Daafuranchata Yihooway Xeelliyoogaadan Xeellay?

1, 2. PHawuloosi daafuranchatussi qarettidoy aybissee?

NUUNI ubbay issi issitoo daafuroos. Nuna oshinchissiyo wode woy harabay guuttaa sakkiyo wode, ubbabaa kaseegaadan oottanawu metootana danddayoos. SHin neeni issi woy naaꞌꞌu saaminttawu gidennan, daro aginawu sahettada abbe xayidabadan ane qoppa. Hegaa mala wodiyan, harati ne hanotaa akeekidi neeyyo qarettiyaakko ufayttikkii?

² Gubaaꞌiyan deꞌiyaageetinne gubaaꞌiyaappe kareera deꞌiyaageeti kiitettida PHawuloosa issi issiban qohido gishshawu, i daafurido wodeti deꞌoosona. I bana gakkida waayee a wolqqaappe daridoogaa yootidoy issitoo xalla gidenna. (2 Qor. 1:8; 7:5) PHawuloosi ammanettida Kiristtaane gididi deꞌishin bana gakkida daro metuwaa qoppidi, “Daafuriyai oonee? Taani daafurikkinaayye?” yaagiis. (2 Qor. 11:29) I gubaaꞌiyan deꞌiya dumma dumma asaa, bollaa qommotun leemisidi, “laafa milatiya bollaa qommoti daro koshshiyaageeta” yaagiis. (1 Qor. 12:22) I gaana koyidobay aybee? Laafa woy daafurancha milatiyaageeta Yihooway xeelliyoogaadan xeellana koshshiyoy aybissee? Qassi hegaadan oottiyoogee nuna waati maaddii?

YIHOOWAY DAAFURANCHATA WAATI XEELLII?

3. Nu ishata bessenna ogiyan xeellanaadan oottana danddayiyaabay aybee?

³ Ha alamiyan asay wolqqaara deꞌiyaageetanne yelagata xoqqu oottidi xeellees; qassi issoy issuwaara annaacettees. Daroti bantta koyidobaa demmanawu, wolqqi baynnaageeta darotoo naaqqoosona. Nuuni hegaa malabaa ixxoos; shin akeekennan gubaaꞌiyan deꞌiyaageeta gujjin, ubba wode maadoy koshshiyoogeeta uufiyoogaa doommana danddayoos. Gidikkokka, hegaa mala asata Yihooway xeelliyoogaadan xeellana danddayoos.

4, 5. (a) Koyro Qoronttoosa 12:21-23n deꞌiya leemisoy Yihooway daafuranchata waatidi xeelliyaakko nuuni akeekanaadan waati maaddii? (b) Daafuranchata maaddiyoogan waani goꞌettiyoo?

⁴ PHawuloosi Qoronttoosa gubaaꞌiyan deꞌiyaageetuyyo xaafido koyro dabddaabbiyan yootido leemisuwaappe Yihooway daafuranchata waati xeelliyaakko akeekana danddayoos. PHawuloosi shemppo 12n keehi laafa milatiya bollaa qommoti koshshiyaaba gidiyoogaa yootiis. (1 Qoronttoosa 12:12, 18, 21-23 nabbaba.) Lodda laamiyan ammaniya issoti issoti he qofaa eqettoosona.a Leemisuwawu, issi wode asay gediyaa qeeri biradhee aynne maaddennabadan qoppiis. SHin ha wodiyan, saynttistteti gediyaa qeeri biradhee asay sitti giidi eqqanaadan maaddiyoogaa akeekidosona.

⁵ PHawuloosi yootido leemisoy gubaaꞌiyan deꞌiya ubbay koshshiyaaba gidiyoogaa qonccissees. Asa boncho diggiya Seexaanaappe dumma ogiyan, Yihooway laafa woy daafurancha milatiyaageeta gujjin, ba ashkkarata ubbaa “koshshiyaageeta” oottidi xeellees. (Iyy. 4:18, 19) Hegee nu gubaaꞌiyaa asay gidin alame ubban deꞌiya Xoossaa asay nuna koshshiyaageeta oottidi xeelliyoogaa akeekanaadan maaddees. Leemisuwawu, bana kaafanaadan koyida, layttan sugida uraa neeni maaddido wodiyaa qoppa. A maaddiyo wode aagaadan loddan hemettennan aggakka. Hegaadan maaddiyoogan harata goꞌꞌada, neeyyookka ufayttabeykkii? Ee, nuuni harata maaddiyo wode, keehi ufayttoos; qassi kaseegaappe aaruwan danddayancha, harata siiqiyaageetanne kayma Kiristtaane gidoos. (Efi. 4:15, 16) Laafa woy daafurancha milatiyaageeta gujjin, nu ishatinne nu michoti koshshiyaageeta gidiyoogaa qoppanaadan Yihooway koyees. Nuuni hegaadan qoppiyaageeta gidikko, nu ishatuppe darobaa naagokko; qassi gubaaꞌeekka ufayssiyaagaa gidees.

