazamure 31:5; Yohaannisa 8:44.

Worddo Haymaanootiyaappe Kiya

2. Asay Yihoowayyo goynnennaadan oottanau Seexaanay goꞌettiyo ogetuppe issoy aybee?

² Yihoowayyo oottanau kuuyiyoogee, Xoossaa ufayssiya eratetta dooro. SHin Seexaanay Xoossau oottiya uran ufayttenna; hegaadan oottiyaageetu bolli i metuwaa gattees. I hegaa oottiyo issi ogee, haratuppe, ubba laggetuppenne so asaappe qilliiccee woy ixoy gakkanaadan oottiyoogaana. Yesuusi: “Asassi morkketi a so asata gidana” yaagiis.—Maatiyoosa 10:36.

3. Ne soo asay woy ne laggeti neeni Xoossau goynniyoogaa eqettiyaaba gidikko, ay oottuutee?

³ Hegaa malabay ne bolli gakkiyaakko, neeni oottanabay aybee? Daro asay ba goynniyo ogee likke gidennaagaa erees; gidikkokka, appe kiyanau koyenna. Hegaadan oottiyoogee so asau ammanettennaagaa gidiyoogaadan qoppees. Hegee bessiyaabee? Ne soo asaappe issoy jallissiya xaliyaa goꞌettiyoogaa eriyaaba gidikko, hegee a qohiyoogaa akeekissikkii? Neeni aara jallissiya xaliyaa goꞌettakka; goꞌettayiyye?

4. Yaasu ba wodiyan deꞌiya goynuwaa xeelliyaagan Israaꞌeelatuyyo woygidee?

⁴ Mayzza aawati haymaanootiyaara gayttidaagan kaallido bala oosuwaanne meeziyaa Israaꞌeeleti agganaadan Yaasu minttettiis. I: “Ha77ikka GODAAYYO yayyite; tumu wozanaappe ammanettidi ayyo goinnite. Intte maizza aawati Efiraaxiisa SHaafaappe hefinttaaninne Gibxxen goinnido allaga xoossata wora olidi, GODAAYYO goinnite” yaagiis. (Yaasa 24:14) Yaasu Xoossaayyo ammanettiis; Yihoowaykka a anjjiis. Nuuni Yihoowayyo ammanettiyaageeta gidikko, i nunakka anjjana.—2 Sameela 22:26.

Haymaanoote Timirttiyaa—Tumaanne Wordduwaa

Sillaasiyaa: Daro haymaanootee Xoossay Sillaase giidi tamaarissees. Eti: “Aaway Xoossa, Naꞌay [Yesuusi] Xoossa, qassi Geeshsha Ayyaanay Xoossa; shin eti heezzu Xoossata gidennan issi Xoossa” yaagoosona.

Geeshsha Maxaafan “Sillaase” giya qaali baawa; woykko Yihooway heezzay issuwaa gidida Xoossa gidiyoogaakka tamaarissenna. Xoossay Yihoowa xalla. Koyro Qoronttoosa 8:6y: “Issi Xoossai, Aawai, nuussi de7ees” yaagees. Yihooway Ubbaappe Xoqqiyaagaa. Yesuusi Xoossa gidenna; shin “Xoossaa Na7aa.” (1 Yohaannisa 4:15) Hegaadankka, geeshsha ayyaanay Xoossa gidenna. Ubba geeshsha ayyaanay bana danddayidi deꞌiyaaba gidenna. Geeshsha ayyaanay Xoossaa wolqqa.—Oosuwaa 1:8; Efisoona 5:18.
SHemppuwaa: Daro haymaanootee shemppoy asa giddon deꞌiyaabadaaninne mule hayqqennabadan tamaarissees. Geeshsha Maxaafay shemppoy asa gidiyoogaa tamaarissees; asi qassi hayqqiyoogee qoncce.—Doomettaabaa 2:7; Hizqqeela 18:4.
Siꞌooliyaa Tamaa: Worddo haymaanootee iita asaa shemppoy siꞌooliyan merinau xuugettees giidi tamaarissees. Geeshsha Maxaafay hayqqidaageeti: “aibanne erokkona” yaagees. (Eranchchaa 9:5) Geeshsha Maxaafay “Xoossai siiqo” gidiyoogaa tamaarissees. (1 Yohaannisa 4:8) Yihooway, siiqo Xoossay, asaa taman mule barchiyaa bessenna.

