XINAATE 2

Asaara Haasayiyoogaadan Yootiyoogaa

2 Qoronttoosa 2:17

TAMAARANABAA: Haasayiyoobaanne ezggiyaageeta xeelliyaagan neeyyo siyettiyaabaa qonccissiya hanotan ubbatoo haasayiyoogaadan wozanappe haasaya.

Woossada akeekan giigetta. Nebaa gidennan, ne yootiyoobaa akeekan qoppanawu woossa. Ne yootana ayfe qofaa shaakkada era. Xaafettidabaa nabbabiyoogan gidennan, ne qofaappe qonccissa.

Geeshsha Maxaafaappe woy hara xuufiyaappe nabbabanawu qoppidaba gidikko, he qofaa tololayada nabbabanawu loytta giigetta. Asi haasayido qofaa hara asi haasayidoba gidiyoogaa bessiya ogiyan nabbaba; shin diraamaa oottiya asa milatana koshshenna.
Wozanappe haasaya. Ne yootiyoobay ezggiya asawu aybissi koshshiyaakko qoppa. Etabaa qoppa. Ne eqoy, qaattaynne somꞌꞌuwan bessiyoobay neeni wozanappe siiquwan haasayiyoogaa bessana danddayees.

Ubbatoo haasayiyoogaadan haniyoogaa giyoogee bonchchuwaa bessenna ogiyan haasayiyoogaa gidenna. Doonaa wogaa kaallada qoncce qaalan, ne yootiyoobay bonchchoba gidiyoogaa bessa.
Ezggiyaageeta xeella. Ezggiya asaa xeelliiddi haasayiyoogee eta yeellayennaba gidikko xeella. Madirakiyaappe haasayiyo wode, ubba asaa issippe xeelliyoogaappe issi issi asaa amarida wodiyawu xeella.