6. PHawuloosi ‘laafa’ woy ‘daafurancha’ giya qaalaa ay qonccissanawu goꞌettidee?

⁶ PHawuloosi Qoronttoosa gubaaꞌiyawu xaafiyo wode, ammanenna asati beni Kiristtaaneta waati xeelliyaakko qonccissanawunne bawu siyettiyaabaakka qonccissanawu ‘laafa’ woy ‘daafurancha’ giya qaalata goꞌettiis. (1 Qor. 1:26, 27; 2:3) Qassi, PHawuloosi ‘mino’ Kiristtaanetubaa yootido wode, eti haratuppe leqqoosona gibeenna. (Roo. 15:1) SHin i takkida Kiristtaaneti biron tuman xaphuwaa yeddibeennaageetuppe aaruwan danddayancha gidana koshshees gaanawu koyiis.

NUUNI NU QOFAA LAAMMANA KOSHSHIISHSHA?

7. Maadoy koshshiyoogeeta nuuni maaddennaadan oottiyaabay aybee?

⁷ Nuuni ‘hiyyeesata’ woy daafuranchata maaddiyo wode, Yihoowa milatoos; qassi a ufayssoos. (Maz. 41:1; Efi. 5:1) SHin maadoy koshshiyoogeeta bessiya ogiyan xeellana xayikko, maaddennan aggana danddayoos. Woy metoy gakkido uraa woygi minttettanaakko erenna gishshawu, appe haakkana danddayoos. Azinay aggi biido Sinttiyob giyo michiyaa hagaadan gaasu: “Ishati issi uraa sheneho giyaaba woy mata laggee oottana bessiyaabaa awu oottennaba gidikko, hegee a qohana danddayees. Metoy gakkiyo wode ne matan asi deꞌanaadan koyaasa.” Kawuwaa Daawitikka laggeti a sheneho giido wode hegaadan qoppiis.—Maz. 31:12.

8. Nuuni asassi keehi qarettanaadan aybi maaddii?

⁸ Nu siiqo ishatuppenne michotuppe issota issota wolqqaama metoy gakkiyoogaa, leemisuwawu, eti sahettiyoogaa, Yihoowa Markka gidenna so asaara issippe deꞌiyoogaa woy unꞌꞌettiyoogaa nuuni akeekikko, etawu keehi qarettana danddayoos. Nunakka issi wode etaagaa mala metoy gakkana danddayees. Gibxxe biittan hiyyeesanne daafurancha gididi deꞌida Israaꞌeelati Hidootaa Biittaa gelanaappe kase, metoy gakkido bantta ishatuyyo ‘meqettaa iitenna’ mala Yihooway yootiis. Yihooway eti hiyyeesanne daafurancha gidida bantta ishantta maaddana mala koyiis.—Zaa. 15:7, 11; Wog. 25:35-38.

9. Metoy gakkidoogeeta maaddiyo wode nuuni kasetidi ay oottana koshshii? Leemisuwaa yoota.

⁹ Nuuni metoy gakkido asa bolli pirddiyoogaappe woy a siriyoogaappe ayyaanaaban minttettana koshshees. (Iyy. 33:6, 7; Maa. 7:1) Leemisuwawu, issi asi motoriyaa laaggishin daafabay gakkin qohettidi sohuwaara hosppitaaliyaa biidabadan qoppa. I yaa gakkin, dottoretinne narsseti daafabaa gattiday oonakko palamettiiddi wodiyaa wurssiyoonaa? CHiikka, eti a sohuwaara akkamoosona. Hegaadankka, issi ishay bana gakkida metuwaappe denddidaagan daafuriyaaba gidikko, nuuni a ayyaanaaban sohuwaara maaddana koshshees.—1 Tasalonqqe 5:14 nabbaba.

