Harati Bantta Imotaa Loytti Goꞌettanaadan Maadda

1, 2. Yihooway baayyo oottiya asaa waati xeellii?

YELIDAAGEETI bantta naati kaaꞌiyo wode, etayyo dumma dumma imotay deꞌiyoogaa beꞌidi garamettoosona. Neenikka hegaa akeekennan aggakka. Issi naꞌay ispporttiyan gooba gidana danddayees; haray qassi misiliyaanne hegaa mala harabaa medhiyoogan gooba gidana danddayees. SHin naatuyyo deꞌiya eray ayba gidikkokka, yelidaageeti naati bantta imotaa loytti goꞌettanaadan woykko eti danddayiyo ubbabaa oottanaadan koyoosona.

² Yelidaageeti bantta naata siiqiyoogaadan, Yihoowaykka asaa naata dosees. I ha wodiyan baassi oottiyaageeta ‘kawotettatu ubban deꞌiya aqodan’ xeellees. (Hag. 2:7) Eti ayyo ammanettidi deꞌiyo gishshawu a aqo. Ishatuyyoonne michotuyyo dumma dumma imotay deꞌiyoogaa akeekana danddayaasa. Issi issi ishatuyyo gubaaꞌiyan haasayaa shiishshiyo imotay deꞌees; haratuyyo qassi issi issibaa giigissiyo imotay deꞌees. Daro michoti kare biittaa qaalaa tamaaridi haggaazuwan goꞌettanawu gooba; harati qassi harggidaageetanne maadoy koshshiyoogeeta minttettiyoogan gooba. (Roo. 16:1, 12) Hegaa mala dumma dumma imotay deꞌiyo Kiristtaaneti gubaaꞌiyan deꞌiyo gishshawu ufayttoos.

3. Ha huuphe yohuwan nuuni pilggana oyshati awugeetee?

³ SHin, yelagatanne mati xammaqettidaageeta gujjin, issoti issoti gubaaꞌiyan ay oottanaakko erennan aggana danddayoosona. Eti bantta imotaa loytti goꞌettanaadan nuuni waati maaddana danddayiyoo? Nuuni Yihoowa leemisuwaa kaallidi nu ishatuyyo deꞌiya loꞌꞌobaa xeellanawu baaxetana koshshiyoy aybissee?

YIHOOWAY BA ASHKKARATUYYO DEꞌIYA LOꞌꞌOBAA XEELLEES

4, 5. Daannata 6:11-16n deꞌiya taarikee Yihooway ba ashkkaratu imotaa akeekiyoogaa waati qonccissii?

⁴ Yihooway ba ashkkaratu loꞌꞌo eeshshaa xalla gidennan, etawu deꞌiya imotaakka xeelliyoogaa Geeshsha Maxaafay yootees. Leemisuwawu, Geedooni Xoossaa asaa Midiyaamatu huqqunnaappe naxa kessanaadan doorettido wode issi kiitanchay a, “Laa nenoo, mino olanchchau GODAI nenaara de7ees” yaagin i garamettiis. He wode Geedooni bana ‘mino olancha’ giidi qoppibeenna. Qassi Xoossaa asaa ashshana danddayiyaabadan qoppibeenna. SHin Yihoowa qofay aagaappe dummatees. Yihooway Geedooni mino asa gidiyoogaanne Israaꞌeelata ashshanawu a goꞌettanaagaa eriis.—Daannata 6:11-16 nabbaba.

⁵ Yihooway Geedooni hiillancha asa gidiyoogaa akeekidi, Israaꞌeelata ashshanawu a dooriis. Leemisuwawu, Yihoowa kiitanchay Geedooni ba kumetta wolqqan gisttiyaa qoxxiyoogaa beꞌiis. Kiitanchay harabaakka akeekiis. Goshshanchati darotoo carkkoy suullaa efaanaadan gisttiyaa awudiyan qoxxoosona. SHin Geedooni Midiyaamati ba kattaa wuuqqennaadan qosettidi woyne eessaa gumꞌꞌiyoosan qoxxees. Hegee hiilla ooso! Geedooni gooba oosancha xalla gidennan, hiillancha gidiyoogaa Yihooway akeekiis. Yihooway Geedoonassi deꞌiya imotaa akeekidi a loohissiis.

6, 7. (a) Yihooway Amoxa xeellido ogee issi issi Israaꞌeelati xeellido ogiyaappe dummatiyoy aybiinee? (b) Amoxi issi issibaa eriya asa gidiyoogaa bessiyaabay aybee?

