Xilloti Xoossaa Merinau Galatoosona
“Xillo asi . . . merinau . . . hassayettana. . . . A xillotettai merinau de7ees.” —MAZAMURE 112:6, 9.
1. (a) Xoossay xillodan xeelliyoogeeta ufayssiya ayba wodee sinttappe naagii? (b) Ayba oyshi denddii?
XOOSSAY xillo ootti xeelliyo asaa naata ubbaa maalaalissiya wodee sinttappe naagees! Yihoowa loꞌꞌo eeshshata xeelliyaagan eti darobaa tamaariyoogan merinau ufayttana. Xoossay medhido mereta oosota xeelliyaagan eti darobaa erido payduwan eta wozanay galatan kumana. Hegaa mala ufayssiya wodiyan deꞌanau koshshiya waannabay, Mazamure 112y loyttidi qonccissidoogaadan, ‘xillo asa’ gidiyoogaa. SHin geeshshanne xillo gidida Xoossaa, Yihooway nagarancha gidida asaa naata waatidi xillodan xeellana danddayii? Nuuni suure gididabaa oottanau keehippe baaxetiyaaba gidikkokka, balabaa, ubba issi issitoo deexo nagaraa oottoos.—Roome 3:23; Yaaqooba 3:2.
2. Yihooway siiquwan polido maalaalissiya naaꞌꞌubati aybee?
2 Yihooway nagarancha gidida asaa naata xillodan xeellanau oottiyaabaa siiquwan giigissiis. Waatidi? Koyruwan, saluwan deꞌiya ba siiqo Naꞌay polo asa gididi yelettanaadan a deꞌuwaa issi geelaꞌee uluwau aattidi maalaalissiyaabaa oottiyoogaana. (Luqaasa 1:30-35) Hegaappe morkketi Yesuusa worin, Yihooway hara keehippe maalaalissiyaabaa oottiis. Xoossay Yesuusa boncho ayyaana mereta oottidi deꞌuwau denttiis.—1 PHeexiroosa 3:18.
3. Xoossay ba Naꞌau saluwaa deꞌuwaa immidoogan ufayttidoy aybissee?
3 Ba Naꞌay asa gidanaappe kase au baynnabaa immiyoogan Yihooway Yesuusa woytiis—au xayenna deꞌuwaa saluwan immiis. (Ibraawe 7:15-17, 28) Yesuusi iita waayiyan ammanettidi genccido gishshau, Yihooway hegaa ufayssan oottiis. Yesuusi hegaadan oottiyoogan, asaa naati Xoossaayyo oottiyoy bantta goꞌꞌaassa; qassi a keehippe siiqiyoogaappe denddidi gidenna giidi, Seexaanay mootiyo worddo mootuwau bixe zaaruwaa immiyoogan ba Aawaa ufayssiis.—Leemiso 27:11.
4. (a) Yesuusi saluwaa bi simmidi, nuussi ay oottidee? Yihooway shin hegaa waati ekkidee? (b) Yihoowaynne Yesuusi neeyyo oottidobaa waata xeellay?
4 Saluwan Yesuusi harabaakka oottiis. I “nu gishshaa Xoossaa sinttan beettanau,” “ba suuttaa” waagaa ekkidi yaa geliis. Saluwan deꞌiya nu siiqo aaway Yesuusa alꞌꞌo imotaa ‘asa ubbaa nagaraa’ atto giissiya yarshsho oottidi ufayssan ekkiis. Yaatiyo gishshau, nuuni ‘geeshsha zoriya wozanay’ deꞌiyoogeeta gididi, “de7o Xoossau oottana” danddayoos. Hagee Mazamure 112 doomettan,“GODAA galatite!” giya qofaara mogganaadan gaaso gidees.—Ibraawe 9:12-14, 24; 1 Yohaannisa 2:2.
5. (a) Nuuni Xoossaa xeelan xillo gididi deꞌanau ay oottana bessii? (b) Mazamure 111nne Mazamure 112y giigidoy ayba ogiyaanee?