10. Issoti issoti daafurancha milatikkokka, waanidi ‘ammanuwan dure’ gidiyoonaa?

¹⁰ Nu ishati daafurancha milatiyaaba gidikkokka, nuuni eta hanotaa qoppiyo wode, eti tumuppe daafurancha gidennaagaa akeekoos. Azinay daro layttawu eqettishin tuman genccidi deꞌiya michotubaa qoppa. Issoti issoti daafurancha milatikkokka, mino ammanoy deꞌiyoogeeta gidana danddayoosona. Ba naatuura ubba wode gubaaꞌe shiiquwaa yiya, barkka naata dichiya aayyiyo beꞌiyo wode, i ammanuwaa nashshikkii? Timirtte keettan iita paacee gakkishin tumaa mintti oyqqida yelagata shin nashshikkii? Nu ishati Yihoowayyo haggaazanawu oottiyoobaa nuuni qoppiyo wode, eti daafurancha milatiyaaba gidikkokka, ‘ammanuwan dure’ gidiyoogaa akeekoos.—Yaaq. 2:5.

YIHOOWAY QOPPIYOOGAADAN QOPPA

11, 12. (a) Nuuni daafuranchata bessiya ogiyan xeellanaadan aybi maaddii? (b) Yihooway Aaroona atto giidoy aybissee, qassi nuuni hegaappe ay tamaariyoo?

¹¹ Yihooway ba ashkkarata waati oyqqidaakko qoppiyoogee, nuunikka daafuranchata i xeelliyo ogiyan xeellanawu maaddees. (Mazamure 130:3 nabbaba.) Leemisuwawu, Aarooni worqqaappe maraa medhidi, hanenna gaasuwaa yootiyo wode neeni Muuse matan deꞌiyaaba gidiyaakko neeyyo aybi siyettanee? (Kes. 32:21-24) Woy Muusee hara biittaa maccaasiyo ekkido gishshawu, Miiriyaama denttettin Aarooni a boridoogaa xeelliyaagan shin neeyyo aybi siyettanee? (Qoo. 12:1, 2) Qassi Yihooway maalaalissiyaabaa oottidi Mariiban haattaa immido wode, Muuseenne Aarooni Yihoowa bonchibeennaagaa xeelliyaagan neeyyo aybi siyettanee?—Qoo. 20:10-13.

¹² Aarooni he ubba balaa oottido wode, Yihooway a sohuwaara qaxxayibeenna. Aarooni mooridaba gidikkokka, i iita asa gidennaagaa Yihooway akeekiis. I moorobaa oottidoy haniyoobaa xayido gishshataassanne asay yootido balabaa siyido gishshataassa gidennan aggenna. Gidoppe attin, Aarooni balabaa oottidoogaa sohuwaara ammaniis; qassi Yihoowa zoriyaakka siyiis. (Kes. 32:26; Qoo. 12:11; 20:23-27) Yihooway Aaroona ammanuwaanne i ba nagaraappe simmanawu koyiyoogaa akeekiis. Daro layttaappe guyyiyan, Aarooninne a keettaa asay Yihoowayyo ammanettida ashkkara gidiyoogee odettidoy hegaassa.—Maz. 115:10-12; 135:19, 20.

13. Nuuni daafuranchata xeelliyo ogiyaa waatidi laammana danddayiyoo?

¹³ Nu xeelay Yihoowaagaa mala gidanaadan koyikko, daafurancha milatiyaageetu hanotaa loytti akeekana koshshees. (1 Sam. 16:7) Leemisuwawu, iitabaa amottiyaaba milatiya yelagaabaa ane qoppa. I allaxxiyoobaa akeekan doorennaagaa gidana danddayees. Hegaa gishshawu, a iita asa gaada qoppanawu eesotoppa. Hegaadan qoppiyoogaappe, a waatada maaddana danddayiyaakko qoppa. Qassi i suurebaa waati doorana danddayiyaakko tamaarissa. Ne ishata hegaadan maaddiyoogan, kaseegaappe aaruwan danddayancha gidaasa; qassi eta keehi siiqaasa.

14, 15. (a) Eelaasi guutta wodiyawu yayyido wode Yihooway abaa ay qoppidee? (b) Yihooway Eelaasa maaddido hanotaappe ay tamaarana danddayiyoo?

¹⁴ Issoti issoti ayyaanan liiqidabadan qoppido wode Yihooway eta waati oyqqidaakko eriyoogee, nuuni harata waati oyqqana bessiyaakko akeekanawu maaddees. He asatuppe issoy Eelaasa. I Baꞌaalayyo hananabaa yootiya 450 asatuura yayyennan gaaddetidaba gidikkokka, Kawiyaa Elzzaabeela a woranawu qoppidoogaa siyidi baqatiis. I 150 kilo meetire gidiyaagaa hemettidi Berssaabeha biis; hegaappe simmidi bazzo biis. Awaa suuluwan i he ogiyaa biido gishshawu keehi daafuridi issi mittaa kuwan uttidi, “haiqqanau woossiis.”—1 Kaw. 18:19; 19:1-4.

