Xoossay Deꞌiyoy Ubbasaanee?
Asay darotoo zaariyo zaaruwaa:
◼ “I carkko mala; ubbasan, ubbaban deꞌees.”
◼ “I hagaa mala giidi qonccissana danddayenna qoppiyo abbee deꞌiyooba woykko wolqqa.”
Yesuusi woygidee?
◼ “Ta Aawaa keettan daro sohoi de7ees.” (Yohaannisa 14:2) Xoossaassi keettan leemisettiyaabay woykko deꞌiyo sohoy deꞌiyoogaa Yesuusi yootiis.
◼ “Taani Aawaa matappe sa7aa yaas; qassi sa7aa aggada Aawaakko baana.” (Yohaannisa 16:28) Xoossay ubbasan deꞌiyaaba gidennan issisan deꞌiyoogaa Yesuusi erees.
XOOSSAY hagaa mala giidi qonccissana danddayenna wolqqa gidiyoogaa Yesuusi mule tamaarissibeenna. Hegaappe dumma ogiyan, i Xoossaa haasayissiisinne akko woossiis. I Yihoowa keehippe siiqiyoogaa qonccissiya ogiyan saluwan deꞌiya ta Aawaa giidi darotoo xeegiis.—Yohaannisa 8: 19, 38, 54.
“Xoossai ayyaana” gidiyo gishshau “Xoossaa be7ida asi mulekka” baynnaagee tuma. (Yohaannisa 1:18; 4:24) SHin hagee ayyo bolli baawa giyoogaa gidenna. Geeshsha Maxaafay: “Mereta bollai de7ikko, qassi ayyaanaa bollaikka de7ees” yaagees. (1 Qoronttoosa 15:44) Yaatin, Yihoowayyo ayyaana bollay deꞌii?
Ee. Yesuusi hayquwaappe denddido wode, “i ha77i nu gishshaa Xoossaa sinttan beettanau yaa saluwaa geliis.” (Ibraawe 9:24) Hagee Xoossaa xeelliyaagan keehippe koshshiya naaꞌꞌubata nuna akeekissees. Koyroy, au deꞌiyosay deꞌees. Naaꞌꞌanttoy, i ubbasan deꞌiya, hagaa mala giidi qonccissana danddayenna wolqqa gidenna.
Yaatin, Xoossay ba wolqqaa ubbasan waatidi goꞌettana danddayii? Xoossay geeshsha ayyaanaa woykko ooso bolli deꞌiya ba wolqqaa salo gufanttonne saꞌa micetta ubbasaa yeddana danddayees. Issi aaway ba naꞌaa minttettanaunne kaafanau ba kushiyaa goꞌettiyoogaadan, Xoossaykka ba halchuwaa polanau ba ayyaanaa goꞌettees.—Mazamure 104:30; 139:7, NW.
Xoossaayyo eeshshati deꞌoosona; i dosiyoobaynne ixxiyoobay deꞌees—ubba ufayttanaunne azzananau danddayees. I ba asaa siiqiyoogaa, ba oosuwan ufayttiyoogaa, eeqa goynuwaa ixxiyoogaanne iita oosuwan azzaniyoogaa Geeshsha Maxaafay yootees. (Doomettaabaa 6:6; Zaarettido Wogaa 16:22; 1 Kawotu 10:9; Mazamure 104:31) Koyro Ximootiyoosa 1:11n, (NW) i “ufayttiya Xoossaa” geetettiis. Nuuni ha Xoossaa kumetta wozanaappe siiqanau tamaarana danddayiyoogaa Yesuusi yootidoogee garamissiyaaba gidenna!—Marqqoosa 12:30.a
[Tohossa qofata]
a Hagaa xeelliyaagan aaho qofaa demmanau, Yihoowa Markkatun attamettida Tumuppe Geeshsha Maxaafay Tamaarissiyo Aybee? giya maxaafaa shemppo 1 xeella.
[Sinttaa 5n deꞌiya misiliyaa qonccissuwaa]
Issi aaway ba kushiyaa goꞌettiyoogaadan, Xoossaykka ba halchuwaa polanau ba ayyaanaa goꞌettees