Unꞌꞌissiyaabay Kumido Alamiyan

4 | Ne Hidootaa Mintta Naaga

HEGEE KEEHI KOSHSHIYOY AYBISSEE?

Alamiyan kumida unꞌꞌissiyaabay asatettaaninne qofan asaa qohana danddayees. Hegaa mala hanotatun qohettida daroti sinttappe hanotay giigana giidi mule qoppokkona. Hegaa malabay gakkiyo wode eti ay oottiyoonaa?

Issoti issoti sinttanaabaa qoppanawukka koyokkona.
Harati banttana unꞌꞌissiyaabaa qoppennan agganawu ushshaa uyoosona woy jallissiyaabaa goꞌettoosona.
Amaridaageeti deꞌuwan deꞌiyoogee aynne maaddennabadan qoppiyo gishshawu, banttana woroosona.

Neeni Erana Koshshiyaabay Aybee?

Issi issi metoy nena guutta wodiyawu gakkananne ubba qassi qoppennan loꞌꞌobawu laamettana danddayees.
Nena gakkiya metoy laamettennaba gidikkokka, hegaa genccanawu maaddiyaabaa oottana danddayaasa.
Geeshsha Maxaafay asaa metoy muleera qaarettanaagaa yootees.

Haꞌꞌi Ay Oottana Danddayay?

Geeshsha Maxaafay yootiyoobaa: “Wonttobau hirggoppite; aissi giikko, wonttoi bau hirggana; gallassa ubbaukka gidiya a huuphe waayee de7ees.”—Maatiyoosa 6:34.

Wonttobawu hirggoppa. Ayssi giikko, hegee neeni hachchi oottana bessiyaabata oottennaadan diggees.

Hanana woy hanennan aggana danddayiyaabawu hirggiyoogee, neeni unꞌꞌettanaadaaninne loꞌꞌobaa hidootennaadan oottees.

WAANA NAAGETTANA DANDDAYAY? Maaddiya Zoriyaa

LOꞌꞌOBAN XEELAA WOTTA

Geeshsha Maxaafay yootiyoobaa: “Hiyyeesatu de7oi ubba gallassikka baaxe. SHin ufaittiya asati ubbatonkka bantta de7uwaa aloosona.” (Leemiso 15:15) Neeni ubbatoo meto xallaa qoppikko, he metuwaa giigissiyo ogiyaa akeekennan aggana danddayaasa. SHin, neeni loꞌꞌoban xeelaa wottiyoogee, metuwaa giigissiyo ogiyaa qoppanaadan maaddees.

Oduwaa beꞌiyoogaaninne siyiyoogan daro wodiyaa wurssoppa.
Ubba galla omarssi, neeni galatanaadan oottiyaabatuppe naaꞌꞌubaa woy heezzubaa qoppa.
Neeni hachchi hachchi oottana danddayiyoobata xaafa. Gita oosuwaa shaakkidi guuttaa guuttaa oottiyoogee, hachchi hachchi neeni oottidobay ay keenakko akeekanaadan maaddees.

HARATU MAADUWAA EKKA

Geeshsha Maxaafay yootiyoobaa: “SHaahettanau koyiya asi . . . lo77o era ubbaakka phalqqees.” (Leemiso 18:1) Neeni nerkka ciimma ollaappe kiyana danddayakka; shin harati maaddin kiyana danddayaasa.

So asaa woy laggeta maaduwaa oychcha.
Qassi neeni eta maaddana danddayiyo ogiyaa qoppa. Neeni harata maaddiyoogee ne meto xallaa qoppennaadan oottees.
Neeni hidootaa qanxxada deꞌuwan deꞌiyoogee aynne maaddennabadan qoppikko, dottoriyaa zoriyaa oychchanawu halchcha. Neeyyo issi issitoo akati xayidabadan siyettikko, hegee unꞌꞌettiyoogaa mala harggee nena sakkiyoogawu malaata gidana danddayees. Akkamettiyoogan daroti maadettidosona.a

a Beegottite! maxeetee akkamettiyo loꞌꞌo ogee hagaa giidi yootenna.

Geeshsha Maxaafay Tumu Hidootaa Yootees

Beni wode deꞌida mazamuraawee Xoossaa woossiiddi hagaadan giis: “Ne qaalai ta gediyaassi xomppe, ta ogiyaassikka poo7o.” (Mazamure 119:105) Xoossaa Qaalaa gidida Geeshsha Maxaafay hegaa waati qonccissiyaakko akeeka.

Sakkana xuman hemettiyoosaa eranaadan xomppee nuna maaddees. Hegaadankka, nuuni deexxiyaabaa kuuyana koshshiyo wode, Geeshsha Maxaafan deꞌiya zoree loꞌꞌobaa kuuyanaadan nuna maaddees.

Pooꞌoy nuuni haahuwan deꞌiyaabaa beꞌanaadan maaddees. Hegaadankka, Geeshsha Maxaafay nuuyyo hidootay qoncci beettanaadan maaddees.

Geeshsha Maxaafay asaa deꞌuwaa doomettaabaa yootiya maxaafa xalla gidennan, sinttana xeelliyaagan tumu hidootaakka yootees. Geeshsha Maxaafay kaallidi deꞌiya oyshatu zaaruwaa yootees:

Waanidi?

Tuggay waanidi doommidee? Geeshsha Maxaafay hagaadan gees: “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis.”—Roome 5:12.

Aybissee?

Asaa haaroy nu metuwaa qaarana danddayibeennay aybissee? Geeshsha Maxaafay, issi uri “ba hemetaa suurissanaagee aawu shene gidennaagaa” yootees. (Ermmaasa 10:23) Ha alamiyan deꞌiya metoy ha xiqisiyaa qofay tuma gidiyoogaa qonccissees.

Aybee?

Xoossay metuwaa giigissanawu oottanabay aybee? Geeshsha Maxaafay hagaadan gees: “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.”—Ajjuutaa 21:4.