¹⁵ Yihooway ba ammanettida ashkkaray keehi unꞌꞌettidoogaa beꞌiyo wode abaa ay qoppidee? A ashkkaray guutta wodiyawu unꞌꞌettidi yayyido gishshawu a aggibayidee? CHii aggibeenna! Yihooway Eelaasa daafuraa akeekidi issi kiitanchaa akko kiittiis. He kiitanchay Eelaasi qumaa maanaadan naaꞌꞌutoo minttettiis. Hegaa gishshawu, i hegaappe simmin biido ogee “daro adussa” gidibeenna. (1 Kawotu Maxaafaa 19:5-8 nabbaba.) Yihooway Eelaasi oottanabaa yootanaappe kase, i yootiyoobaa siyiis; qassi koshshiyaaban a maaddiis.

16, 17. Yihooway Eelaasayyo qoppidoogaadan nuuni haratussi waati qoppana danddayiyoo?

¹⁶ Siiqo Xoossaa leemisuwaa waati kaallana danddayiyoo? Zoranawu eesotana koshshenna. (Lee. 18:13) Bantta metuwaappe denddidaagan banttana “bonchchettennabaa” giidi qoppiya asatuyyo nuuni kasetidi qarettiyoogee bessiyaaba. (1 Qor. 12:23) Hegaadan oottikko, etawu koshshiyaabaa akeekidi maaddana danddayoos.

¹⁷ Leemisuwawu, ibaa kasetidi yootido Sintteebaa qoppa; i azinay onne i naaꞌꞌu macca naata aggidi biis. Eti he wode keehi boorasidosona. Yaatin, issi issi Yihoowa Markkati etayyo ay oottidonaa? A hagaadan gaasu: “Nuuni hanettidabaa etayyo silkkiyan yootin, 45 daqiiqaa giddon nu soo yiidosona. Eti nunaara yeekkidosona. Qassi hegaappe simmidi naaꞌꞌu woy heezzu gallassaa nu matappe bibookkona. Nuuni keehi unꞌꞌettidi qumaa maara meenna gishshawu, amarida wodiyawu eti nuna bantta soo ekki biidosona.” Hegee Yaaqoobi kaallidi deꞌiyaagaadan yootidobaa hassayissees: “Issi ishai, woi issi michchiyaa kallottikko, qassi etau ubba gallassi miyoobi xayikko, Intteppe issi urai eta, ‘Saro biite. Tamaa ho77ite. Kallidi miite’ giidi, etau koshshiyaabaa immana xayikko, eta ai go77anee? Hegaa gishshau, ammanoi oosoi bainnan barkka de7ikko haiqqidaagaa.” (Yaaq. 2:15-17) Ishantti Sintteeyyoonne i naatuyyo oottidobay he wode etawu keehi koshshiyaaba gidiyo gishshawu, usuppun aginappe guyyiyan, eti minettidi kaafiya aqinye gididosona.—2 Qor. 12:10.

DAROTA GOꞌꞌIYAABAA

18, 19. (a) Nuuni daafuranchata waati maaddana danddayiyoo? (b) Nuuni daafuranchata maaddiyo wode goꞌettiyay oonee oonee?

¹⁸ Wolqqaama sahuwaappe paxiyoogee wode ekkiyaabaa gidiyoogaa erennan aggakka. Hegaadan, issi Kiristtaanee balabaa ootti simmidi woy a wolqqaama metoy gakki simmin, ayyaanaaban minnanaashin amarida wodee aadhana danddayees. I ba ammanuwaa minttanawu Xoossaa Qaalaa xannaꞌana, woossananne gubaaꞌe shiiquwaa shiiqana koshshiyoogee tuma. SHin, i ayyaanaaban minnanaashin nuuni a danddayana koshshennee? He wodiyan nuuni a aggennan siiqanee? Daafuridaageeti banttana koshshiyaageeta oottidi qoppanaadaaninne nuuni siiqiyoogaa eti akeekanaadan maaddanawu baaxetiyoo?—2 Qor. 8:8.

¹⁹ Nuuni nu ishata maaddiyo wode, immiyoogaa xallan beettiya ufayssaa demmiyoogaa mule dogana koshshenna. Qassi kaseegaappe aaruwan qarettiya asanne danddayancha gidoos. Hegaadan oottiyoogawu hara goꞌꞌaykka deꞌees. Gubaaꞌiyan deꞌiya ubbay issoy issuwaa siiqiyaagaa gidees. Ubbaappe aaruwan, asa ubba xoqqu oottidi xeelliya Yihoowa leemisuwaa kaalloos. Ee, nuuni ubbay ‘daafuranchata maaddanaadan’ oottiya daro gaasoy deꞌees.—Oos. 20:35.