Alamiyaa Laammida Yesuusa

Biilooniyan qoodettiya asay ha saꞌan deꞌidi hayqqiis. Etappe dariya baggay daro asaa goꞌꞌiyaabaa oottibeenna. SHin amaridaageeti taarikiyan gitabaa, ubba qassi galla galla deꞌuwan nena goꞌꞌiyaabaa oottidosona.

WONTTAARA denddada oosuwau baanau giigettaasa. Giigettiyo wode korinttiyaa pooꞌissaasa. Kaame giddon nabbabanau maxaafaa woykko maxeetiyaa oyqqaasa. Sahuwau haakimee azazido antibayotike xaliyaa hassayada mittaasa. Saꞌay wonttosaara, erettida amarida asati oottidoban goꞌꞌettadasa.

Mikaaꞌel Faraday Yelettidoy 1791na; i Inggilize biittaa asa gidida piizikisiyaa erancha; elekttirike motoriyaanne jenereteriyaa i medhiis. I medhidobay daro asay korinttiyaa goꞌettanaadan maaddiis.

Tsi Lun I CHayna biittan kawo keettan oottiya asa gidishin, 105 M.L. heeran woraqataa giigissiyo ogee diccanaadan oottiis; hegee daro woraqataa issi kutti giigissanaadan maaddiis.

Yohaanis Gutenberg Jarmane asa gidida ha bitanee 1450 heeran qaaxxiyaabi deꞌiyo attamiyo maashiniyaa medhiis. He maashinee hiraysuwan attamanau maaddiis; yaatiyo gishshau, daro huuphe yohuwan xaafettidabaa ubbasan demmanau maaddiis.

Aleksandder Fleming Iskkotllandde biitta asa gidida ha saynttisttee baktteeriyaa woriya pensiliine giyo antibayotikiyaa demmiis. Antibayotikee baktteeriyaappe oyqqiya sahuwau asay ha wodiyan darosan goꞌettiyo xale.

Amarida asati demmidobay biilooniyan qoodettiya asaa goꞌꞌiyaaba woykko eta payyatettau maaddiyaaba gididoogee qoncce.

Gidoppe attin, issi uri haratu ubbaappe dumma. I erettidoy saynisiyan woy akkamuwan oorattabaa demmidoogaana gidenna. Hegaappe dumma hanotan, 2,000 gidiya layttappe kase hayqqida, xoqqu oottidi xeelliyo asa gidenna ha bitanee asau hidootay deꞌanaadan oottiyaabaanne minttettiyaabaa yootiis. I tamaarissidobay kumetta saꞌan asaa deꞌuwaa ay keena goꞌꞌidaakko akeekiyo wode, daroti he uri tumuppe alamiyaa laammidoogaa maayoosona.

Hegee Yesuus Kiristtoosa. I aybaa xeelliyaagan sabbakidee? Hegee ne deꞌuwaa waatidi goꞌꞌana danddayii?