5 Nuuni Xoossaa xeelan xillo gididi deꞌanau, gukkida Yesuusa suuttan ubbatoo ammanana bessees. Yihooway nuna keehippe siiqiyo gishshau, nuuni a ubba galla galatana koshshees. (Yohaannisa 3:16) Xoossaa Qaalaa aggennan xannaꞌanaunne a qofaara moggidi deꞌanaukka baaxetana koshshees. Xoossaa xeelan qumꞌꞌenna zoriya wozanaara deꞌanau koyiya ubbau Mazamure 112y loꞌꞌo zoriyaa oyqqiis. Ha mazamuree Mazamure 111ra gaytotettay deꞌiyoogaa. Beni Ibrayisxxe Qaalan xaafettiyo wode, naaꞌꞌu mazamuretikka, “Asatoo, Yaah galatite!” woy “Haleeluuyaa!” giya qaalan doommoosona; eti huuphiyan huuphiyan 22u maaray deꞌiyoogeeta gidishin, ubba maaratikka doommiyoy Ibrayisxxe pitaliyaa maaraadaana.a
Ufayssau Baaso Gidiyaabaa
6. Mazamure 112n qonccida, Xoossaa yayyiya “asi” anjjettidoy ayba ogiyaanee?
6 “GODAAYYO yayyiyanne a azazuwaa polanau daroppe ufaittiya asi anjjettidaagaa. A naati biittan wolqqaama gidana; suure asatu yeletai anjjettana.” (Mazamure. 112:1, 2) Mazamuraawee koyro “asi” giidi, paydo 2 wurssettan ‘suure asata’ giidi corau laammidoogaa akeeka. Hagee Mazamure 112y daro asay deꞌiyo citaa malaatana danddayiyoogaa bessees. Koyro xeetu layttan deꞌiya Kiristtaanetuura gayttidaagan, Mazamure 112:9n deꞌiya ha qofaa goꞌettanaadan kiitettida PHauloosa geeshsha ayyaanay kaalettiis. (2 Qoronttoosa 9:8, 9 nabbaba.) Kiristtoosa kaalliya, ha wodiyan saꞌan deꞌiyaageeti ufayttana danddayiyoogaa ha mazamuree loyttidi qonccissees!
7. Xoossau oottiyaageeti ayyo bessiya ogiyan yayyana koshshiyoy aybissee? Neeni Xoossaa azazota waatada xeellana koshshii?
7 Mazamure 112:1n odettidaagaadan, tumu Kiristtaaneti ‘GODAAYYO yayyidi’ aara hemettiyoogan daro ufayssaa demmoosona. Yihooway azzanenna mala bessiya ogiyan yayyiyoogee, Seexaanaa alamiyaa ayyaanaa eqettanau eta maaddees. Eti Xoossaa Qaalaa xannaꞌiyoogaaninne a azazuwaa naagiyoogan ‘daroppe ufayttoosona.’ Hegee Kawotettaa mishiraachuwaa saꞌa ubban sabbakanau imettida azazuwaakka gujjees. Eti sinttappe yiya Xoossaa pirddaa gallassaa iita asata akeekissoosona; qassi ubba biittaa asaappe erissiyo ashkkara oottanau baaxetoosona.—Hizqqeela 3:17, 18; Maatiyoosa 28:19, 20.
8. (a) Xoossau aqida asati mishettidi oottiyoogan ha wodiyan waanidi anjjettidonaa? (b) Saꞌaa laattiyo hidootay deꞌiyoogeeta sinttappe ayba anjjoy naagii?
8 He azazota azazettiyo gishshau, ha wodiyan Xoossau oottiyaageetu qooday laappun miilooniyaappe darees. A asay “biittan wolqqaama” gididoogaa kashi gaana danddayiyay oonee? (Yohaannisa 10:16; Ajjuutaa 7:9, 14) Xoossay ba halchuwaa poliyo wode eti keehippe “anjjettana”! Saꞌan deꞌiyo hidootay deꞌiyoogeeti citan, ‘daro waayiyaappe’ attidi “xilloi de7anasaa,” “ooratta sa7aa” gididosona. Armmageedoonappe attiyaageeti guyyeppe keehi “anjjettana.” Hayquwaappe denddiya miilooniyan qoodettiyaageeta eti mokki ekkana. Hegee ayba keehi ufayssiya hidootee! Wurssettan, Xoossaa azazuwan “daroppe ufaittiya” asati polo gidana; qassi “Xoossaa naati ailletettaappe kiyido bonchcho kessaa” kiyidi merinau ufayttana.—2 PHeexiroosa 3:13; Roome 8:21.
