Loꞌꞌo Haymaanootee Loꞌꞌo Kandduwaa Maaraa Tamaarissees
LOꞌꞌO haymaanootee loꞌꞌobaa waatidi qoppana danddayiyaakko tamaarissees; qassi nu eeshshaa waatidi loyttana danddayiyaakko qonccissees. Nuuni loꞌꞌobaa oottanau baaxetiyoogan maaddees; qassi nuuni loꞌꞌo asa gidanaadan maaddees. Loꞌꞌo haymaanootee hegaadan oottana danddayiyoogaa waatidi eriyoo?
Koyro xeetu layttan Giriike biittan Qoronttoosan deꞌiya Kiristtaanetuyyo kiitettida PHauloosi xaafidobaa akeeka. He katamay iita kandduwan erettidaagaa. PHauloosi: “SHaaramuxana qaaqqatiyaageeti woi eeqassi goinniyaageeti woi shaaramuxiyaageeti woi attumaasa gidiiddi, attumaasaara shaaramuxiyaageeti, woi kaisoti woi miishshaa amottiyaageeti woi mattottiyaageeti woi cayiyaageeti woi bonqqiyaageeti Xoossaa kawotettaa laattokkona” yaagidi akeekissiis. Hegaappe PHauloosi gujjidi yaagiis: “Intteppekka issi issi asai hegeetu mala. SHin Godaa Yesuus Kiristtoosa sunttaaninne nu Xoossaa Ayyaanan intte meecettidetanne geeyideta; qassi xillideta.” (1 Qoronttoosa 6:9-11) Kase kandduwaa maaraa kaallennaageeti Xoossau oottiya, geeshshanne xillo asa gidanaadan loꞌꞌo haymaanootee maaddidoogaa akeeka!
Hegaappe dumma hanotan, Geeshsha Maxaafay: “Asai tumu timirttiyaa ezggennan ixxiyo wodee yaana. SHin asai bantta amuwaa kaallidi, siyanau ufaissiyaabaa yootiya tamaarissiyaageeta gujji gujji shiishshana” yaagidi akeekissees.—2 Ximootiyoosa 4:3.
Ha allaalliyaa xeelliyaagan neeni eriyo haymaanooteti ay oottiyoonaa? Eti loꞌꞌuwaanne iitaa xeelliyaagan Geeshsha Maxaafaa kandduwaa maaraa kaalliyoonaa? Woy asay ‘siyanau ufayttiyoobaa’ xallaa yootiyoogan Xoossaa Qaalan deꞌiya qoncce zoriyaa xaasayiyoonaa?
Issi haymaanootee loꞌꞌo ayfiyaa ayfiyaakkonne shaakkada eranau nena maaddanaadan kaallidi deꞌiya oyshata ayssi akeekan zaarikkii?
HUUPHE YOHUWAA: Ekuwaanne geluwaa.
GEESHSHA MAXAAFAY TAMAARISSIYOOBAA: “Ekkiyoogaanne geliyoogaa asai ubbai bonchchanau bessees; qassi azinainne machchiyaa issoi issuwau ammanettanau bessees; aissi giikko, Xoossai shaaramuxanau qaaqqatiyaageetanne shaaramuxiyaageeta pirddana.”—Ibraawe 13:4.
OYSHAA: Ha haymaanootee ba yame gidida issi attumaageenne issi maccaara issippe deꞌanau higgiyan paramettana koshshiyoogaa tamaarissii?
HUUPHE YOHUWAA: Macho yeddiyoogaa.
GEESHSHA MAXAAFAY TAMAARISSIYOOBAA: Macho yeddanau gaaso gidiyaabi deꞌiyaakkonne oychido wode, Yesuusi: “Ba machchiyo shaaramuxennan de7ishin yeddidi, haranno ekkiya ooninne shaaramuxees; harai yeddidooro ekkiyaageekka shaaramuxees” yaagiis.—Maatiyoosa 19:9.
OYSHAA: Macho yeddanaadan paqqadiyaaba gidikko, ha haymaanootee Yesuusa azazuwaa bonchidi hegaadan oottiyoy shaaramuxiyoogaara gayttidaba xalaalaanee?
HUUPHE YOHUWAA: Asho gaytotettaa xeelliyaabaa.
GEESHSHA MAXAAFAY TAMAARISSIYOOBAA: “SHaaramuxappe baqatite. Issi urai oottiyo hara nagara ubbai a bollaappe kareera de7ees; shin shaaramuxiyaagee ba bolli nagaraa oottees.”—1 Qoronttoosa 6:18.
“Harai atto eta maccaasai banttau bessiyaabaa aggidi, bessennabaa hanidosona. Hegaadankka, attumaasai qassi bau bessiyoogaadan maccaasaara gaittiyoogaa aggidi, issoi issuwaara gaittanau qaaqqatidosona; attumaasai issoi issuwaara borssobaa oottidi, bantta oottido balan banttau bessiya pirddaa ekkidosona.”—Roome 1:26, 27.
OYSHAA: Ha haymaanootee attumay maccaara, attumay attumaara woykko maccay maccaara shaaramuxiyoogee nagara gidiyoogaa tamaarissii?
HUUPHE YOHUWAA: Yameti Geeshsha Maxaafaa baaso siraataa kaafanaadan xalatettan minttettiyoogaa.
GEESHSHA MAXAAFAY TAMAARISSIYOOBAA: “Ishantta ha77i geetettiyaageetuppe issoinne shaaramuxana qaaqqatiyaagaa woi miishshaa amottiyaagaa woi eeqassi goinniyaagaa woi cayiyaagaa woi mattottiyaagaa woi bonqqiyaagaa gidikko, intte aara issippe gaittenna mala, . . . hegaa malaara harai atto, qumaakka mooppite.” (1 Qoronttoosa 5:11) Banttana Kiristtaane giiddi nagaraappe simmennaageeta waatana koshshii? Xoossaa Qaalay: “He iitabaa oottiya uraa intte giddoppe kessirggite” yaagees.—1 Qoronttoosa 5:13.
OYSHAA: Geeshsha Maxaafaa baaso siraataa kanttidi nagaraappe simmenna ura ha haymaanootee bohii?
[Sinttaa 6n deꞌiya misiliyaa qonccissuwaa]
Geeshsha Maxaafaa kandduwaa maaraa kaafiyoogan nashettiya haymaanootee awugee?