“Woossite, Intte Ekkana”

“Godau, . . . nuuni woigi woossanaakko, nuna tamaarissa.” (Luqaasa 11:1) Hegaadan giidi Yesuusa oychidaagee i erissiyo ashkkaratuppe issuwaa. Yesuusi au zaariyo wode, Xoossay nu woosaa siyanaadan ayba ogiyan woossana koshshiyaakko tamaaranaadan maaddiya naaꞌꞌu leemisota yootiis. Xoossay ta woosaa siyiiyye siyennee gaada sirikko, Yesuusi yootidobay nena keehi maaddana.—Luqaasa 11:5-13 nabbaba.

Koyro leemisoy woossiya uraabaa qonccissees. (Luqaasa 11:5-8) Ha leemisuwan, issi bitaniyaa soo qamma bilahe imatti yin, a sintti aattiyo qumi xayiis. Hegee he bitaniyaa keehi eesoyiyaaba. Saꞌay qamma gidikkokka, i oytta talꞌꞌanau ba laggiyaa soo biis. Koyro, a laggee ba soo asaara xiskkido gishshau, denddanau koyibeenna. SHin imatti yiido bitanee ba laggee denddidi immana gakkanaashin oychiyoogaa aggibeenna.a

Ha leemisuwaappe woosaa xeelliyaagan ay tamaariyoo? Nuuni aggennan woossana, koyananne xeesana koshshiyoogaa Yesuusi yootiis. (Luqaasa 11:9, 10) Aybissi? Yesuusi yootidobay Xoossay nu woosaa siyanau koyennaagaa bessii? Akkay. Yesuusi qonccissidobay, xiskkuwaappe denddanau koyibeenna laggiyaappe dumma ogiyan, ammanuwan woossiyaageetussi Xoossay zaariyoogaa bessees. Nuuni aggennan woossiyoogan hegaa mala ammanoy deꞌiyoogaa bessoos. Nuuni zaari zaari oychiyoogee, woossiyo allaalliyaa keehippe koyiyoogaanne, qassi nuuni woossiyoy Xoossay koyiyoogaadaana gidikko, hegaa i immana danddayiyoogaa wozanappe ammaniyoogaa bessees.—Marqqoosa 11:24; 1 Yohaannisa 5:14.

Naaꞌꞌantto leemisoy ‘woosaa siyiya’ Yihoowabaa qonccissees. (Mazamure 65:2) Yesuusi, “Ba na7i, . . . ‘Mole imma’ giikko shooshsha [immana aawi deꞌii]? Woi, ‘PHuuphulle imma’ giikko masimaso immanee?” yaagidi oychiis. Hegaa zaaroy qoncce; qarettiya aaway qohiyaabaa ba naꞌau immenna. Kaallidi, Yesuusi he leemisuwaa birshshiis: Nagarancha gidida aaway ba naatussi “lo77obaa immiyoogaa erikko, yaatin saluwan de7iya Aawai bana woossiyaageetussi Geeshsha Ayyaanaa,” giishin keehi loꞌꞌobaa waati darissidi immanddeeshsha!b—Luqaasa 11:11-13; Maatiyoosa 7:11.

‘Woosaa siyiya’ Yihoowabaa ha leemisuwaappe ay tamaariyoo? Yesuusi, nuuni Yihoowa ba naatussi koshshiyaabaa immanau keehi koyiya qarettiya Aawadan xeellanaadan yootiis. Yaatiyo gishshau, Yihoowayyo goynniyaageeti aynne yayyennan bantta wozanan qoppidobaa a oychana danddayoosona. Qassi, i etau keehi loꞌꞌobaa amottiyoogaa eti eriyo gishshau, woosaa zaaroy eti koyiyoogaappe dumma gidikkokka, eeno giidi ekkoosona.c