Armmageedoona Xeelliyaagan Tumaa

“Iita ayyaanati . . . sa7aa kawota ubbaa . . . Ibraisxxe qaalan Armmageedoona giyo sohuwaa shiishshidosona.”—AJJ. 16:14, 16.

ARMMAGEEDOONA giya qaalay soho suntta. Gidikkokka, he sohoy ha saꞌan deꞌida soho milatenna.

Yaatin, “Armmageedoona” giya qaalay tumuppe ayba qofa qonccissii? He qaalay darotoo olaa mala hanotaara gayttidaba gidiyoy aybissee?

Armmageedoona Giyo Sohuwaa SHiishshidosona

Har–Mageedon giya Ibraysxxe qaalaa birshshettay “Magiddo Deriyaa” giyoogaa. He sunttan xeesettiya deree hanno gakkanaashin deꞌennaba gidikkokka, Magiddo giyo sohoy deꞌees. He sohoy beni Israaꞌeelati deꞌiyo sohuwaappe arggo baggan huuphessan yaara kanttiya naaꞌꞌu gita ogeti gayttiyoosan deꞌiya, keehi goꞌꞌiya soho. He sohuwaa matan Xoossaa asaa goꞌꞌida daro olati denddidosona. Yaatiyo gishshau, Magiddo giya sunttay olaara gayttidi erettiis.a

SHin, Magiddo giya qaalay he sohuwan ayba olati denddidaakko qonccissiyaaba gidennan, he olati denddidoy aybissakko qonccissiyaaba. Magiddoy Xoossaa Yihooway Israaꞌeelatuyyo immido Hidootaa Biittan deꞌiya soho. (Kes. 33:1; Yaa. 12: 7, 21) Oliya asatuppe Israaꞌeelata ashshanau Xoossay qaalaa geliis, qassi hegaadankka oottiis. (Zaa. 6:18, 19) Leemisuwau, Kanaanetu Kawuwaa Yaabina olanchatinne a olanchatu gadaawaa Sisaari Israaꞌeelata olanau yiido wode, Yihooway eta maalaaliya ogiyan ashshidoy Magiddoona.—Daan. 4:14-16.

Yaatiyo gishshau, “Armmageedoona” giya qaalay leemiso hanotan gitabaa qonccissees. He qaalay naaꞌꞌu wolqqaama citati olettiyoogaara gayttidaba.

Seexaanaynne dayddanttati, saꞌaa kawotettati bantta olanchata shiishshanaadan mata wode denttettanaagaa Ajjuutaa maxaafan deꞌiya hiraagay yootees; yaatiyoogan eti Xoossaa asaanne eta oosuwaa keehippe eqettidi denddana. He denddidaageeta Xoossay xooniyo wode, he olan miilooniyan qoodettiya asay hayqqana.—Ajj. 19:11-18.

Geeshsha Maxaafay “maariyaagaa, siiquwan kumidaagaanne hanqquwaassi e[e]sotennaagaa” gidiyoogaa yootiyo Xoossay hegaa keena daro asaa woriyoy aybissee? (Nah. 9:17) Xoossay oottanabaa akeekanau nuuni heezzu oyshata zaarana koshshees: (1) Olaa doommiyay oonee? (2) Xoossay olettiyoy aybissee? (3) He olay saꞌaunne an deꞌiya asau demissana merinaa goꞌꞌay aybee?

1. OLAA DOOMMIYAY OONEE?

Armmageedoona olay Xoossay denttiyo ola gidenna. Hegaappe dumma hanotan, Xoossay loꞌꞌo asaa eta xayssanau koyiyaageetu kushiyaappe ashshanau olettees. He olaa doommiyaageeti alamiyaa haariya, “sa7aa kawota ubbaa.” Eti olaa denttiyoy aybissee? Seexaanay ashangguluutedan ba koyidoogaadan oottiyo kawotetta dirijjitetinne wotaaddara dirijjiteti Xoossaa Yihoowayyo goynniyaageeta xayssanaadan denttettiyo gishshataassa.—Ajj. 16:13, 14; 19:17, 18.

