Asay Deꞌuwa Bonchchiyogaa Aggidoy Aybissee?

DEꞌUWA BONCHCHIYOGEE KEEHI KOSHSHIYOY AYBISSEE?

Deꞌuwa bonchchennaagaa bessiya meezetinne oosoti asaa payyatettaanne sarotettaa keehippe qohana danddayoosona.

Sijaaraa uyiyogee kansseriyan oyqqettanaadan oottiyogaa xalla gidennan, bollay he harggiya teqqennaadan diggees. Goofiniya kansseriyan hayqqiyageetuppe 90 kushe gidiyageeti hayqqiyoy eti woy eta matan deꞌiyageeti sijaaraa uyiyogaa gaasuwana.
Daro asaa tokkosidi woriyogee layttan layttan daroti yayyanaadan oottiyaba. Isttanford Yuniversttiya irpporttee hagaadan gees: “Timirtte keettan gakkiya qohuwan aynne masunxxennan attiyageetikka hegaappe simmin daro layttawu qofan unꞌꞌettiyogaa issi xinaatee qonccissees.”
Uyidi woy jallissiyabaa goꞌettidi kaamiya laaggiyageeti, ogee kaamiya laaggiya haratussinne ogiyan hemettiyageetussi hirggissiyaba gidanaadan oottoosona. Asay deꞌuwa sheneho giyo wode darotoo heeran deꞌiya saro asay qohettees.

AY OOTTANA DANDDAYAY?

Ne payyatettaa naaga. Sijaaraa woy gaayyiya uyiyogaa, mattottiyogaa, woy jallissiya harabaa goꞌettiyogaa mala iita meezeta awudenne aggana danddayettees. Hegaa mala meezeti ne deꞌuwa qohoosona, qassi ne so asaa gujjin ne heeran deꞌiya asaa deꞌuwa bonchchennaagaa bessoosona.

“Nu ashuwaanne nu shemppuwaa tunissiya ubbabaappe nu huuphiyaa ane geeshshoos.” —2 Qoronttoosa 7:1.

Nenanne harata qohiyabaappe naagetta. Daafabay gakkennaadan, ne keettan moorettidabaa ubbatoo giigissa. Kaamiya akeekan laagga, qassi ne kaamiya hanotaa ubbatoo yiggada giigissa. Wolqqaama qohuwa woy hayquwa kaalettana danddayiyabata oottanaadan harati nena denttettiyo wode eeno gooppa.

“Ooratta keettaa keexxiyo wode, xoqqa kaaraappe asi kunddi haiqqin ne oishettennaadan, zemppidi attiyoogaa giigissa.”—Zaarettido Wogaa 22:8.a

Haratuyyo keha. Deꞌuwa bonchchiyogaa giyogee zaree, biittaynne deꞌuwa hanotay dumma gidikkonne ubba asawu kehiyogaa giyogaa. Ubbaappe aaruwan, alamiyan deꞌiya danobawunne olawu waanna gaasotuppe dariya baggay asaa zaggiyogaanne ixxiyogaa.

“Ixo hanotettaa, yiilluwaa, hanqquwaa, waasuwaanne cashshaa ubbaa iitatetta ubbaara intteppe xaissite. Issoi issuwaayyo [kehite].”—Efisoona 4:31, 32.

YIHOOWA MARKKATI AY OOTTIIDDI DEꞌIYONAA?

Yihoowa Markkati harati banttana goꞌꞌiyabaa oottanaadan tamaarissoosona. Nuuni tamaarissiyo Geeshsha Maxaafaa timirttee asay amale gididabatanne banttana qohiyabata oottiyogaa agganaadan maaddiis.

Nuuni keexxiyo sohotun, asay qohettennaadan oottanawu giigida maarata mintti kaalloos. Nu shiiqo sohotanne nuuni Geeshsha Maxaafaa timirttiya aassanawu goꞌettiyo hara keettata keexxiyogaa bantta dosan maaddiyageeti daafabaappe naagettanaadan loohidosona. Qohoy gakkennaadan kawotettay kessido maaraadan deꞌiyakkonne nu goꞌettiyo keettatu hanotaa ubbatoo kaalli xeelloos.

Daafabay gakkidoogeeta maaddoos. Mata wode 12 aginaa giddon, alame yuushuwan gakkida 200 wolqqaama daafaban qohettidaageeta maaddida, qassi hegeeta maaddanawu 12 miiloone doolaare gidiyagaa kessida.

Iboolaa giyo ubbasaa laaꞌiya harggee Arshsho Afirkkan (2014n), qassi Demokratik Ripablik Konggon (2018n) denddido wode, ha woriya harggiya waati teqqana danddayiyakko asaa tamaarissida. “Azazettiyogee Shemppuwa Ashshees” giya huuphe yohuwan haasayaa haasayanaadan amaridaageeta yaa kiittida. Nuuni goynuwawu goꞌettiyo sohotu ubban kushiya meecettanawu goꞌettiyobata giigissida, qassi kushiya meecettiyogeenne harggiyappe naagettanawu oottiyobati keehi koshshiyogaa mintti yootida.

Seeraaliyone biittan, Yihoowa Markkati Iboolaa harggiyappe naagettanaadan bantta haymaanootiya kaalliyageetanne heeran deꞌiya harata maaddidoogawu issi eraadoone xaabee eta galatiis.

Shiiquwa Addaraashaa gelanaappe kasetidi kushiya meecettanawu salppidi danddayan naagiya Yihoowa Markkata. — Laybeeriyan 2014n Iboolaa giyo harggee denddido wode Shiiquwa Addaraashan kushiya meecettiyo sohuwa

a He keehi koshshiyabay beni Giddo Arshshon, so asaynne harati qohettennaadan qoppiyogaa qonccissiyaba.