Ishatamu Layttau Kumetta Wode Haggaazido Haggaazuwaa

NUUNI Finlandde biittan, Osttirobotiniyaa giyoosan, huuphessa baggan yelettida. Nu soo asay goshshancha; qassi nu soo naati tamma. Naatettan deꞌiyo wode Naaꞌꞌantto Alamiyaa Olan qohettida. Nuuni olaa dembbaappe xeetan qoodettiya kilomeetiriyaa haakkidi deꞌikkokka, hegaappe simminkka he olay nuuni yayyanaadan oottiis. Nu heeran deꞌiya Oolunne Kalajoki giyo katamatun bombbee xuuqqin, qammi saluwan baara milatiya pooꞌuwaa beꞌida. Nuuni olaa horophilee saluwan paallishin beꞌikko, sohuwaara qosettanaadan nu aawaynne aayyiyaa zoridosona. Nu bayra ishaa Tawunoy pirdda paci baynna gannate saꞌaabaa nuuyyo yootido wode, keehippe ufayttida.

Tawunoy ayyo layttay 14 gidido wode, Geeshsha Maxaafaa tumaa Geeshsha Maxaafaa tamaaretu xuufiyaappe eriis. A zoriya wozanay Geeshsha Maxaafan loohido gishshau, Naaꞌꞌantto Alamiyaa Olay doommido wode olettennan ixxidi, qasho keettan qashettiis. Yan a keehi qohidosona. Hegee i Yihoowayyo oottanau murttidoogan yaa minnanaadan oottiis; qassi qasho keettaappe kiyi simmidi kaseegaappe aaruwan mishettidi haggaaziis. Nu ishaa loꞌꞌo leemisoy Yihoowa Markkati nu heeran shiiqiyo shiiquwaa baanaadan nuna minttettiis. Ogiyau koshshiya miishshaa dagayanau minnidi oottana koshshikkokka, nuuni awuraajjaa shiiquwaakka boos. Nuuni sunkkuruutuwaa tokkoos; henjeeraa maxoos; qassi nu shoorotuyyo maayuwaa sikkoos. Nu gaden oottiyo darobay deꞌiyo gishshau, darotoo awuraajjaa shiiquwaa issippe baana danddayokko; yaatiyo gishshau, kayan kayan boos.

Yihoowabaanne a halchuwaabaa tamaarido tumay nuuni a keehippe siiqanaadan maaddido gishshau, nu huuphiyaa ayyo geppanau qofaa qachida. Nuuni naaꞌꞌaykka 1947n xammaqettida—he wode Aniki layttay 15, qassi Ayli layttay 17. Nu michiyaa Saymakka he laytti xammaqettaasu. Azina gelada ba son deꞌiya nu michiyo Liniyookka Geeshsha Maxaafaa xannaꞌissida. Akka i soo asaykka Yihoowa Markka gididosona. Nuuni xammaqetti simmidi aqinye gidanau halchidi, shemppiyo wode (woy kaafiya) aqinye gididi issi issitoo haggaazoos.

KUMETTA WODE HAGGAAZUWAA DOOMMIYOOGAA

Nuuni deꞌiyoosaappe huuphessa baggan haakkidi deꞌiya Kemi giyo kataman deꞌanau 1955n biida. Nuuni naaꞌꞌaykka kumetta gallassaa oottikkokka, aqinye gidanau koyoos; shin nuna miishshay metanaakkonne giidi hirggida. Yaatiyo gishshau, koyro amarida miishshaa dagayana koshshees giidi qoppida. Qommoora ibaa denttido aqinye micheera nuuni tobbidoy he wode. Hegee, Yihoowayyo kumetta wode haggaaziyoogee nuuyyo deꞌiya aquwaara woy nu soo asay maaddiyoogaara gayttidaba gidennaagaa nuuni akeekanaadan maaddiis. Keehi koshshiyaabay saluwan deꞌiya nu Aawan ammanettiyoogaa.

He wode, naaꞌꞌu aginau gidiya miishshay nuussi deꞌees. Yaatiyo gishshau, Lapilande giyoosan Arkitika Yafaraappe qommoora deꞌiya Pelo kataman naaꞌꞌu aginau aqinye gididi haggaazanau, Uddufune 1957n yayyiiddi oychida. Nuuni dagayido miishshaa naaꞌꞌu aginappe guyyiyankka aynne bochibookko; yaatiyo gishshau, hara naaꞌꞌu aginau aqinye gididi haggaazanau oychida. Hara naaꞌꞌu aginau haggaazi simminkka he miishshay ubbay deꞌees. He wode, Yihooway nuussi koshshiyaabaa kunttiyoogaa ammanettida. Nuuni dagayido miishshaa 50 layttau aqinye gididi haggaazi simmidikka aybanne bochibookko! Nuuni he wodiyaa hassayiyoode, Yihooway nu kushiyaa oyqqidi, ‘Yayyoppite, taani inttena maaddana’ yaagidabadan qoppoos.—Isi. 41:13.