⁶ Hegaadankka, Yihooway daro asay kariyo Amoxayyo deꞌiya loꞌꞌo imotaa akeekiis. Amoxi babaa, mehiyaa heemmiyaagaanne ettaa ayfiyaa maxiyaagaa gidiyoogaa yootiis; ettaa ayfee darotoo hiyyeesa uri miyooba. Eeqaayyo goynniya tammu Israaꞌeela kawotettawu pirddaa yootanaadan Yihooway Amoxa sunttido wode issi issi Israaꞌeelati a karennan aggokkona.—Amoxa 7:14, 15 nabbaba.

⁷ Amoxi gaxare asa; shin i he wode asaa meeziyaanne haariyaageetubaa erees. I Israaꞌeela biittan deꞌiya hanotaa erennan aggenna; qassi shooro biittan deꞌiya asaa hanotaa issi issi zalꞌꞌanchatuppe siyennan aggenna. (Amo. 1:6, 9, 11, 13; 2:8; 6:4-6) Ha wodiyan deꞌiya Geeshsha Maxaafaa eranchatuppe issoti issoti Amoxi gooba xaafe gidiyoogaa yootoosona. I akeekanawu metenna, loytti qonccissiya qaalaa goꞌettiis. Amoxi eeqaa goynuwaa qeese gidida Amaaxiyaa xalidi eqettidoogee, Yihooway harati akeekibeenna imotay deꞌiyo, giiga uraa dooridoogaa bessees.—Amo. 7:12, 13, 16, 17.

8. (a) Yihooway Daawita waatanawu qaalaa gelidee? (b) Mazamure 32:8n deꞌiya qofay issibaa oottanawu danddayennabadan qoppiyaageeta minttettiyoy aybissee?

⁸ Ee, Yihooway ba ashkkaratu ubbaayyo deꞌiya imotaa akeekees. I Kawuwaa Daawita ubba wode kaalettanawunne ‘naaganawu’ qaalaa geliis. (Mazamure 32:8 nabbaba.) Hegee nuna minttettiyoy aybissakko eray? Nuuni issibaa oottanawu danddayennabadan qoppiyaaba gidikkokka, Yihooway nuuni qoppidoogaappe aaruwan oottanaadan maaddana danddayees. Gooba asttamaaree darobaa erenna tamaariyaa ubbabaa tamaarissiyoogaadan, Yihooway nuuni ayyaanaaban diccanaadan kaalettees. Yihooway nuuni nu imotaa loytti goꞌettanaadan nu ishatunne michotu baggaarakka goꞌettana danddayees. Waatidi?

HARATUYYO DEꞌIYA LOꞌꞌOBAA XEELLA

9. Haratuyyo deꞌiya loꞌꞌobaa qoppanaadan PHawuloosi zoridobaa waatidi oosuwan peeshshana danddayiyoo?

⁹ PHawuloosi ubba Kiristtaaneti bantta ishatuyyoonne michotuyyo deꞌiya loꞌꞌobaa qoppanaadan minttettiis. (Piliphphisiyuusa 2:3, 4 nabbaba.) PHawuloosi hegaadan zoridoy nuuni nu ishatu imotaa akeekidi nashshanaadaana. Issi uri nu eeshshay kaseegaappe loꞌꞌidoogaa akeekidi nashshiyo wode nuuyyo aybi siyettii? Nuuyyo danddayettida keenan nu eeshshaa keehi loyttanawu koyoos. Hegaadankka, nu ishati baaxetiyoogaa akeekidi nashshiyo wode eti ayyaanaaban diccanaadan maaddoos.

10. Nuuni loytti qoppana koshshiyoy oossee?

¹⁰ Nuuni loytti qoppana koshshiyoy oossee? Nuuni ubbay asay nuuyyo loytti qoppanaadan issi issitoo koyiyoogee qoncce. SHin yelaga woy mati xammaqettida ishati issi issibaa oottidi gubaaꞌiyaa maaddanaadan nuuni minttettana danddayoos. Hegaadan oottiyoogee eti gubaaꞌiyawu koshshiyaageeta gidiyoogaa akeekanaadan maaddees. Hara baggaara qassi, hegaa mala ishata nashshennan aggiyoogee Xoossaa Qaalay eti oottanaadan minttettiyoobawu eti baaxetennaadan oottana danddayees.—1 Xim. 3:1.

11. (a) Issi yelagay dungguuxiyoogaa agganaadan issi cimay waati maaddidee? (b) ZHuliyana hanotaappe ay tamaaray?