Saaxiniyaa: Sillaasiyaa, shemppuwaanne siꞌooliyaa tamaa xeelliyaagan Geeshsha Maxaafay ay tamaarissii?

Worddo Haymaanootiyan Goꞌettiyoobata Xayssa

Issi maccaasiyaa iita ayyaana qohuwaappe naagettanawu go’ettiyoobata xuuggawusu

5. Iita ayyaanaa qohuwaappe naagoosona giyoobata nuuni xayssana koshshiyoy aybissee?

⁵ Worddo haymaanootiyaappe kiyiyoogaa giyoogee, iita ayyaanaa qohuwaappe naagettanau goꞌettiyo kitaabaa, migiduwaa, sagaayuwaanne hegaa malabaa nuuni xayssana koshshees giyoogaa. Hegee nuuni Yihoowan kumetta hanotan ammanettiyoogaa bessiyo gishshau, keehippe koshshiyaaba.

6. Beni wode Kiristtaaneti bantta kaayiyo maxaafata waatidonaa?

⁶ Beni wode Kiristtaanetuppe issoti issoti tumu haymaanootiyaa kaallanau qofaa qachido wode oottidobaa qoppa. Geeshsha Maxaafay: “Bitiyaageetuppe daroti bantta maxaafata shiishshidi, asaa ubbaa sinttan xuuggidosona” yaagees.—Oosuwaa 19:19.

7. Daydanttati nuna metiyaaba gidikko, ay oottana danddayiyoo?

⁷ Kase shareechiya, bitiya woy kaayiya issoti issoti Yihoowayyo oottiyoogaa doommiyo wode, daydanttati eta metana danddayoosona. Hegaa malabay ne bolli gakkiyaaba gidikko, Yihoowa sunttaa xeesiyoogan ne qaalaa xoqqu oottada woossa. I nena maaddana.—Leemiso 18:10; Yaaqooba 4:7.

8. Worddo haymaanootiyan goꞌettiyo eeqaanne misiliyaa Kiristtaaneti aybidan xeelliyoonaa?

⁸ Yihoowayyo oottanau koyiyaageeti worddo haymaanootiyaa eeqaynne misilee aybinne banttau deꞌanaadan oottokkona woy an goꞌettokkona. Tumu Kiristtaaneti ‘ammaniyoogan deꞌoosonappe attin, beꞌiyoogan deꞌokkona.’ (2 Qoronttoosa 5:7) Eti goynuwan ayba misilenne goꞌettennaadan diggiya Xoossaa higgiyaa bonchoosona.—Kessaabaa 20:4, 5.

Yihoowa Asaara Issippetettaa Medha

Issi aayyiyaanne I na’iyaa kattiyoobaa issippe giigissoosona

9. Aadhida erancha gidanau Geeshsha Maxaafay immiyo zoree aybee?

⁹ Geeshsha Maxaafay: “Aadhdhida eranchcha asatuura hemettiya asi aadhdhida eranchcha gidees” yaagees. (Leemiso 13:20) Nuuni aadhida erancha gidanau koyiyaaba gidikko, Yihoowa Markkatuura hemettana woykko issippetettaa medhana koshshees. Eti deꞌuwau efiya ogiyan hemettiyaageeta.—Maatiyoosa 7:14.

10. Neeni Xoossaayyo oottanaadan Yihoowa Markkati waatidi maaddana danddayiyoonaa?

¹⁰ Yihoowa Markkati asau tumuppe qoppoosona. Eta oosoy merinaa deꞌuwau kaalettiya Geeshsha Maxaafaa tumaa akeekanaadan ashkke asaa maaddiyoogaa. Eti nena miishsha qanxxissennan Geeshsha Maxaafaa xannaꞌissiyoogan maaddana danddayoosona. Eti ne oyshaa zaaranaunne Geeshsha Maxaafaa eraa neeni oosuwan peeshshiyo ogiyaa bessanau danddayoosona.—Yohaannisa 17:3.

11. Kiristtaane shiiqoti nena waatidi maaddiyoonaa?

¹¹ Eti darotoo Kawotettaa Addaraashshan shiiqiyo shiiquwan, Yihoowa ogiyaabaa gujjada tamaarana danddayaasa. Yaatiyoogan, tumu haymaanootiyaa kaallanau neessi deꞌiya koshshay minnees. Harati Geeshsha Maxaafaa tumaa eranaadan maaddanaayyo loohissuwaakka demmaasa.—Ibraawe 10:24, 25.