Duretettaa Eratettan Goꞌettiyoogaa
9, 10. Tumu Kiristtaaneti bantta ayyaanaabaa duretettaa waatidi goꞌettidonaa? Eta xillotettay merinau deꞌanay ayba ogiyaanee?
9 “Aqotai duretettai a keettan de7ees; a xillotettaikka merinau de7ana. Suure asassi, keha, xillonne qarettiya asatussi xumaa giddon poo7oi poo7ees.” (Mazamure 112:3, 4) Xoossaayyo oottiyaageetuppe beni wode deꞌida amaridaageeti, aquwan dure gidiyoogan erettoosona. Aquwan gidana xayikkonne, Xoossay hara ogiyan tumuppe dure giidoogeeti deꞌoosona. Xoossaa xeelan banttana kaushshanau koyiya daroti, Yesuusa wodiyan deꞌidaageetuugaadan hiyyeesatanne harati kariyoogeeta gidana danddayoosona. (Luqaasa 4:18; 7:22; Yohaannisa 7:49) Issi urau deꞌiya aqoy daro woy guutta gidikkokka, ayyaanaaban dure gidana danddayees.—Maatiyoosa 6:20; 1 Ximootiyoosa 6:18, 19; Yaaqooba 2:5 nabbaba.
10 Tiyettida Kiristtaanetinne etaara oottiyaageeti, bantta ayyaana duretettaa bantta xallau goꞌettokkona. Hegaadan oottiyoogaappe, eti Seexaanaa xuma alamiyan deꞌiya “suure asassi” ‘pooꞌuaa pooꞌissoosona.’ Eti ayyaana aquwaa, giishin Xoossaa aadhida eratettaanne Xoossaa eraa harati goꞌettanaadan maaddiyoogan hegaa oottoosona. Eta morkketi Kawotettaabaa sabbakiyo oosuwaa esissanau baaxetidaba gidikkonne, danddayibookkona. Ubba ha xillotetta oosuwaa ayfee “merinau de7ana.” Paacee deꞌishinkka xillo gididi gencciyoogan, Xoossau oottiyaageeti ‘merinau deꞌanaagaa’ ammanettana danddayoosona.
11, 12. Xoossaa asati bantta aquwaa goꞌettiyo amarida ogeti awugeetee?
11 Xoossaa asati, giishin tiyettidaageetinne “zawai bainna daro” asati bantta aquwaa goꞌettiyoogan keha gidiyoogaa bessidosona. Mazamure 112:9y: “I hiyyeesa asaayyo darissidi immiis” yaagees. Tumu Kiristtaaneti ha wodiyan darotoo bantta aquwaappe bantta mala Kiristtaanetuyyoonne ubba maadoy koshshiyo bantta shoorotuyyookka immoosona. Eti bantta aquwaa meretaa daafay gakkiyo wode maaddiyo oosuwaa kaafanaukka goꞌettoosona. Yesuusi yootidoogaadan, hegaadan oottiyoogee ufayssaa demissiyaaba.—Oosuwaa 20:35; 2 Qoronttoosa 9:7 nabbaba.
12 Hegaa bollankka, ha maxeetiyaa hiyyeesa gidida daro asati haasayiyo, 172u doonatun attamanau kiyiya miishshaa qoppa! Qassi ha maxeetee siyennaageetuyyo malaata haasayan, hegaadankka ayfee xeellennaageetuyyo Bireeliyan giigiyoogaakka qoppa.
Kehanne Suure
13. Kehatettan immiyoogan loꞌꞌo leemiso gidiyaageeti oonee? Nuuni eta leemisuwaa waatidi kaallana danddayiyoo?
13 “Kehatettan coo tal77iya uraayyo . . . kehabai yaana.” (Mazamure 112:5) Harata maaddanau immiya asati darotoo keha gidennaagaa akeekennan aggakka. Issoti issoti immiyoy banttau deꞌiyoogaa bessanaassa woy uufiiddi immoosona. Neeni appe guutta gidiyoogaadan neessi siyettanaadan oottiya urappe woykko neeni a metiyoogaadaaninne ayyo tooho gidiyoogaadan neessi siyettanaadan oottiya urappe maado demmiyoogee ufayssenna. Hegaappe dumma gidida ogiyan, keha urappe maaduwaa demmiyoogee keehi ufayssees. Kehatettan immiyoogan Yihooway waanna leemiso. (Yaaqooba 1:5, 17) Yesuus Kiristtoosi keha gidida ba Aawaa leemisuwaa polo ogiyan qonccissiis. (Marqqoosa 1:40-42) Yaatiyo gishshau, Xoossaa xeelan xillo gidanau, nu shoorotuyyo ayyaana maaduwaa sabbako oosuwan immiyo wode, ufayssaaninne kehatettan immoos.
