HA SAꞌAY BASHSHAAPPE ATTANEE?
CARKKUWA
NUUSSI carkkoy koshshees, shin shemppana xalaalaassa gidenna. Carkkoy awaappe kiyiya qohana danddayiya darobaappe saꞌaa naagees. Carkkoy baynnaakko saꞌay keehi kinchchana danddayees.
Carkkuwa Mooriyabatuppe Naagana Koshshiyo Gaasuwa
Carkkoy moorettiyogee saꞌan deꞌon deꞌiyabati xayanaadan oottana danddayees. Saꞌan deꞌiya asaappe xeetaappe issi kushe xallay, Alamiya Payyatettaa Dirijjitee kessido maaraadan geeshsha carkkuwa shemppees.
Carkkoy moorettiyogee shemppiyo bollaa kifiletu harggiya, goofiniya kansseriyanne wozanaa harggiya kaalettana danddayees. Carkkoy moorettiyogaa gaasuwan, deꞌana danddayiiddi layttan layttan 7,000,000 gidiya asay hayqqees.
Ha Saꞌay Bashshaappe Attanaadan Giigidi Merettiis
Saꞌay deꞌon deꞌiyabatu ubbaayyo gidiya geeshsha carkkuwa immana danddayiyo hanotan merettiis. Shin saꞌay hegaadan oottana danddayiyoy asay heeraa mooriyogaa aggiyo wode xalaalaana. Amarida leemisota beꞌa.
Woray heeraa carkkuwappe karbbon dayokisaydiya bawu ekkiyogee erettidaba. Shin Mangrov giyo mittay mokkiyo, abbaa doonan deꞌiya urqqatiya heeray hegaappe aadhdhiyabaa oottana danddayiyogee he keena erettenna. Mangrov giyo mittay hombbiya heeran deꞌiya woraagaappe ichchashu dakkuwappe daruwa carkkuwappe karbbon dayokisaydiya diggana danddayees.
Kelp giyogaa mala, haattaa hargge malatiya gitabati heeraa carkkuwappe karbbon dayokisaydiya xayssana danddayiyogaa mata wode xinaatee qonccissees. Kelp giyobatu boncco malaban deꞌiya, carkkoy kumido pugeti eti haattaa bollan haahosaa baanaadan oottoosona. Abbaa doonaappe haahosaa biyo wode, he pugeti xuuqqin karbbon dayokisaydee kumido he kelpeti duge abbaa xaggawu wodhdhoosona. Eti yan daro xeetu layttaa takkoosona.
Ha saꞌaa carkkoy mooriyabatuppe barkka geeyana danddayiyogee koronaa gaasuwan asay sooppe kiyana danddayibeenna wode qoncciis. Alamiyan deꞌiya paabirkkatinne kaameti carkkuwa mooriyogee muleera attido 2020n, saꞌaa carkkoy sohuwara kaseegaappe loꞌꞌiis. Koronaa gaasuwan asay sooppe kiyiyogee digetti simmin sohuwara daro biittatun carkkoy kaseegaappe geeshsha gididoogaa, “2020 Alamiya Carkkuwa Hanotaa Irpporttee” qonccissiis.
Metuwa Pagalanawu Asay Ay Oottiiddi Deꞌii?
Bishkkiliitiya goꞌettiyogee carkkoy moorettennaadan maaddana danddayees
Paabirkkati carkkuwa mooriyabaa oottiyogaa guuttanaadan kawotettati ubbatoo yootoosona. Qassi carkkuwa mooriyabaa aggidi goꞌettiyo hara ooratta ogiya saynttisteti ubbatoo demmiiddi deꞌoosona. Leemisuwawu, hegaadan oottiyo issi ogee carkkuwa mooriyabata qohennabawu laammiya bakiteereta goꞌettiyogaa. Qassi eranchchati asay kaamiya laaggiyogaappe tohuwan hemettanaadan woy bishkkiliitiya laagganaadan, qassi carkkuwa mooriyabata so giddon goꞌettennaadan zoroosona.
Issi issi kawotettati carkkoy moorettiyogaa kaseegaappe guuttanawu, qumaa kattiyo zammaana ogeta giigissidosona; shin daro asay hegaa demmana danddayenna.
Shin Alamiya payyatettaa dirijjitiyanne Alamiya Bankkiya gujjin, ubbasan deꞌiya eqotati 2022 irpporttiyan qonccissidoogaadan, hegaappe aarobay koshshees.
Aadhdhida 2020n, alamiyan deꞌiya asaa giddon heezzaappe issi kushee qumaa kattiyo wode carkkuwa mooriyabata goꞌettidoogaa irpporttee qonccissees. Daro biittatun, korinttiya woy carkkuwa moorennabaa goꞌettidi qumaa kattiyobawu miishshaa qanxxana danddayiyageeti keehi guutta.
Saꞌay Bashshaappe Attanaagaa Ammaniyo Gaasota—Geeshsha Maxaafay Woygii?
“Xoossai GODAI, salota medhdhidi miccidaagee, sa7aanne sa7aappe kiyiyaabaa ubbaa oottidaagee, sa7an de7iya asau shemppuwaa immiyaagee, . . . hagaadan yaagees.”—Isiyaasa 42:5.
Xoossay nuuni shemppiyo carkkuwanne carkkoy geeyanaadan oottiya meretan simmi simmi haniyabaa medhdhiis. Awu zawi baynna wolqqay deꞌees; qassi I asaa siiqees. Yaatin, carkkuwa mooriyabata I muleera xayssana giidi ammaniyogee bessiyaba gidennee? “Ha Saꞌay Bashshaappe Attanaagaa Xoossay Qaalaa Geliis” giya huuphe yohuwa xeella.