Harata Danddayissanawu Cimati Waati Loohissiyoonaa?

1. (a) Loohissiyoogaa xeelliyaagan Xoossaa ashkkarati awudekka eriyoobay aybee, qassi hegee ha wodiyawukka haniyoy aybiinee? (b) Ha huuphe yohuwan nuuni beꞌanabay aybee?

LOOHIYOOGEE oosuwan muruta gidanawu maaddiyoogaa Xoossaa ashkkarati awudekka eroosona. Looxee omoodettidaagaa wotti ekkanawu Abraami ‘olaa eriya ba asaa denttiis’; qassi eti wotti ekkidosona. (Doo. 14:14-16) Kawuwaa Daawita wodiyan, Xoossaa keettan yexxiyaageeti Yihoowayyo yexxanawu “loohidaageeta” gidiyo gishshawu, Xoossay sabettanaadan oottidosona. (1 Odi. 25:7) Ha wodiyan, nuuni Seexaanaaraanne a alamiyaara ayyaanaaban olettiiddi deꞌoos. (Efi. 6:11-13) Nuuni Yihoowa sabissanawukka keehi baaxetoos. (Ibr. 13:15, 16) Hegaa gishshawu, beni wode Xoossawu haggaazidaageetuugaadan, nuuni oosuwan murutanawu loohana koshshees. Gubaaꞌiyan harata loohissiyo oosuwaa Yihooway cimatussi immiis. (2 Xim. 2:2) Ishati wudiyaa heemmana danddayiyaageeta gidanaadan loohissanawu kayma cimati ayba hiillaa goꞌettiyoonaa?

TAMAAREE AYYAANAABAN MINNANAADAN MAADDA

2. Tamaariyaa ooratta hiillaa tamaarissanaappe kase, issi cimay ay oottana danddayii, qassi aybissi?

² Neeni cima gidada oottiyoobay ataakilttiyaa oottiya ura oosuwan leemisettana danddayees. Ataakilttiyaa oottiyaagee zerettaa zeranaappe kase biittaa araddissiyaabaa gadiyan yeggana koshshiyoogaa akeekana danddayees. Hegaadan, kayma cimay tamaariyaa ooratta hiillaa tamaarissanaappe kase, tamaaree tamaariyoobaa oosuwan peeshshanaadan maaddanawu Geeshsha Maxaafaa maaraappe amaridaagaa yootanawu koyana danddayees.—1 Xim. 4:6.

3. (a) Yesuusi Marqqoosa 12:29, 30n yootidobay tamaariyaara haasayiyo wode waati goꞌꞌana danddayii? (b) Cimay woossiyo woosay tamaariyaa waati maaddana danddayii?

³ Tamaariyaa qofaa tumay ay keena laammiyaakko akeekana koshshees. Hegaa akeekanawu, i ba huuphiyaa Yihoowawu geppidoogee ba deꞌuwan kuuyidoban waati maaddidaakko oychana danddayaasa. He oyshay nuuni Yihoowayyo kumetta wozanappe waatidi haggaazana danddayiyaakko intte haasayanaadan maaddana danddayees. (Marqqoosa 12:29, 30 nabbaba.) He ishaara issippe woossananne loohanawu awu koshshiya geeshsha ayyaanaa Yihooway immanaadan oychana danddayaasa. Neeni ayyo woossiyoogaa ishay siyiyoogee, i loyttidi oottanaadan denttettana danddayees!

4. (a) Tamaaree ayyaanaaban diccanaadan maaddana danddayiya Geeshsha Maxaafaa qofaa yoota. (b) Cimati harata loohissiyo wode ay halchana bessii?