Ha wodiyan issi issi biittan asay laꞌatettan haasayiyoogaa, qassi laꞌatettan haymaanootiyaa kaalliyoogaa xoqqu oottidi xeelliyoogaa qoppiyo wode, kawotettati haymaanootiyaara gayttida ay oosonne zaggidi teqqanau woy ubba muleera digganau malanaagee qoppanau danddayettennaba milatana danddayees. Gidikkokka, 20tta xeetu layttan hegaa malabay haniis; haꞌꞌikka haniiddi deꞌees.b Gidoppe attin, Armmageedoona olay denddanaadan oottiya qohoy hegaappe kase gakkida qohuwaappe, guuxxiis giishin naaꞌꞌu waanna allaalletun dummatees. Koyruwan, he qohoy alame yuushuwan gakkana. Naaꞌꞌanttuwan, Yihooway hegaappe kase ekkido tanggo ubbaappe keehi wolqqaama tangguwaa ekkidi kushiyaa zaarana. (Erm. 25:32, 33) Geeshsha Maxaafay he olaa, ‘Ubbaappe Wolqqaama Xoossaa gita gallassaa olaa’ yaagees.

2. XOOSSAY OLETTIYOY AYBISSEE?

Yihooway baayyo goynniyaageeti sarotettan deꞌanaadaaninne bantta morkketa siiqanaadan tamaarissees. (Mik. 4:1-3; Maa. 5:43, 44; 26:52) Yaatiyo gishshau, eti he wolqqaama qohoy banttana gakkiyo wode teqqanau olettokkona. Xoossay ba asaa ashshanau tangguwaa ekkennaba gidiyaakko, eti muleera xayana shin. Hegaadan haniyaakko, Xoossaa Yihoowa sunttay moorettees. Olaa denttiyaageeti A asaa xayssiyaaba gidikko, hegee Yihooway siiqenna, suurebaa oottenna woykko ayyo wolqqi baawa giidi asay qoppanaadan oottees. Hegee hanana danddayennaba.—Maz. 37:28, 29.

Xoossay oonanne xayssanau koyenna; hegaa gishshau, i asay naagettanaadan ba oottanabaa kasetidi yootees. (2 PHe. 3:9) I Geeshsha Maxaafan xaafissido taarikiyaa baggaara, beni ba asay qohettiyo wode i kushiyaa zaaridoogaa ubba asau akeekissees. (2 Kaw. 19:35) Sinttappe Seexaanaynne i ba koyidobaa ootissiyo asati Xoossaa asaa bolli denddiyo wode, Yihooway he wodiyankka ba asaa xayssanau koyiyaageetu bolli tangguwaa ekkanaagaa Geeshsha Maxaafay yootees. Yihooway iitata xayssanaagaa Xoossaa Qaalay daro wodiyaappe kase yootiis. (Lee. 2:21, 22; 2 Tas. 1:6-9) He wode, olettiyaageeti Ubbaa Danddayiya Xoossaara olettiyoogaa akeekanaagee sirissenna.—Hiz. 38:21-23.

3. HA OLAY DEMISSANA MERINAA GOꞌꞌAY AYBEE?

Armmageedoona olay miilooniyan qoodettiya asay attanaadan oottees. Hegee saꞌan sarotettay yaana wodiyau doometta.—Ajj. 21:3, 4.

Ajjuutaa maxaafay he olaappe attana, qooday hagaa keena geetettibeenna, “zawai bainna daro” asaabaa yootees. (Ajj. 7:9, 14) He asati Xoossaa kaaletuwaa kaallidi, Yihooway koyro halchidoogaadan saꞌaa Gannate oottiyo oosuwan maaddana.

Xoossaa asaa bolli he qohoy awude gakkanaakko eriyoo?

[Tohossa qofata]

[Sinttaa 6n deꞌiya misiliyaa qonccissuwaa]

Xoossaa Yihooway beni wode ba asaa ashshiis

[Sinttaa 7n deꞌiya misiliyaa qonccissuwaa]

Yihooway Armmageedoona olaa wodekka ba asaa ashshana