Geeshsha Maxaafaa Akeekana Danddayay?
“Woggaa gallassi ubbatoo nu soo asay Geeshsha Maxaafaa nabbabees. Hegee tana darin ufayssenna. Geeshsha Maxaafay Xoossaa Qaala gidiyoogaa taani ammanays; shin taani nabbabiyoobaappe daro baggay akeekanau keehippe metees.”—Isttefen, Birttaaniyaa.
“Tau layttay 17 gidido wode, Geeshsha Maxaafaa nabbabanau malaas. Akeekanau metido gishshau, agga bayaas.”—Balbbaneero, Isppeene.
“Kaatolike gidiyo gishshau, Geeshsha Maxaafaa nabbabanau koshshiyoogaadan tau siyettin, issi wode nabbabaas. Heezzu layttan nabbabada wurssaas. SHin aybanne akeekabeykke.” —Jo-Ano, Awusttiraaliyaa.
ALAME yuushuwan Geeshsha Maxaafay keehippe erettida maxaafa. Geeshsha Maxaafay, awudeegaappenne aaruwan kaaseetiyaa, siidiyaanne DVD malatiyaabatun, qassi daro doonatun giigiiddi, daro asaa gakkiiddi, ayba maxaafaappenne aaruwan bayzettiiddi deꞌees. Gidikkokka, Geeshsha Maxaafay deꞌiyo daroti a akeekanau metootoosona. Ne hanotaykka hegaa malee?
Xoossay Nuuni A Qaalaa Akeekanaadan Koyii?
Geeshsha Maxaafay: “Xoossaa maxaafa ubban Xoossaa Ayyaanai de7ees” yaagees. (2 Ximootiyoosa 3:16) Ee, Xoossaa Yihooway nuussi Geeshsha Maxaafaa immiis. Nuuni a Qaalaa akeekanaadan i koyii? Woykko eriiddi, qeesetunne Geeshsha Maxaafaa eranchatu mala doorettida amarida asatussippe attin, hara asaassi Geeshsha Maxaafay akeekettenna mala oottidee?
Kaallidi deꞌiya Geeshsha Maxaafaa xiqiseta qoppa:
“Taani hachchi inttena azaziyo ha azazoi hegaa keena deexo gidenna; intteppe haahokka gidenna.”—Zaarettido Wogaa 30:11.
“Ne qaalaa birshshettai poo7uwaa immees; akeekai paccidoogeetussi akeekaa immees.”—Mazamure 119:130.
“Yesuusi he wode Geeshsha Ayyaanan ufaittidi, hagaadan yaagiis; ‘Ta Aawau, saluwaa sa7aa Godau, neeni hagaa aadhdhida eranchchatuppenne akeekanchchatuppe genttada, erenna naatussi qonccissido gishshau, nena galatais; ee, ta Aawau, aissi giikko, hegee ne shenedan oosettiis.’”—Luqaasa 10:21.
Ee, tumukka Xoossay nuuni a Qaalaa Geeshsha Maxaafaa akeekanaadan koyees. Gidikkonne, daro asay Geeshsha Maxaafaa akeekanau metootees. Akeekanaadan aybi maaddana danddayii? Kaallidi deꞌiya huuphe yohoti, neeni Geeshsha Maxaafaa akeekanaadan maaddana danddayiya heezzu qofaa qonccissoosona.