⁴ Loohissiyoogaa doommiyo wode, tamaaree eeno giyoogee, ammanettiyoogeenne ba huuphiyaa kawushshiyoogee koshshiyoogaa akeekanaadan maaddana danddayiya amarida Geeshsha Maxaafaa qofaa tobbite. (1 Kaw. 19:19-21; Nah. 7:2; 13:13; Oos. 18:24-26) Biittawu araddissiyaabay koshshiyoogaadan he eeshshati tamaariyawu keehi koshshoosona. He eeshshati i ayyaanaaban eesuwan diccanaadan maaddoosona. Paransaayen deꞌiya ZHan Klod giyo issi cimay hagaadan giis: “Taani loohissiyo wode halchiyo waannabay tamaaree ubbatoo ayyaanaabaa qoppanaadan maaddiyoogaa. Tamaaree Xoossaa Qaalan deꞌiya ‘maalaalissiya tumatettaa’ akeekana mala ‘a ayfee pogettanaadan’ maaddanawu, nuuni xiqisiyaa issippe nabbabana danddayiyo wodiyaa koyays.” (Maz. 119:18) Tamaariyaa minttettana danddayiyo hara ogeti awugeetee?

HALCHANABAANNE HEGAWU GAASUWAA YOOTA

5. (a) Ayyaanaabaa halchiyoobaa xeelliyaagan tamaariyaageetuura haasayiyoogee ay keena koshshiyaabee? (b) Cimati guutta naatakka loohissana koshshiyoy aybissee? (Tohossa qofaa xeella.)

⁵ Tamaariya ura, ‘Ayyaanaaban neeni halchidobay aybee?’ gaada oycha. I halchanawu qoppibeennaba gidikko, polana danddayiyoobaa halchanaadan maadda. Neeni issi wode ayyaanaaban halchidobaa yoota, qassi hegaa polido wode ay keena ufayttidaakko wozanappe oda. Hegaadan oottiyoogee wayssennaba gidikkokka, keehi maaddiyaaba. Afirkkaa biittan cimanne aqinye gidida Vikteri hagaadan giis: “Taani yelagatettan deꞌiyo wode, issi cimay taani halchidobaa xeelliyaagan loytti qoppidi amaridabaa tana oychiis. He oyshati ta haggaazuwaabaa taani loytta qoppiyoogaa doommanaadan maaddidosona.” Ayyaanaaban kaymida cimati ishantti bantta layttawu haniya oosuwaa naatettaappe doommidi gubaaꞌiyan oottanaadan immiyoogan eta loohissiyoogee keehi koshshiyoogaa yootoosona. Hegaadan naatettan loohissiyoogaa doommiyoogee naati panttatettaa layttan eta qofay shaahettanaadan oottiya darobay deꞌishinkka, ubbatoo ayyaanaabaa halchanaadan maaddees.—Mazamure 71:5, 17 nabbaba.a

6. Yesuusi harata loohissanawu goꞌettido keehi maaddiya ogee aybee?

⁶ Tamaariya uri haggaazanawu koyanaadan oottanabaa xallaa ayyo yootiyoogee gidenna; hegaadan oottiyoogee keehi koshshiyoy aybissakkokka yootana koshshees. Hegee koshshiyo gaasuwaa yootiyoogan, Gita Asttamaariyaa Yesuusa leemisuwaa kaallaasa. Leemisuwawu, Yesuusi i kiittidoogeeti asaa erissiyo ashkkara oottanaadan yootanaappe kase, eti ayssi azazettana koshshiyaakko odiis. I, “Maata ubbai saluwaaninne sa7an taayyo imettiis” yaagiis. Gujjidikka, “Hegaa gishshau, intte biidi, asa ubbaa tana kaalliyaageeta oottite” yaagiis. (Maa. 28:18, 19) Yesuusi loohissido ogiyaa waata kaallana danddayay?

7, 8. (a) Yesuusi tamaarissido ogiyaa ha wodiyan deꞌiya cimati waati kaallana danddayiyoonaa? (b) Tamaariya ura galatiyoogee keehi koshshiyoy aybissee? (c) Harata loohissanaadan cimata maaddana danddayiya qofay aybee? (“Harata Waati Loohissanee?” giya saaxiniyaa xeella.)

