SHaahuwaa 2

Tuggay Baynna Saꞌaa

1, 2. Darotussi deꞌiya dumma xeelay aybee?

GIDIKKOKKA, saꞌa yuushuwan miilooniyan qoodettiya asau hegaappe mule dumma xeelay deꞌees. Asa naatussi sinttaara yaana deꞌiya maalaalissiya wodiya naagoosona. Eti ha saꞌay mata wode iitatettaappenne tuggaappe muleera geeyida alame gidanaagaa yootoosona. Eti iitabay mata wode xayidi muleera ooratta gidida alamee eqqanaagaa ammanettoosona. Eti ubba ha ooratta alamiyaa baasoy haꞌꞌi oosettiiddi deꞌiyoogaakka yootoosona!

² Ha asati he ooratta alamee olaappe, meqetti baynna hanotaappe, danuwaappe, pirddaa pacaappenne namisaappe woppaa demmiyoosa gidanaagaa ammanoosona. Hegee harggee, azzanoy, afuttaynne haray atto hayqoy deꞌenna alame gidana. He wode asay polo gidanau laamettiiddi baananne gannate biittan ufayssan merinau deꞌana. Ubba hayqqidaageetikka denddidi merinau deꞌana danddayiyo hanotay deꞌana!

3, 4. Hageetu mala asati sinttanau deꞌiya bantta xeelan ammanettiyoy aybissee?

³ Hagaadan sintta wodiya xeelliyoogee coo aymo woykko amo qofa xallee? CHii, mule gidenna. Ha Gannatee yaanaagee attenna giyo qofay, mino ammanuwan baasettiis. (Ibraawe 11:1) Eti hegaadan ammanettana danddayidoy aybissee? Yuniverissiya Medhdhida ubbabaa danddayiyaagee hegau qaalaa gelo gishshataassa.

⁴ Xoossay gelido qaalaa xeelliyaagan, Geeshsha Maxaafay: “GODAI intte Xoossai intteyyo immana giido lo77⁠o ubbaappe issibinne attibeennaagaa intte ubbai intte wozanaaninne shemppuwan ereeta. I intteyyo immana giidobaappe issibinne attennan, ubbai polettiis.” “Xoossai worddotanau asa gidenna; . . . I yootidi, ba yootidoogaa oottennee? Woikko i ba giidobaa polennee?” “Ubbaappe Wolqqaama GODAI hagaadan yaagidi caaqqiis; ‘Taani halchchidoogaadan hanana; taani qoppidoogaadankka polettana’” yaagees.—Yaasa 23:14; Qoodaabaa 23:19; Isiyaasa 14:24.

5. Zaaruwaa demmana koshshiya oyshati awugeetee?

⁵ Gidoppe attin, Xoossaa halchchoy tuggay baynna gannate biittaa giigissanaassa gidikko, iitabay deꞌanaadan ubba koyro ayssi miikkiyaa immidee? Bala gididabaa suurissanau hanno gakkanaassi usuppun shaꞌu layttaa naagidoy aybissee? He tuggay kumido aadhdhida daro xeetu laayttati ubbay, Xoossay tumuppe nuussi qoppennaagaa woykko ubba qassi i deꞌennaagaa bessana danddayiyoonaa?