¹¹ Ludovika giyo issi cimay yelagatettan deꞌiyo wode harati hegaadan oottido gishshawu goꞌettiis. I, “Taani issi ishaayyo deꞌiya loꞌꞌobaa nashshiyo wode, i ayyaanaaban elle diccees” yaagiis. Ludoviki ZHuliyana giyo dungguuxa gidida issi yelagaabaa hagaadan giis: “ZHuliyani dungguuxidi haniyoobaa xayiyo gishshawu, a hanotay hara asaa ufayssenna. SHin i daro kehanne gubaaꞌiyan deꞌiyaageeta maaddanawu wozanappe koyiya asa gidiyoogaa akeekaas. Hegaa gishshawu, a hanotaa siriyoogaappe i loꞌꞌo qofaa qoppiya asa gidiyoogaa akeekada a minttettaas.” Guyyeppe, ZHuliyani gubaaꞌiyawu oottiyaagaa gidiis; haꞌꞌi qassi aqinye gididi haggaazees.

BANTTA IMOTAA LOYTTI GOꞌETTANAADAN MAADDA

12. Issi uri ba imotaa loytti goꞌettanaadan maaddanawu nuuni ay oottana bessii? Leemisuwaa yoota.

¹² Harati bantta imotaa loytti goꞌettanaadan maaddana koyikko, nuuni eta hanotaa akeekana koshshees. ZHuliyana hanotaappe akeekidoogaadan, nuuni ufayssenna eta eeshshaa aggidi eta loꞌꞌo eeshshaanne imotaa qoppana koshshees. Yesuusikka kiitettida PHeexiroosa hegaadan xeelliis. PHeexiroosi issi issitoo gelꞌꞌigelꞌꞌidaba milatikkokka, i shuchaadan minnanaagaa Yesuusi kasetidi yootiis.—Yoh. 1:42.

13, 14. (a) Yelaga gidida Marqqoosaara gayttidaagan Barnnaabaasi akeekancha gidiyoogaa waati bessidee? (b) Issi yelaga ishay Marqqoosaagaadan waani maadettidee? (Ha huuphe yohuwaa doomettan deꞌiya misiliyaa xeella.)

¹³ Barnnaabaasikka Marqqoosa giyo Yohaannisassi deꞌiya loꞌꞌo imotaa akeekiis. (Oos. 12:25) PHawuloosi Barnnaabaasaara misoonaawe oosuwawu koyro biido wode, Marqqoosi issi issibaa oottidi eta ‘maaddennan’ aggenna. SHin eti PHinifiliyaa gakkido wode, Marqqoosi eta yan aggidi biis. Eti panggati dariyo huuphessa baggi banttarkka biidosona. (Oos. 13:5, 13) Marqqoosi sohuwaara ba qofaa laammiya asa gidiyoogaa Barnnaabaasi eriyaaba gidikkokka, guyyeppe a loytti loohissennan aggenna. (Oos. 15:37-39) Hegaa gishshawu, he yelagay Yihoowayyo oottiya kayma asa gidiis. PHawuloosi Roomen qashettidi Qolasiyaasa gubaaꞌiyan deꞌiya Kiristtaanetuyyo sarotaa kiittido wode Marqqoosi aara deꞌees; qassi PHawuloosi abaa nashshidi yootiis. (Qol. 4:10) PHawuloosi bana Marqqoosi maaddanaadan koyidoogaa Barnnaabaasi siyidi ay keena ufayttidaakko qoppa.—2 Xim. 4:11.

¹⁴ Mata wode gubaaꞌe cima gidida Alekisandderi issi ishay bana waati maaddidaakko hassayidi hagaadan giis: “Taani yelagatettan deꞌiyo wode asay dariyoosan woossanawu keehi metootays. Issi cimay kaseta giigettada unꞌꞌettennan woossanaadan tana minttettiis. I tana shoobbiyoogaa aggiyoogaappe, haggaazuwawu kiyanaappe kase shiiqiyo shiiquwan woossanaadan darotoo tana shoobbees. Guyyeppe taani yayyiyoogaa aggaas.”

15. PHawuloosi ishantta nashshiyoogaa waati qonccissidee?

¹⁵ Issi Kiristtaaniyaassi deꞌiya loꞌꞌo eeshshaa akeekiyo wode, hegaa xoqqu oottidi xeelliyoogaa ayyo yootiyoo? Roome shemppo 16n PHawuloosi bana ufayssida, loꞌꞌo eeshshay deꞌiyo 20ppe dariya Kiristtaaneta nashshiis. (Roo. 16:3-7, 13) Leemisuwawu, Anddironiqoosinne Yuniyaasi appe kase Kiristtoosayyo oottiyoogaa doommido gishshawunne genccido gishshawu, PHawuloosi eta nashshiis. PHawuloosi bana ba naꞌadan maaddida, Rufoosa aayeebaakka yootiis.