⁷ Tamaaree oottanabay keehi koshshiyoy aybissakko Geeshsha Maxaafay yootiyoobaa qonccissa. Hegaadan tamaarissiyoogan i Geeshsha Maxaafaa maaraa qoppanaadan maaddaasa. Leemisuwawu, Kawotettaa Addaraashaa geliyoosay geeshshanne hemettiya ura qohennaagaa gidanaadan issi ishay giigissanaadan neeni yootadasa giidi qoppoos. Tiitu 2:10n deꞌiya qofaa yootada, i Kawotettaa Addaraashaa giigissanawu oottiyoobay ‘ashshiya Xoossaabaa tamaarissiyoogaa ubbaban’ waatidi galatissiyaakko qonccissana danddayaasa. Tamaariyaagee gubaaꞌiyan deꞌiya cima asatubaanne i oottiyoobay eta maaddiyo ogiyaabaa qoppanaadan oycha. Hegaadan tamaariyaara haasayiyoogee i higgiyaappe aaruwan asaabaa qoppanaadan maaddees. I oottiyoobay gubaaꞌiyan deꞌiya ishanttanne michontta waati maaddiyaakko beꞌiyoogee a ufayssees.

⁸ Hegaa bollikka, tamaariyaagee neeni yootidobaa polanawu baaxetiyo gishshawu galata. Hegaadan oottiyoogee keehi koshshiyoy aybissee? Haattay ataakilttee diccanaadan maaddiyoogaadan, galataykka tamaaree ayyaanaaban diccanaadan maaddees.—Maatiyoosa 3:17ra gatta xeella.

METIYA HARABAA

9. (a) Loohissiyoogaa xeelliyaagan diccida biittatun deꞌiya issi issi cimata metiyaabay aybee? (b) Issi issi yelaga ishantti ayyaanaabaa kaseyennay aybissee?

⁹ Layttay 20 woy 30 heera gidido xammaqettida ishantti gubaaꞌiyan maaddanaadan waati denttettanaakko diccida biittan deꞌiya cimati metootoosona. Issi issi yelaga ishantti gubaaꞌiyan aawatettaa ekkanawu koyokkona giidi, 20 biittan deꞌiya, ayyaanaaban kaymida cimati qoppiyoy aybissakko oychida. Eta zaaruwaappe issoy issi issi yelagati dicciyo wode ayyaanaabaa halchanaadan minttettiday baynnaagaa bessees. Ubba qassi, hegaa malabaa halchanawu koyida issi issi yelagati hegaa aggidi asatettaabawu halchanaadan eta yelidaageeti minttettidosona! Hegaa mala yelagati ayyaanaabaa mule kaseyokkona.—Maa. 10:24.

10, 11. (a) Gubaaꞌiyan oottanawu koyennaba milatiya ishay ba qofaa laammanaadan issi cimay waatidi loddan loddan maaddana danddayii? (b) Issi cimay hegaa mala ishaara tobbana danddayiyo Geeshsha Maxaafaa qofay aybee, qassi aybissi? (Tohossa qofaa xeella.)

¹⁰ Issi ishay gubaaꞌiyan oottanawu koyennaba milatikko, a qofaa laamanawu danddayan keehi maaddana koshshees; gidikkokka, hegee danddayettiyaaba. Ataakilttiyaa oottiya uri issi issi ataakilttiyaa loddan loddan zuuqqidi sitti oottiyoogaadan, issi issi ishantti aawatettaa ekkanawu bantta qofaa laammana koshshiyoogaa akeekanaadan loddan loddan maaddana danddayaasa. SHin waatada?

¹¹ He ishay neessi lagge gidanaadan loddan loddan maadda. I gubaaꞌiyawu koshshiya ura gidiyoogaa akeekanaadan maadda. Yaatada, guuttaa takkada aara issippe issi issi Geeshsha Maxaafaa xiqiseta tobba, qassi i bana Yihoowawu geppidoogaa xeelliyaagan wotti dentti qoppanaadan maadda. (Era. 5:4; Isi. 6:8; Maa. 6:24, 33; Luq. 9:57-62; 1 Qor. 15:58; 2 Qor. 5:15; 13:5) ‘Ne huuphiyaa Yihoowawu geppiyo wode ay oottanawu ayyo qaalaa geladii?’ yaagada a oychana danddayaasa. Hagaadan gaada a wozanaa denttettanawu mala: ‘Neeni xammaqettiyo wode Yihoowawu aybi siyettiis gaada qoppay?’ (Lee.  27:11) ‘Seexaanawu shin, aybi siyettidee?’ (1 PHe. 5:8) Akeekan doorido Geeshsha Maxaafaa xiqiseta nabbabiyoogee, issi ishaa keehi denttettana danddayiyoogaa akeeka.—Ibraawe 4:12 nabbaba.b