14. ‘Nu oosuwaa suuretettan oottana’ danddayiyo issi issi ogeti awugeetee?
14 “Ba oosuwaa suuretettan oottiya uraayyo kehabai yaana.” (Mazamure 112:5) Kasetidi odettidoogaadan, ammanettida wozannaama ashkkaray ba Godau deꞌiyaabata Yihoowa suure oosuwaara moggiya ogiyan oyqqees. (Luqaasa 12:42-44 nabbaba.) Hagee gubaaꞌiyan deexo nagaray oosettiyo wode, gubaaꞌiyaa cimati hegaa oyqqiyo ogiyaa xeelliyaagan etau imettiya Geeshsha Maxaafaa kaaletuwan qonccees. Ubba gubaaꞌetun, miisooneti deꞌiyo keettatuuninne Beeteele keettatun oosettiyaabaa Geeshsha Maxaafan baasettida kaaletuwan oyqqiyo ogiyankka ammanettida wozannaama ashkkaraa suure oosoy qoncciis. Gubaaꞌiyaa cimatu xalla gidennan, hara Kiristtaanetikka issoy issuwaara deꞌiya gaytotettaaninne ammanennaageetuura deꞌiya gaytotettan suure oosuwaa oottana bessees; hegee zalꞌꞌiyaara gayttidabaakka gujjees.—Mikiyaasa 6:8, 11 nabbaba.
Xilloti Demmiyo Anjjuwaa
15, 16. (a) Alamiyan odettiya iita odoy xilloti waananaadan oottii? (b) Xoossaassi oottiyaageeti aggennan ay oottanau murttidonaa?
15 “Xillo asi audenne kunddenna; merinau i hassayettana. Iitabaa i siyikkokka dagammenna; aissi giikko, a wozanai yeeqenna; GODAN i ammanettees. A wozanai xala gidiyo gishshau, mulekka i yayyenna; wurssettan ba morkketi xoonettin be7ana.” (Mazamure 112:6-8) Hagaappe kase wodetun, hagaa keena olaa, shabbirssaa, ooratta harggiyaanne xayida harggee wotti yeggidi doommiyoogaa, danuwaa, hiyyeesatettaanne bashshaa kaalettiya ogiyan heeray moorettidoogaa xeelliyaagan odettiya iita odoy ha wodiyaagaadan mule dari erenna. Xoossaa xeelan xillo gididaageetakka he iita odoy hirggissana danddayees; shin eti hidootaa qanxxanaadan oottenna. Hegaappe, eti Xoossay ehiyo ooratta alamee matattidoogaa eriyo gishshau, eta wozanay “yeeqenna” qassi sinttanaabaa ammanettidi xalan naagiyo gishshau ‘yayyokkona.’ Meretaa daafay gakkiyaaba gidikkonne, eti Yihoowa maaduwan ammanettiyo gishshau, he hanotaa xooni kiyana danddayoosona. I xilloti ‘kunddanaadan’ mule paqqadenna; eti genccanaadan maaduwaanne wolqqaa immees.—Piliphphisiyuusa 4:13.
16 Xoossay xillodan xeelliyoogeeti banttana eqettiyaageetu ixuwaanne eti aassiyo wordduwaakka danddayana koshshiis; shin hagee tumu Kiristtaaneti sabbakennaadan mule diggenna. Hegaappe, Xoossau oottiyaageeti Yihooway etau immido oosuwaa yeeqennaaninne minnidi aggennan oottoosona; he oosoy Kawotettaabaa sabbakiyoonne siyanau koyiya ubbaa erissiyo ashkkara oottiyoogaa. Wurssettay matattiyo wode, xillotu bolli gakkiya yedetay dariyoogee sirissenna. Seexaanaa Dabloosi Googanne Maagooga gididi alame yuushuwan qohuwaa gattiyo wode, hegaa mala ixoy wurssetta xekkaa gakkees. Hegaappe, wurssettan, ‘nu morkketi’ kawushsha xoonuwaa xoonettin beꞌana. Yihoowa sunttay muleera geeyin beꞌanaagee ayba gita maatee!—Hizqqeela 38:18, 22, 23.