16. Nuuni yelagata nashshiyo wode eti waanana danddayiyoonaa?

¹⁶ Harata wozanappe galatiyoogee loꞌꞌo ayfiyaa demissana danddayees. Leemisuwawu, Paransaaye biittan deꞌiya, yelaga naꞌaa Rekobaa qoppa; a aaway Yihoowa Markka gidenna gishshawu i xammaqettennaadan eqettin Rekoy azzaniis. Rekoy Yihoowayyo loytti haggaazanawu asa gamma gakkanaashin naagana bessiyaabadan qoppiis. Timirtte keettan naati a bolli qilliicciyo gishshawu i azzaniis. A Geeshsha Maxaafaa xannaꞌissiya, gubaaꞌe cima gidida Frederiki, “Asay a hegaadan eqettiyoogee, i xalidi ba ammanuwaabaa yootana danddayiyoogaa bessiyaaba gidiyoogaa Rekoyyo yootada a nashshaas” yaagiis. Hegaa gishshawu, Rekoy ayyaanaaban diccanawu qofaa qachiis; qassi ba aawaara sigan deꞌanawu murttiis. Yaatidi, ayyo 12 laytta gidin Rekoy xammaqettiis.

17. (a) Nu ishati diccanaadan waati maaddana danddayiyoo? (b) Misoonaawe gididi oottiya issi ishay yelaga ishata waati maaddidee, qassi hegee ayba ayfee demissidee?

¹⁷ Ishantti issibaa loytti oottido wode ubban eta nashshiyoogee eti kaseegaappe aaruwan Yihoowayyo oottanaadan denttettees. Paransaaye Beeteelen oottiya Silviyoa giyo michiyaa, michotikka ishata nashshana danddayiyoogaa yootaasu. A macca asay harati akeekibeennabaa beꞌidi nashshana danddayiyoogaa yootaasu. Hegaa gishshawu, eti “minttettanawu yootiyoobay kayma ishati he asata minttettiyo wode gujoba gidana danddayees.” A gujjadakka, “Harata galatiyoogee taani ubba wode oottana bessiyaaba” yaagaasu. (Lee. 3:27) French Giyanan misoonaawe gididi oottiya ZHeromi daro yelagati misoonaawe gidanaadan maaddiis. I hagaadan giis: “Yelaga ishati haggaaziyo wode woy loytti giigettido qofaa yootiyo wode, taani eti loyttana bessiya guuttabaa yootikko eti kaseegaappe minettiyoogaa akeekaas. Hegaappe denddidaagan eta eray gujjees.”

18. Yelaga ishatuura oottiyoogee maaddiyaaba gididoy aybissee?

¹⁸ Nuuni nu ishatuura issippe oottiyoogan eti ayyaanaaban diccanaadan minttettana danddayoos. Gubaaꞌe cimay, komppiyuteriyaa loytti goꞌettiya issi yelagay layttan sugida, komppiyuteree baynnaageetuyyo jw.org sayttiyaappe eta maaddiya issi issibaa attamanaadan yootana danddayees. Woy neeni Kawotettaa Addaraashan issi issibaa oottiyaaba gidikko, nenaara oottanaadan issi yelaga ishaa ayssi shoobbikkii? Yaatiyoogee, yelagatu hanotaa akeekanawunne eta minttettanawu, qassi eta dichaa beꞌanawu maaddees.—Lee. 15:23.

SINTTANAWU HALCHA

19, 20. Harati ayyaanaaban diccanaadan nuuni maaddana koshshiyoy aybissee?

¹⁹ Yihooway Israaꞌeelata kaalettanaadan Yaasa doorido wode, Muusee a ‘xalissanaadaaninne minttettanaadan’ azaziis. (Zaarettido Wogaa 3:28 nabbaba.) Kumetta saꞌan daro asay Yihoowa keettaakko zuliiddi deꞌees. Gubaaꞌe cimatu xalla gidennan, kayma Kiristtaaneti ubbay yelaga ishatinne mata wode xammaqettidaageeti bantta imotaa loytti goꞌettanaadan maaddana danddayoosona. Yaatiyoogan, daroti kumetta wodiyaa haggaaziyaageetanne “harata tamaarissanau danddayiya” asata gidana danddayoosona.—2 Xim. 2:2.

²⁰ Nuuni gita gubaaꞌiyan deꞌiyaageeta gidin, gubaaꞌe gidiichibeenna guutta citan deꞌiyaageeta gidin sinttanawu halchiyaageeta gidoos. Yaatanawu maaddiya waannabay, ba ashkkaratuyyo deꞌiya loꞌꞌobaa xeelliya Yihoowa leemisuwaa kaalliyoogaa.