TAMAARIYAAGEETOO, AMMANETTIDAAGEETA GIDITE

12, 13. (a) Elssaaꞌi tamaariyo wode ayba eeshshay baayyo deꞌiyoogaa bessidee? (b) Elssaaꞌi ammanettido gishshawu Yihooway waati anjjidee?

¹² Gubaaꞌiyaa maaddana koshshiya yelagawu, neeni shin? Neeni ay qoppiyoogee neessi injjetanaadan maaddii? Hegaa zaaranawu, beni wode tamaarida issi uraa deꞌuwan hanida amaridabaa ane beꞌoos.

¹³ Hananabaa yootiya Eelaasi 3,000 gidiya layttappe kase, yelaga Elssaaꞌi bana maaddanaadan oychiis. Elssaaꞌi sohuwaara eeno giidi, bana ziqqi oottiya oosuwaa oottiyoogan he cima bitaniyawu ammanettidi haggaaziis. (2 Kaw. 3:11) Hegaappe simmin, Elssaaꞌi usuppun laytta gidiyaagaa loohiis; yaatidi Eelaasi Israaꞌeela biittan oottiyo oosuwaa wurssana haniyoogaa eriis. He wode Eelaasi loytti loohida ba laggee ba geeduwaa kaallennaadan yootiis; shin Elssaꞌi heezzutoo Eelaasawu, “Taani neeppe shaahettikke” yaagiis. I bawu danddayettida keenan bana loohissiyaagaara takkanawu murttiis. Eelaasi maalaalissiya hanotan appe shaahettiyoogaa Yihooway Elssaaꞌa bessidi, i ammanettido gishshawu anjjiis.—2 Kaw. 2:1-12.

14. (a) Ha wodiyan tamaareti Elssaaꞌa leemisuwaa waati kaallana danddayiyoonaa? (b) Tamaariyaagee ammanettana koshshiyoy aybissee?

¹⁴ Ha wodiyan Elssaaꞌa leemisuwaa waatada kaallana danddayay? Nena ziqqi oottiya oosuwaa gujjin, oosoy imettiyo wode sohuwaara eeno ga. Nena loohissiyaagaa laggedan xeella; qassi i nena maaddiyoogaa neeni ay keena nashshiyaakko i akeekanaadan ootta. Neeni ayyo yootiyoobay, “Taani neeppe shaahettikke” giyoogaa mala gidana danddayees. Ubbaappe aaruwan, neeyyo imettiya ay oosokka ammanettada ootta. Hegee keehi koshshiyoy aybissee? Yihooway neessi gubaaꞌiyan aawatettaa immanawu koyiyoogaa cimati akeekiyoy neeni ammanettiyaagaa gidiyooga bessa simmiina gidiyo gishshataassa.—Maz. 101:6; 2 Ximootiyoosa 2:2 nabbaba.

KAYMA CIMATA BONCHA

15, 16. (a) Elssaaꞌi ba asttamaariyaa bonchiyoogaa ayba ogetun bessidee? (Ha huuphe yohuwaa doomettan deꞌiya misiliyaa xeella.) (b) Elssaaꞌa hanotaappe hananabaa yootiya a laggeta minttettiday aybee?

