Saꞌay Gannate Gidanaagaa Siyada Laamettaas!

KASE DEꞌUWAA:

Taani Laativiyaa waanna kataman Rigan yelettaas. Tananne ta michiyo nu aayyiyaa dichaasu. Aayyiyaa Katolike gidikkokka, nuuni woosa keettaa baalay deꞌiyo wode boosippe attin hara wode bi erokko. Taani Xoossay deꞌiyoogaa ammanays; shin yelagatettan ta qofay shaahettanaadan oottiya dumma dummabaa oottiyoogaa doommaas.

Taani naatettan deꞌiyo wode, issi issi miishshaa birshsha simmada zaaretta giigissiyoogaa dosiyoogaa ta aayyiyaa akeekaasu. Hegaadan birshshiyo darobay nu son deꞌiyo gishshau, ta aayyiyaa tana son yeggada harasaa baana koyukku. Hegaa gishshau, birshshetti uttidabaa giigissada, qassi zaaretta birshsha kaaꞌiyoobaa tau immaasu. Hegaadan oottiyoogaa dosiyoogee taani motoriyaa laaggiyoogaakka dosiyo gishshau, keehi maaddiis. Ta aayyiyaa taani qeeri motoriyan annaacettanaadan mazggabissaasu. Taani qeeri motoriyan annaacettaydda takkada, wogga motoriyan annaacettiyoogaa doommaas.

Taani oorattabaa sohuwaara meezetiyo gishshau, takkennan ha shemppo miya ispporttiyan keehi goobaas. Laativiyaa biittan motoriyaa laaggiya asatuura annaacettada heezzutoo xoonaas; qassi nu biittaa gujjin heezzu biittan deꞌiyaageetuura annacettada naaꞌꞌutoo xoonaas.

TAANI LAAMETTANAADAN GEESHSHA MAXAAFAY MAADDIIS:

Taani hegan keehi erettido wode, ta laggiyaa Evija (guyyeppe o machaas) Yihoowa Markkatuura gayttaasu. Issi wode, Geeshsha Maxaafaa xannaꞌanau koyiyaageeti xaafiyo qitsee deꞌiyo Yihoowa Markkatu xuufiyaa demmaasu. A he qitsiyaa kunttada yeddaasu. Sohuwaara naaꞌꞌu michoti yiidi oychin, a Geeshsha Maxaafaa etaara xannaꞌiyoogaa doommaasu. A xannaꞌiyoogaa taani ixxabeykke; shin he wode ayyaanaabaa taani darin koyikke.

Guyyeppe, he michoti Evijo Geeshsha Maxaafaa xannaꞌissiyo wode taani eti xannaꞌiyoobaa siyanaadan shoobbidosona. Yaatin, taani he wode siyidobaa dosaas. Tana keehi ufayssidabay, Geeshshaa Maxaafay saꞌay gannate gidanaagaa yootiyoobaa. Leemisuwau, taani Mazamure 37:10, 11n, “Iitaa oottiyaageeti guutta wodiyaappe guyyiyan de7okkona; neeni eta koyiyaakkokka eti beettokkona. SHin ashkketi biittaa laattana; eti sarotettaaninne duretettaani ufaittidi daana” yaagiyaagaa nabbabanaadan shoobbidosona. Hegee tana keehi ufayssiis.

Taani ayyaanaabaa eranau koyaas. Qassi haymaanooteti tamaarissiyo worddo gidida darobay deꞌiyoogaa akeekiyoogaa doommaas. SHin Geeshsha Maxaafay tamaarissiyoobay tumanne qoncce gidiyo gishshau ufayttaas.

Geeshsha Maxaafaa amarida wodiyau xannaꞌada Yihooway deꞌuwaa ay keena xoqqu ootti xeelliyaakko akeekaas. (Mazamure 36:9) Hegee, taani annaacettiyoogan ta shemppo miyaabaa oottenna mala qoppanaadan maaddiis. Yaatiyo gishshau, ta deꞌuwan Yihoowa bonchanau koyaas. Hegaa gishshau, motoriyan annaacettada demmiyo bonchuwaanne ufayssaa aggabayaas.

Isttooniyaa biittan, Taalinen daro biittaappe yiida Yihoowa Markkati issippe shiiqiyo awuraajjaa shiiquwaa 1996n baas; he sohoy taani darotoo motoriyan annacettiyo isttaademiyaa matan deꞌees. He shiiquwan daro biittaappe yiida asay issippe saruwan shiiqidoogaa beꞌaas. Leemisuwau, issi Yihoowa Markkeeppe miishshaa borssay bayiis; taani a hegaa demmana gaada qoppabeykke. SHin sohuwaara issi Yihoowa Markkiyaa he borssaa demmada, appe aybinne paccennan iyyo immaasu. Taani hegan keehi garamettaas! Yihoowa Markkati Geeshsha Maxaafan deꞌiya xoqqa maaraa naagidi deꞌiyoogaa akeekaas. Taaninne Evija Geeshsha Maxaafaa minni xannaꞌidi, 1997n xammaqettidi Yihoowa Markka gidida.

TAANI GOꞌETTIDO HANOTAA:

Ta laggetuppe issoti issoti keehi eesotidi motoriyaa laaggiyo gishshau hayqqidosona. Geeshsha Maxaafaa xannaꞌada, taani ta deꞌuwaa suure goꞌettanaadan Yihooway tau immidoogaa akeekaas. Taani paxa deꞌiyoy hegaa akeekido gishshataassa gidana danddayees.

Taaninne Evija Rigan deꞌiya Yihoowa Markkatu macara biiruwan oyddu layttau kumetta wodiyaa haggaazida. Haꞌꞌi qassi nu naꞌiya Alisa Yihoowa siiqanaadan maaddidi dichiiddi deꞌoos. Taani saaminttan issi gallassi kaamiyaanne moorettida issi issibaa giigissanau nu xuufiyaa birshshiyo biiruwaa baada maaddiyoogan ufayttays. Taani naatettaappe doommada eridobaa loꞌꞌobau goꞌettiyo gishshau daro ufayttays. Haꞌꞌikka issi issibaa birshshada zaarettada giigissays.

Ta soo asaara tumu Xoossaabaa haratuyyo yootiyo maataa xoqqu oottada xeellays; taani Geeshsha Maxaafaappe tamaaridobay hegau maaddiis. Tumakka, saꞌay gannate gidanaagaa siyidoogee taani laamettanaadan oottiis!