Lapilande giyoosan deꞌiya Sodankuwela kataman nuuni dumma aqinye gididi haggaazanaadan, 1958n woradaa xomoosiya ishay zoriis. He wode, hegaa heeran deꞌiya Yihoowa Markki issi michee xalla. A tumaa erido ogee garamiyaaba. I naꞌay ba kifiliyaa tamaaretuura Finlandde waanna katamaa Helsinkki biis. Eti kataman hemettishin, issi cima michiyaa naatuppe wurssettan deꞌiya he naꞌau Wochiyo Keelaa maxeetiyaa immada, i hegaa ba aayeessi immanaadan yootaasu. Naꞌay a yootidoogaadan oottiis, qassi a aayyiyaa tumaa sohuwaara akeekaasu.

Nuuni mittaa haashiya paabirkkaappe bollaara deꞌiya issi kifiliyaa keraa ekkida. Nuuni shiiquwaa yan shiiqoos. Koyro heeran shiiqiyay nuna naaꞌꞌaa, hegaa heeran deꞌiya michiyoonne i naꞌee xalaala. Xannaꞌiyoobaa nuuni issippe nabbaboos. Guyyeppe, Yihoowa Markkatuura Geeshsha Maxaafaa xannaꞌiya issi bitanee mittaa haashiya paabirkkan oottanau yiis. Inne a soo asay nunaara shiiqiyoogaa doommidosona. Guyyeppe, ikka a keettaayiyaakka xammaqettidosona. Nu shiiquwaa ha ishay kaalettees. Hegaa bollikka, he paabirkkan oottiya hara asati nunaara shiiqiyoogaa doommidosona; qassi Geeshsha Maxaafaa tumaa ammanidosona. Amarida layttappe guyyiyan, nu citay diccin gubaaꞌee eqqiis.

METIYAABAA

Haahosaa biyoogee nuuni sabbakanau metootanaadan oottiis. Boniyan nu moottan deꞌiya asau sabbakanau tohuwan hemettoos, qassi bishkkiliitiyaanne wolwoluwaa laaggoos. Nu bishkkiliitee nuna keehippe maaddees. Nuuni awuraajjaa shiiquwaa gidin, xeetan qoodettiya kilomeetiriyaa haakkidi deꞌiya nu soo asaa oychanau gidin bishkkiliitiyan boos. Balgguwan guuran denddidi kaamiyaa toggidi issi heera boos; yaatidi, sooppe soo tohuwan biidi haggaazoos. Issi moottan haggaazi wurssidi, hara moottaa tohuwan boos. SHachay keehi kuurettees; qassi hegee ogiyaappe darotoo pitettenna. Darotoo, shachaa bollaara biya para gaaree kanttidosaara boos. Issi issitoo harati biido ogiyaa shachay kammiichees; qassi ofinttay doommiyo wode shachay keehi shugo gidiyo gishshau, a bollaara hemettanau metootoos.

SHachay biittaa maayiyo gishshaunne keehi kinchiyo gishshau, hoꞌꞌanaadan loytti maayiyoogaa meezetida. Suufe isttookinggiyaanne naaꞌꞌu woy heezzu kalssiyaa wottidi wogga botte caammaa wottoos. Gidoppe attin, darotoo nu botte caamman shachay kumees. Issi keettaa darajaa kiyana haniyo wode, nu botte caammaa kessidi shachaa qoqqofeettees. Qassi nuuni shachaa bollaara hemettiyoode nu adussa jaakeetiyaa gaxay haaxxees. Keehi meeggiyo wode, jaakeetiyaa gaxay sasidi biratadan minnees. Issi maccaasiyaa, “Intte ha kinchiya wodiyan intte dosan hagaa oottiyo gishshau, intte ammanoy mino gidiyoogee qoncce” yaagaasu. Nuuni 11 kilomeetiriyaappe dariyaagaa hemettidi i soo gakkida.

Nuuni haahosaa biyo gishshau, biido heeran darotoo asa son aqoos. Saꞌay omariyo wode, aqiyoosaa oychiyoogaa doommoos. Asaa keettay kawushsha gidikkonne, eti ufayttidi imattaa mokkoosona; qassi son ayssiyoogaa xalla gidennan, miyoobaakka nuuyyo immoosona. Darotoo nuuni cofoshuwaa woy hara doꞌaa irppaniyan ichoos. Issi issitoo loꞌꞌo keettankka aqoos. Leemisuwau, wogga keettay deꞌiyo issi maccaasiyaa, pooqiyan deꞌiya imattaa mokkiyo kifiliyan bootta minxxaafiyaa hiixxido loꞌꞌiya alggan nuna ayssaasu. Darotoo qammi ichana gakkanaashin so asaara Geeshsha Maxaafaappe tobboos. Issisan, azinaynne machiyaa issi kifiliyan ya baggan, nuuni qassi ha baggan ichida. Etaara qammi bilahe gakkanaashin Geeshsha Maxaafaappe tobbida. Azinaynne machiyaa kayan kayan, nuna bolli bollan oychidosona.