¹⁵ Eelaasa kaallida Elssaaꞌabaa yootiya taarikee, ha wodiyan ishantti ayyaanaaban kaymida cimata waati bonchana danddayiyaakkokka bessees. Eelaasinne Elssaaꞌi Yarkkon deꞌiya hananabaa yootiyaageetuura gaytti simmidi, eti naaꞌꞌay Yorddaanoosa SHaafaa biidosona. Yan, “Eelaasi ba kaabbaa ekkidi xaaxidi, an haattaa shociis. SHocin haattai yaanne haanne shaahettiis.” Eti mela biittaara shaafaa pinnidi, ‘haasayiiddi hemettidosona.’ Elssaaꞌi ubbabaa erays giidi qoppibeennaagee qoncce. Eelaasi appe shaahettana gakkanaashin, Elssaaꞌi ba asttamaaree yootiyo ubbabaa wozanappe ezggiis. Hegaappe simmin, gotee Eelaasa ekkidi biis. Guyyeppe, Elssaaꞌi Yorddaanoosa SHaafaa simmidi Eelaasa kaabban haatta shocidi, “GODAI Eelaasa Xoossai awan de7ii?” yaagiis. He wodekka haattay yaanne haanne shaahettiis.—2 Kaw. 2:8-14.

¹⁶ Elssaaꞌi koyro oottido maalaalissiyaabay Eelaasi wurssettan oottido maalaalissiyaabaara issi mala gidiyoogaa akeekadii? Hegaappe ay tamaariyoo? Elssaaꞌi aawatettay aagaa gidiyo gishshawu, issi issibaa oottiyo ogiyaa sohuwaara laammanawu qoppibeennaagee qoncce. Elssaaꞌi Eelaasi oottidoogaadan oottiyoogan, ba asttamaariyaa bonchiyoogaa bessiis; hegee hananabaa yootiya Elssaaꞌa laggeta minttettiis. (2 Kaw. 2:15) SHin Elssaaꞌi hegaappe simmin hananabaa yootido 60 layttan, Eelaasaagaappe aaruwan maalaalissiya darobaa oottanaadan Yihooway a denttettiis. Neeni loohiyaagaa gidiyoogaadan hegaappe ay tamaaray?

17. (a) Ha wodiyan tamaareti waatidi Elssaaꞌaagaadan qoppana danddayiyoonaa? (b) Yihooway guyyeppe ammanettida tamaaretu baggaara ay oottana danddayii?

¹⁷ Gubaaꞌiyan neessi aawatettay imettosaara issi issibaa kaseegaappe mule dummatiya ogiyan oottana koshshees gaada qoppoppa. Laammanawu kuuyiyoy neeni koyiyoogaadaana gidennan, gubaaꞌiyawu koshshiyaagaadaananne Yihoowa dirijjitee immiyo kaaletuwaadaana. Elssaaꞌi oottidobay hananabaa yootiya a laggeta minttettiis, qassi i Eelaasaagaadan oottiyoogan ba asttamaariyaa bonchiis; hegaadan neenikka ayyaanaaban kaymida cimati Geeshsha Maxaafay yootiyoogaadan oottiyoobaa kaalliyoogan eta bonchaasa; qassi ne mala Kiristtaaneta minttettaasa. (1 Qoronttoosa 4:17 nabbaba.) SHin, neeni oosuwan loohiyo wode, sinttawu biya Yihoowa dirijjitiyaara gubaaꞌee issippe baanaadan maaddanawu laamettiyaabaa oosuwan peeshshanaagee qoncce. Ammanettida tamaariyawu, Yihooway guyyeppe Elssaaꞌaagaadan ne asttamaariyaagaappe aaddhiyaabaa oottanaadan nena denttettana danddayees.—Yoh. 14:12.

18. Gubaaꞌiyan deꞌiya ishantta loohissiyoogee ha wodiyan keehi koshshiyoy aybissee?

¹⁸ Ha huuphe yohuwaaninne hagaappe kasetiyaagan deꞌiya qofay daro cimati harata loohissanawu wodiyaa bazzanaadan denttettana giidi qoppoos. Aawatettaa ekkana danddayiya ishati ha loohissuwan eeno gi loohidi, Yihoowa dorssaa heemmanawu maaddiyo wode loytti goꞌettanaadan amottoos. Hegaadan oottiyoogee, kumetta saꞌan deꞌiya gubaaꞌeti minnanaadaaninne sinttappe yaana wayssiya wodiyan nuuni ubbay ammanettidi deꞌanaadan maaddees.