“Keehi Garamissiya Misile!”
Ooratta Wochiyo Keelaa maxeetiyaa beꞌiyo wode ne huuphessi woy haratussi aapputoo hegaadan gaadii? Keehi qoppidi giigissido loꞌꞌiya misiletanne pootota maxeetiyan kessiyo halchoy deꞌees. Eti nuuni hanotaa qoppanaadaaninne akeekanaadan maaddiyaabata. Nuuni Wochiyo Keelaa Xinaatiyau giigettiyo wodenne gubaaꞌiyan qofaa yootiyo wode misileti keehippe maaddana danddayoosona.
Leemisuwau, issi xannaꞌiyo huuphe yohuwan deꞌiya koyro misilee he huuphe yohuwau doorettidoy aybissakko qoppa. Hegee ay qonccissii? Waanna huuphe yohuwaara woy huuphe yohuwaa qonccissiya xiqisiyaara hegee maayettiyoy ayba ogiyaanee? Hara ubba misileekka tobbiyo qofaa minttiyoynne nena maaddiyoy ayba ogiyaanakko qoppa.
Gubaaꞌiyan Wochiyo Keelaa Xinaatiyaa kaalettiya ishay, misileti ubbay tamaariyoobaa waati qonccissiyaakko woy banttana waati goꞌꞌiyaakko yootanaadan asaa oychana danddayees. Issi issitoo, misiliyaa issi menttuwaara gatti xeellanaadan maaddiya qofay misiliyaa matan xaafettees. Hara misileta aappuntta menttuwaara tobbiyoogee loꞌꞌokko kaalettiya ishay kuuyana danddayees. Hegaadan oottiyoogan, Xoossaa Qaalan deꞌiya timirttiyaa nabbabiya ubbay akeekanaadan maaddanau giigissidobaappe ubbay loyttidi goꞌettana.
Issi ishay, “Loyttidi xaafido issi huuphe yohuwaa nabbabi simmin, misileti he huuphe yohoy keehi ufayssiyaagaa gidanaadan oottoosona” yaagiis.