“Bonchchuwan Xoqqu Gees”
17. Yihooway xillo oottidi xeelliyo uri waanidi “bonchchuwan xoqqu” gii?
17 Dabloosinne a alamee gattiyo ixoy xayin, Yihoowa issippe galatanaagee ayba ufayssiyaabee! Xoossaa xeelan xillo gididi deꞌiya ubbay ufayssan merinau Yihoowa galatana. Xillotu ‘kacee bonchuwan xoqqu gaanaagaa’ Yihooway qaalaa gelido gishshau, eti xoonettokkona. (Mazamure 112:9) Yihooway xillo oottidi xeelliyo uri Yihooway ubbaappe xoqqa gidiyoogaa eqettiya morkketi ubbay xoonettiyoogaa beꞌiyoogan xoonida uradan xoqqu gaana.
18. Mazamure 112 kuushshan deꞌiya qaalati waanidi polettanee?
18 “Iita asi hegaa be7idi yiillotees; achchaa garccidi, coo xayees. Iita asa amoi coo attana.” (Mazamure 112:10) Xoossaa asaa aggennan ixxiya ubbay bantta qanaatiyaaranne ixuwaara ‘coo xayana.’ Eti nu oosoy xayin beꞌanau amottiyo amoy sinttappe yaana ‘iita waayiyaa’ wode coo attana.—Maatiyoosa 24:21.
19. Nuuni aybin ammanettana danddayiyoo?
19 Neeni wolqqaama xoonuwaa wode attiya ufayttiyaageetu giddon deꞌanee? Woy Seexaanaa alamee xayanaappe kase neeni sahuwaa woy ceegatettaa gaasuwan hayqqiyaaba gidikko, hayquwaappe denddiya ‘xillotu’ giddon neeni deꞌanddee? (Oosuwaa 24:15) Mazamure 112n qonccida xillo ‘asan’ leemisettidaageeti oottiyoogaadan, neeni Yesuusa wozuwaa yarshshuwan ubbatoo ammaniyaabanne Yihoowa kaalliyaaba gidikko, hegaa zaaroy ee giyaagaa gidana danddayees. (Efisoona 5:1, 2 nabbaba.) Yihooway hegaa mala asi ‘hassayettanaadan’ ootteesippe attin, dogettanaadan mule oottenna; xillotu oosuwaakka guuttidi xeellenna. Yihooway eta meri merinau hassayananne siiqana.—Mazamure 112:3, 6, 9.
[Footnotes]
a Ha naaꞌꞌu mazamuretussi issoy issuwaara gaytotettay deꞌiyoogee eti giigido hanotaappenne eta giddon deꞌiya qofaappe akeekettees. Mazamure 111n nashettida Xoossaa eeshshata, Mazamure 112n qonccida Xoossaa yayyiya “asi” kaalliis; hegaa Mazamure 111:3, 4, Mazamure 112:3, 4ra gatti xeelliyoogan akeekana danddayettees.
Wotti Dentti Qoppanau Maaddiya Oyshata
• Nu cenggurssaa xoqqu oottidi, “Haleeluuyaa” gaanaadan oottiya gaasoti awugeetee?
• Tumu Kiristtaaneti keehippe ufayttanaadan oottiya ha wodiyan deꞌiya dichay aybee?
• Yihooway siiqiyoogeeti ay mala ogiyan immiyaageetee?
[Sinttaa 23n deꞌiya misiliyaa]
Xoossaa xeelan xillo gididi deꞌanau, gukkida Yesuusa suuttan nuuni ammanana koshshees
[Sinttaa 24n deꞌiya misiliyaa]
Dosan immiyo imotay daafay gakkidoogeeta maaddanaunne Geeshsha Maxaafan baasettida xuufeta asau gattanau maaddees