ANJJUWAA DEMISSIYA HAGGAAZUWAA

Lapilande biittay lada gidikkonne loꞌꞌees; hegee wodiyaadan wodiyaadan dummatees. Gidikkokka, nuna keehippe loꞌꞌiyay Yihoowa erida asaa. Nuuni markkattido ashkke asatuppe amaridaageeti Lapilanden mittaa qanxxiyoosan deꞌiya kambbiyaa yiidi mittaa qanxxiyaageeta. Issi issitoo, nuuni issi guutta keettaa geliyo wode daro attuma asay yan deꞌees; nuuni eta ayfiyan xiilima. He xettemere asati Geeshsha Maxaafaa qofaa ufayssan siyoosona; qassi xuufiyaa ekkoosona.

Nuuni ufayssiya darobaa beꞌida. Issi gallassi, otobisee eqqiyoosan deꞌiya saatee ichashu daqiiqaa kasetees; yaatiyo gishshau, nuuni gakkiyo wode nuna efiya otobisee biichiis. Hara heeri biya otobisiyan baanau qofaa qachida. He heeran sabbaki erokko. Nuuni koyro biido keettan demmido issi yelaga maccaasiyaa, “Taani qoppidoogaadan puttu giideta” yaagaasu. Nuuni i michiyo Geeshsha Maxaafaa xannaꞌissoos. He maccaasiyaa he gallassi nuuni i soo baanaadan oottana mala ba micheessi yootaasu. Gidoppe attin, nuuni hegaa siyibookko. Onne i shooron deꞌiya i dabbota Geeshsha Maxaafaa xannaꞌissiyoogaa doommida. Hegaappe simmin takkennan, he asata issippe xannaꞌissiyoogaa doommida; yaatin, tammanne naaꞌꞌu asati issippe xannaꞌoosona. Guyyeppe, he keettaa asaappe daroti Yihoowa Markka gididosona.

Nuuni 1965n Arkitika Yafaraa matan xade baggaara deꞌiya Kuusamo kataman, haꞌꞌi nuuni deꞌiyo gubaaꞌiyan haggaazanaadan nuussi odettiis. He wode he gubaaꞌiyan deꞌiya aassiyaageeti keehi guutta. Koyro heeran, nuussi he ooratta haggaazo moottay guuttaa wayssiyaaba milatiis. Asay ba haymaanootiyaa mintti kaallees; qassi nuna ixxees. SHin daro asay Geeshsha Maxaafaa bonchees; hegee asaa haasayissanau nuna maaddiis. Yaatiyo gishshau, nuuni loddan loddan asaa loytti erida; qassi naaꞌꞌu laytta gidiya wodiyaappe guyyiyan Geeshsha Maxaafaa xinaatiyaa doomissanau metootibookko.

HAꞌꞌIKKA MINNIDI HAGGAAZOOS

Haꞌꞌi daro saatiyau haggaazanau nuuyyo wolqqi baawa; gidikkokka, ubba gallassi haggaazoos gaana danddayeettees. Nu ishaa naꞌay minttettin, Ayla 1987n iyyo layttay 56 gidido wode, kaamiyaa laaggiyoogaa tamaarada piqaadiyaa kessaasu. Hegee nuuni haggaaziyo aaho moottan mishiraachuwaa metootennan sabbakanaadan maaddiis. Haꞌꞌi ooratta keexettida nu Kawotettaa Addaraashaara oyqetti uttida pooqiyan deꞌoos.

Huuphessa bagga Finlandden daro asay tumaa ekkidoogee nuna keehippe ufayssees. Nuuni aqinye gididi haggaaziyoogaa doommiyo wode yan deꞌiya aassiyaageeti keehi guutta. Haꞌꞌi yan daro gubaaꞌeti deꞌiyo issi woraday deꞌees. Darotoo gita shiiqotun issi uri nuna sarotidi, nuuni a eriyaakkonne oychees. Issoti issoti naatettan deꞌiyo wode eta so asaa Geeshsha Maxaafaa xannaꞌissida. Daro layttappe kase zerido zerettay ayfiis!—1 Qor. 3:6.

Nuuni dumma aqinye gididi haggaaziyoogaa doommoosappe 2008n 50 laytta gidiis. Nuuni a boncho oosuwan genccana mala issoy issuwaa minttettanaadan maaddido gishshau, Yihoowa galatoos. Nuussi deꞌiyaabay guutta gidikkokka, nuuyyo aybinne paccibeenna. (Maz. 23:1) Nuuni aqinye gidiyo wode hirggidoogee bessennaba gidiyoogaa haꞌꞌi akeekida. Yihooway Isiyaasa 41:10n, “Taani nena minttana; qassi taani nena maaddana. Taani nena ta xooniya ushachcha kushiyan kaafada oiqqana” yaagidoogaadan, ha ubba wodiyan nuna minttidoogee ufayssiyaaba.