TIMIRTTE 02

Geeshsha Maxaafay Ufayssiya Wodee Yaanaagaa Yootees

Attamettiyo Meran Giigidaagaa

Azzananaadan, unꞌꞌettanaadaaninne waayettanaadan oottiya metoti daro asaa gakkoosona. Ne deꞌuwan hegaa malabay gakki erii? Neeni sahettiyo gishshawu waayettennan aggakka woy ne siiqiyo uri hayqqido gishshawu azzanennan aggakka. ‘Deꞌoy haꞌꞌiigaappe kehanee?’ gaada qoppennan aggakka. Geeshsha Maxaafay ha oyshawu ammanttiya zaaruwaa yootees.

1. Geeshsha Maxaafay hanana giidi yootiyo ufayssiyaabay aybee?

Nuna keehi daro metoy gakkiyoy aybissakko Geeshsha Maxaafay yootees. Mata wode Xoossay he meto ubbaa xayssana giidi mishiraachchuwaakka yootees. Geeshsha Maxaafay yootiyoobaappe ‘sintta wodiyaa woy loꞌꞌo deꞌuwaanne ufayssaa demmana’ danddayaasa. (Ermmaasa 29:11, 12 nabbaba.) He hidootay nuuni nu metuwaa genccanaadaaninne ha wodiyankka ufayttanaadan maaddana danddayees. Geeshsha Maxaafay yootiyoobati nuuni merinawu ufayttanaagaa ammanettanaadankka oottoosona.

2. Geeshsha Maxaafay sinttanaa wodee ay mala gidanaagaa yootii?

Sinttappe ‘hayqoynne kayyoy woy waasoynne sahoy deꞌennaagaa’ Geeshsha Maxaafay yootees. (Ajjuutaa 21:4 nabbaba.) Ha wodiyan asay hidootaa qanxxanaadan oottiya hiyyeesatettaa, pirddaa pacaa, sahuwaanne hayquwaa mala metoti sinttappe deꞌokkona. Geeshsha Maxaafay Gannate gidida saꞌan asay merinawu ufayttanaagaa yootees.

3. Geeshsha Maxaafay yootiyo hidootay polettanaagaa waana ammanettana danddayay?

Sinttappe loꞌꞌobay hanana giidi daro asay hidootan naagees, shin eti naagiyoobay polettanaagaa ammanettana danddayokkona. Geeshsha Maxaafay yootiyoobay hegaappe dumma. ‘Xoossaa maxaafati’ yootiyoobaa nuuni loytti pilggiyo wode hegan kaseppe aaruwan ammanettana danddayoos. (Oosuwaa 17:11) Neeni Geeshsha Maxaafaa xannaꞌiyo wode, sinttanaabaa xeelliyaagan I yootiyoobay ammanttiyaabakko ammanttennabakko kuuyana.

LOYTTA AKEEKA

Sinttanaabaa xeelliyaagan Geeshsha Maxaafay yootiyoobatuppe amaridaageeta pilgga. Geeshsha Maxaafay yootiyo hidootay ha wodiyan asaa waati maaddiyaakko akeeka.

Misiliyaa: Ha wodiyan asaa gakkiyaabaa sinttappe yaanabaa Geeshsha Maxaafay yootiyoobaara geeddarissidi bessiyaaba. Hegeeti zaarettidi garssaara qonccidosona.

4. Nuuni aynne metootennan merinawu deꞌana danddayiyoogaa Geeshsha Maxaafay yootees

Geeshsha Maxaafay yootiyo kaallidi deꞌiyaabata beꞌa. Hageetuppe nena keehi ufayssiyaageeti awugeetee? Aybissi?

Qaalaa gelidobatuppe kaallidi deꞌiya xiqiseta nabbabite; yaatidi ha oyshata tobbite:

Ha xiqiseti nena maaddoosona gaada qoppay? Ne soo asaynne ne laggeti ha xiqiseta eriyaakko goꞌettana gaada qoppay?

Kaallidi deꞌiyaabati baynna alamiyan deꞌiyaabadan qoppa

KAALLIDI DEꞌIYAABATUN OONINNE WAAYETTENNA:	KAALLIDI DEꞌIYAABATUN UBBA ASAY UFAYTTANA:
Azzanuwaa, cimatettaa woy hayquwaa.—Isiyaasa 25:8.	Siiqiyo hayqqidaageeti hayquwaappe denddidi saꞌan deꞌiyo wode beꞌiyoogaa.—Yohaannisa 5:28, 29.
Sahuwaa woy bollaa pacaa.—Isiyaasa 33:24; 35:5, 6.	Payya gidiyoogaanne yelagatettaa wolqqaa.—Iyyooba 33:25.
Pirddaa pacaa.—Isiyaasa 32:16, 17.	Maanawu gidi palahiya kattay, injje keettaynne ufayssiya oosoy deꞌiyoogaa.—Mazamure 72:16; Isiyaasa 65:21, 22.
Olay gattiyoobaa.—Mazamure 46:9.	Sarotettan deꞌiyoogaa.—Mazamure 37:11.
Azzanttiyaabaa qoppiyoogaa woy hassayiyoogaa.—Isiyaasa 65:17.	Keehi loꞌꞌo hanotan merinawu deꞌiyoogaa.—Mazamure 37:29.

Sahettida naˈay paxidi ba aayyiyo qoommiis.

Cima bitanee yelagidi ataakilttee kumido gaariyaa sugees.

5. Geeshsha Maxaafay yootiyoobay nena maaddana danddayees

Daro asay ba heeran deꞌiya metuwaa beꞌiyoogan hidootaa qanxxees woy hanqqettees. Amaridaageeti hegee giiganaadan keehi baaxetoosona. Geeshsha Maxaafay ubbabay giigana giidi yootiyoobay asaa ha wodiyan waati maaddiyaakko akeeka. BIIDUWAA beꞌite; yaatidi kaallidi deꞌiya oyshata tobbite.

BIIDUWAA: Pirddaa Pacaa Xayssanawu Baaxetaas (4:07)

Misiliyaa: ‘Pirddaa Pacaa Xayssanawu Baaxetaas’ giya biiduwaa giddon deˈiya issi issibata. 1. Rafika ba zariyaa asaara issippe naatettan puuttuwaa maxaasu. 2. Rafika Yihoowa Markkatu gita shiiquwaa koyro shiiqido wode dumma dumma zariyaa asay laggetettan haasayiyoogaa beˈada keehi ufayttawusu.

Biiduwan, Rafiko keehi qofissida pirddaa pacay aybee?
Pirddaa pacay deꞌishinkka, Geeshsha Maxaafay O waati maaddidee?

Geeshsha Maxaafay yootiyo hidootay nuuni yibbaatennaadaaninne nuna gakkiya metuwaa genccanaadan maaddana danddayees. Leemiso 17:22nne Roome 12:12 nabbabite; yaatidi ha oyshata tobbite:

Neeni Geeshsha Maxaafay sinttanaabaa yootiyoobaa ammanikko, ha wodiyan ne deꞌoy kaseppe giiga gidana gaada qoppay? Neeni hegaadan qoppiyoy aybissee?

ISSI ISSI ASAY HAGAADAN GEES: “Geeshsha Maxaafay sinttanaabaa yootiyoobay hanana danddayennaba.”

Neeni hegaa pilggiyoogee keehi koshshiyoy aybissee?

AY AKEEKADII?

Geeshsha Maxaafan sinttanaabaa xeelliyaagan ufayssiya daro hidootay deꞌees. Hegee nuuyyo hidootay deꞌanaadaaninne ha wodiyan nu deꞌoy kaseppe giiga gidanaadan oottees.