Metoy Merettiyo Wode

Neeni ne soo asaa deꞌoynne ne aqo deꞌoy ufayssiyaagaa gidanaadan baaxetiyaaba gidikkokka, qoppibeenna metoy merettidi intte ufayttennaadan oottana danddayees. (Eranchchaa 9:11) Metoy nu bolli gakkiyo wode Xoossay siiquwan nuna maaddees. Kaallidi deꞌiya Geeshsha Maxaafaa maaraa intte oosuwan peeshshikko, wolqqaama metuwankka gidin genccana danddayeeta.

1 YIHOOWAN AMMANETTA

GEESHSHA MAXAAFAY YOOTIYOOBAA: “I intteyyo qoppiyo gishshau, inttena hirggissiya ubbabaa a bolli olite.” (1 PHeexiroosa 5:7) Asaa bolli metoy gakkanaadan oottiyaagee Xoossaa gidennaagaa ubba wode hassaya. (Yaaqooba 1:13) Neeni akko shiiqiyo wode i nena maaddana. (Isiyaasa 41:10) ‘Ne metuwaa ayyo yoota.’—Mazamure 62:8.

Qassi neeni Geeshsha Maxaafaa galla galla nabbabiyo wodenne xannaꞌiyo wode, minettana. Hegaadan oottikko, Yihooway waatidi ‘ne waaye ubban nena minttettiyaakko’ akeekana danddayaasa. (2 Qoronttoosa 1:3, 4; Roome 15:4) I ‘asa eratettaa ubbaappe aadhiya Xoossaa sarotettaa’ neessi immanawu qaalaa geliis.—Piliphphisiyuusa 4:6, 7, 13.

AY OOTTANA DANDDAYAY?

• Neeni woppu gaanaadaaninne suure qoppanaadan Yihooway maaddana mala woossa

• Ne oottana danddayiyoobaa ubbaa yiggada hegaappe loꞌꞌobaa doora

2 NEBAAKKA INTTE SOO ASAABAAKKA QOPPA

GEESHSHA MAXAAFAY YOOTIYOOBAA: “Akeekanchcha asati tamaaranau keehi koyoosona; aadhdhida eri de7iyoobaakka ezggoosona.” (Leemiso 18:15) Koyro hanota ubbaa akeeka. Intte soo asawu huuphiyan huuphiyan aybi koshshiyaakko akeeka. Etaara haasaya. Eti yootiyoobaa ezgga.—Leemiso 20:5.

Neeni siiqiyo uri hayqqikko shin? Neeyyo siyettiyaabaa qonccissanawu yeellatoppa. Yesuusikka ‘afuxxidoogaa’ hassaya. (Yohaannisa 11:35; Eranchchaa 3:4) Qassi gidiyaagaa keenaa shemppiyoogeenne xiskkiyoogee keehi koshshiyaaba. (Eranchchaa 4:6) Hegaadan oottiyoogee metoy gakkiyo wode genccanawu maaddees.

AY OOTTANA DANDDAYAY?

• Metoy gakkanaappe kase, intte soo asay issoy issuwaara haasayiyoogaa meezetite. Metoy gakkiyo wode, eti nenaara haasayanawu metootokkona

• Intteegaa mala metoy gakkido asatuura hegaa xeelliyaagan haasaya

3 KOSHSHIYA MAADUWAA DEMMA

GEESHSHA MAXAAFAY YOOTIYOOBAA: “Laggee mule wodekka siiqees; ishaikka metuwaa wode maaddanaassi yelettees.” (Leemiso 17:17) Ne laggeti nena maaddana koyikkokka, neeyyo koshshiyay aybakko eti erennan aggana danddayoosona. Neeyyo koshshiyaabay aybakko etawu yoota. (Leemiso 12:25) Qassi, Geeshsha Maxaafaa qofaa akeekiya asati ayyaanaaban nena maaddanaadan oycha. Eti Geeshsha Maxaafaappe yootiyoobay nena maaddana.—Yaaqooba 5:14.

Xoossaa ammaniyaanne i gelido qaalan ammanettiya asatuura ubba wode laggetiyaaba gidikko, koshshiya maaduwaa demmana danddayaasa. Qassi minttettana koshshiyoogeeta neeni maaddiyo wodeekka minettana danddayaasa. Neeni Yihoowa ammaniyoogaanne i gelido qaalan ammanettiyoogaa etayyo yoota. Maadoy koshshiyo hara asata minnada maadda; qassi nena siiqiyaanne neeyyo qoppiya asatuppe shaahettoppa.—Leemiso 18:1; 1 Qoronttoosa 15:58.

AY OOTTANA DANDDAYAY?

• Nena siiqiya laggiyaara haasaya; qassi i nena maaddanaadan oycha

• Neeyyo koshshiyoobaa qottennan yoota