Xoossaa Qaalaappe Tamaara

Nuuni Xoossaa Sunttaa Goꞌettana Koshshiyoy Aybissee?

Ha huuphe yohoy neeni oychidoba gidana danddayiya oyshatu zaaruwaa qonccissees; qassi he zaarota Geeshsha Maxaafan awan demmana danddayiyaakko yootees. Yihoowa Markkati he zaarota nenaara tobbanau ufayttoosona.

1. Xoossay baayyo sunttaa kessidoy aybissee?

Nena “bitaniyau” woy “maccaasee” giidi xeesiyoogaappe ne sunttan xeesanaadan neeni koyiyoogee erettidaba. Sunttay nena hara asaappe shaakkidi eranau maaddees. Xoossay, ‘Ubbaa Haariya GODAA,’ “Ubbaa Danddayiya Xoossaa,” qassi “Medhdhidaagaa” giyaagaa mala boncho sunttan xeesettees. (Doo. 15:2; 17:1; Era. 12:1) SHin Xoossay nuuni aara dabbotaa medhanaadan maaddanau baayyo sunttaa kessiis. Xoossau buzo sunttay Yihoowa.—Isiyaasa 42:8a nabbaba.

Daro Geeshsha Maxaafaa birshshettati Xoossaa sunttaa sohuwan “Xoossaa,” qassi “Godaa” giyaagaa mala sunttaa xaafidaba gidikkokka, beni wode Ibraysxxe qaalan kushiyan xaafettida Geeshsha Maxaafaa xuufetun he sunttay 7,000 gidiya sohuwan deꞌees. Xoossay ba sunttay erettanaadan koyiyoogee qoncce.—Isiyaasa 12:4 nabbaba.

2. Xoossaa sunttaa erana koshshiyoy aybissee?

Xoossaa sunttaa eriyoogee he sunttaa woygi xeesiyaakko eriyoogaa xalla gidenna. He sunttan xeesettiya Xoossaa eranau aara mata dabbotaa medhana koshshees. Yihoowa giya sunttaa birshshettay “Hananaadan Oottees” giyoogaa. Yihoowa sunttaa birshshettay Xoossay ba halchuwaa polanau koshshiya ubbabaa haniyoogaa bessees. Yaatiyo gishshau, Xoossay ba gelido qaalaa polanaagaa ammaniyoogee Xoossaa sunttaa eriyoogaa qonccissees. (Maz. 9:10) Xoossaa sunttaa eriyaanne an goꞌettiya asaa ammanoy, eti an ammanettanaadaaninne bantta deꞌuwan a kaseyanaadan denttettees. Xoossaa Yihooway hegaa mala asaa naagees.—Mazamure 91:14 nabbaba.

3. Xoossay ba sunttay erettanaadan koyiyoy aybissee?

Xoossay asay a sunttaa eranaadan koyiyoy hegee eta goꞌꞌiyo gishshataassa. Hegee eti Xoossaa dabbo gidanaadaaninne merinau deꞌanau hidootanaadan maaddees. Yihooway nuuni a sunttaa erissanaadan koyiyoogee qoncce!—Yohaannisa 17:3; Roome 10:13, 14 nabbaba.

Yesuusi Xoossaa ogiyaa, A higgiyaanne I qaalaa gelidobaa asaa tamaarissiyoogan, Xoossaa sunttay erettanaadan oottiis. Ha wodiyan, Yesuusa kaalliyaageeti asa ubbau Xoossaa sunttay erettanaadan oottiiddi deꞌoosona. Eti ‘Xoossaayyo [“a sunttaayyo,” NW] haniya asaa’ gididi issippe hegaa oottoosona.—Oosuwaa 15:14; Yohaannisa 17:26 nabbaba.

4. Xoossay ba sunttaa bonchanay ayba ogiyaanee?

Xoossaa Yihooway ba sunttay bayido gishshau bonchanau koyees. Leemisuwau, issi issi asay i deꞌon deꞌiyaaba medhibeenna, qassi nuuni ayyo azazettanau koshshenna yaagees. Harati, i nuussi qoppenna goosona; qassi tuggaa gaasuwan a amassaloosona. Hegaa mala asay Xoossaa sunttaa moorees. SHin eti merinau hegaadan moorokkona. Xoossay ba sunttaa toochiyaageeta xayssana.—Mazamure 83:17, 18 nabbaba.

Yihooway ba Kawotettay asa haaruwaa ubbaa xayssidi, asaa naati woppu giidi sarotettan deꞌanaadan oottiyo wode, ba sunttaa bonchana. (Dane. 2:44) Mata wode, ubba asay Yihooway tumu Xoossaa gidiyoogaa erana.—Hizqqeela 36:23; Maatiyoosa 6:9 nabbaba.

Neeni ay oottana koshshii? Xoossaa Qaalaa xannaꞌiyoogaaninne a siiqiyaageetuura dabbotiyoogan Xoossaakko shiiqa. Yihooway ba sunttaa bonchiyo wode, ammanettida ba ashkkarata hassayana.—Mil. 3:16.

[Tohossa qofaa]

Gujo qofaa demmanau, Yihoowa Markkati attamissido, ha maxaafaa shemppo 1 xeella. Tumuppe Geeshsha Maxaafay Tamaarissiyoy Aybee?

[Sinttaa 10n deꞌiya misiliyaa qonccissuwaa]

Beni wode Ibraysxxe xuufiyan deꞌiya Xoossaa sunttaa