XINAATE 8

Tamaarissanawu Maaddiya Leemisota

Maatiyoosa 13:34, 35

TAMAARANABAA: Ne tamaarissiyoobaa ezggiyaageeti loyttidi akeekanaadan, eti ufayttidi siyiyo deexxenna leemisuwan waanna qofaa qonccissa.

Deexxenna leemisuwaa doora. Yesuusi oottidoogaadan, guuttaban gitabaa, qassi akeekettiyaaban akekanawu metiyaabaa qonccissa. Leemisoy qoncce gidennaadan oottiya koshshenna darobaa yootoppa. Qofay issoy issuwaara maayennan ixxin ezggiyaageeti akeekanawu metoottenna mala, neeni yootiyo leemisoy ne tamaarissiyoobaara maayana koshshees.

Loytta xeella. Ne yuushuwan deꞌiya hanotaa loytta xeella, nu xuufeta xannaꞌa, qassi gooba asttamaareti tamaarissiyo wode ezgga. Yaatada, neeni tamaarissanabaa qonccissanawu goꞌettana danddayiyo leemisota xaafa. He leemisota xaafada mazggafa wotta.
Ezggiya asaabaa qoppa. Ezggiya asaa hanotaaranne eta ufayssiyaabaara gayttida leemisota doora. Ne yootiyo leemisoy eta yeellayiyaaba woy hanqqetissiyaaba gidenna mala naagetta.
Waanna qofaa tamaarissa. Darin maaddenna qofaa gidennan waannatiya qofaa qonccissa. Neeni tamaarissiyo uri leemiso xallaa gidennan, neeni leemisuwan qonccissido qofaakka hassayanaadan ootta.