12. Neeni Xoossaayyo oottanaadan woosay waatidi maaddana danddayii?

¹² Neeni Yihoowabaanne a halchuwaabaa era era biyo wode, a siiqo ogeta loyttada akeekananne keehippe nashshana danddayaasa. A ufayssiyaabaa oottanaunne a ufayssennabaappe haakkanau koyiyoogan neeni dichaa bessana koshshees. Suurebaa oottanaunne iitabaappe haakkanau maaddanaadan, Yihoowakko woosan shiiqana danddayiyoogaakka hassaya.—1 Qoronttoosa 6:9, 10; Piliphphisiyuusa 4:6.

So asay Geeshsha Maxaafaa issippe nabbabees — Neeni tumu goynuwaa waata goynnana danddayay?

13. Neeni Yihoowa waatada ufayssana danddayay?

¹³ Takkada, neeni ayyaanaaban dicca diccada biyo wode, ne huuphiyaa geppada, xammaqettida Yihoowa Markka gidana bessiyoogaa neeni akeekanaagau siree baawa. Neeni Yihoowa Markkatudan haniyoogan, Yihoowa ufayssana danddayaasa. (Leemiso 27:11) Xoossay: “Taani eta giddon de7ananne eta giddon hemetettana. Taani eta Xoossaa gidana; qassi etikka ta asata gidana” giido ufayttiya asatuppe neeni issuwaa gidana danddayaasa.—2 Qoronttoosa 6:16.

Daydanttatu Qohuwaappe Naxa Kiyaasa

Issi qammi ta azinaara xiskkidaashin, heezzutoo ta sunttay xeesettishin siyaas. Hegaappe koriniisee daakettin, issi eexxiya kuwaase malabay ta uluwan wodhiis. Ta azinay he ubbabaa beꞌibeenna. Gidikkonne, ta bollaa daro aginau tamadan miiddi takkiis.

Usuppun aginappe guyyiyan, he cenggurssay haranttuwaa tana xeegiis. Hegaappe sohuwaara keettay muleera ciimma haattan gelidaba milatiis. Haattaappe deme shooshshay kiyidi, ta kushiyan xaaxettiis. Taani kushiyaappe a olanau malin, tau danddayettibeenna. Keehippe yayyaas. Hegaappe haattaynne shooshshay xayiis; taani qassi saꞌan xulꞌꞌu gaas. Amarida saatiyau aybanne erabeykke. Hegaappe he cenggurssay heeran deꞌiya issi shareechuwaakko taani baanaadan yootiis. Taani he ayyaanaa a sunttaa oychin, “dure gididi naꞌi baynnaagaa” giyo birshshettay deꞌiyo sunttaa yootiis. I taayyo pattiyo wolqqaa immidi, tana dureyanau qaalaa geliis.

Harggiya asay mataappenne haahuwaappe yiyoogaa doommiis. Eti ta soo gakkanaappe kase, ta dumma heregan eta beꞌays. Hegaappe, issi uri gakkiyo wode, a kushiyaa baqqa simmada, a sakkidabaanne hegau xalee aybakko era aggays. He ayyaanay, asay ay keena miishshaa qanxxana bessiyaakkokka taassi yootees.

Asay harggiyaappe paxiyo gishshau, miishshaynne imotay tau xuuqqees. Taani “dure” gidaas; shin “naꞌi baynnaagaa” giyoogee woygiyoogaakko eraas. Taani naꞌa yelido payduwan a bayray hayqqiichees. Hagee keehi azzanttiyaaba. Taani ha ayyaanau aylletido 12 laytta giddon, ta naatuppe usuppunati hayqqidosona.

Xoossay maaddanaadan woossiyoogaa doommaas. Ubbatoo minttada woossaas. Issi gallassi Yihoowa Markkati kariyaa qoxxidosona. Taani darotoo eta yedettiyaaba gidikkonne, he gallassi eti giyoobaa siyanau qofaa qachaas. He gallassi tobbido tobbiyan, taani daydanttaassi oottaydda deꞌiyoogaa akeekaas. Iita ayyaanaa oosuwaa agganau qofaa qachaas.

He ayyaanau hegaa yootido wode, hegaadan kuuyenna mala tana manddiis. Gidikkonne, taani “ne dabbotaa aggaas” yaagaas.

Saaxiniyaa: Issi maccaasiyaa daydanttatu qohuwaappe waana naxa kiyana danddayadee?